Anarchist Dziadok vykazaŭsia suprać dazvołu na aborty. Ale ličyć, što zakanadaŭčaja zabarona ničoha nie daść

Nahodaj dla dopisu Mikoły stała toje, što ŭ Biełarusi źbirajucca zabaranić aborty ŭ pryvatnych miedyčnych centrach. Voś Dziadok i napisaŭ, što jon kateharyčna suprać abortaŭ:

«Pa fakcie abort — heta zabojstva, ź jakoha boku nie razhladaj. Usie arhumienty ŭ duchu «niet matki — niet mnienija» albo «tolko žienŝina v pravie riešať!» — psieŭdafieministyčnaja łuchta, jakuju nie varta razhladać usurjoz».

Pry hetym Dziadok taksama suprać tatalnaj zabarony abortaŭ:

«Zakanadaŭčaja zabarona abortaŭ situacyju nie vyrašyć. Bo pry takich zakonach adbyvajecca nastupnaje: žančyny z dachodam vyšej siaredniaha jeduć u inšuju krainu i robiać tam abort. Z dachodam nižej siaredniaha — robiać kustarna, akramia zabojstva, jašče i psujučy sabie zdaroŭje.

Nieabchodnaja kompleksnaja praca, najpierš nad kaštoŭnaściami, jak žančyn hetak i mužčyn, kab pieraadoleć abort jak źjavu. Bo vializnaja kolkaść abortaŭ maje svajoj pryčynaj biezadkaznaść mužčyn u adnosinach. Ja razumieju mnohija arhumienty žančyn, jakija vystupajuć za svabodnyja, kolki zachočaš, aborty, adnak liču što nijakaja «składanaja žyćciovaja situacyja» nie daje tabie prava pazbaŭlać žyćcia inšuju čałaviečuju istotu».

Hetyja dopisy sabrali dziasiatki kamientaroŭ. Dziadku pisali, što varta ŭsio ž pakinuć prava vybaru žančynam, a kali nie chočacca iści na abort, zaŭždy jość kantracepcyja — naprykład, preziervatyvy ci vazektamija:

«Maru pra časy, kali mužčyny pierastanuć vykazvać svajo mierkavańnie pa pytańniach žančyn, jakija ich nie datyčacca».

«Idzicie ŭ navuku i pracujcie nad vynachodnictvam štučnaj matki, kudy možna budzie pierasadzić usie aborty. Tady «zabojstvaŭ» nie budzie».

«Čamu vy ličycie, što narmalna ŭ žančyny zabrać prava vybaru, nazvaŭšy jaho złačynstvam?».

Błohierka Jaŭhienija Suhak pakinuła zusim karotki kamientar: «Chto vy, nahadajcie».

U kamientary pryjšli nie tolki aburanyja žančyny, ale i mužčyny. Adzin z takich karystalnikaŭ napisaŭ:

«Kali hramadski dziejač piša, što jon nie padtrymlivaje zakanadaŭčuju zabaronu abortaŭ — heta značyć, što jon padtrymlivaje aborty i mahčymaść žančyn samim vyrašać, što ŭ jakoj situacyi rabić. A kali ty ŭžo nie jak hramadski dziejač pačynaješ dyskusiju, a ź fiłasofskaj ci relihijnaj nahody — heta ŭžo inšaja dyskusija ŭvohule. 

Što kiepska i što dobra — tut u kožnaha svoj pohlad, ale ŭ pieršuju čarhu zaŭsiody havorka pra ZAKANADAŬČUJU zabaronu. Vybar — jon taki: ci budzie vyrašać dziaržava, ci sam čałaviek».

Zhadali taksama zajavu Dziadka pra toje, što ŭ Biełarusi varta lehalizavać prastytucyju. Što rabić, kali padčas seks-pracy ŭźnikaje niepažadanaja ciažarnaść?

Adkaz Mikoły: «Tamu ja i za lehalizacyju, kab niežadanych ciažarnaściaŭ padčas seks-pracy nie było».

Vykazaŭsia i miedyjamieniedžar Maksim Paršuta: «Nielha zabaraniać aborty, bo abortaŭ naŭrad ci stanie mienš, ale dakładna jany stanuć pravodzicca va ŭmovach, bolš niebiaśpiečnych dla žančyn. Dy i ahułam dziŭna, što čałavieku zabaraniajuć rabić z saboj toje, čaho jana choča — heta navat u pieršuju čarhu».

«Nie dury hałavy. Kali asabista narodziš, tady budzieš suprać», — nie prajšoŭ mima Andrej Pavuk.

Padtrymali Dziadka tolki niekalki čałaviek.

Niekalki dzion tamu Dziadok apublikavaŭ u Threads jašče adno vykazvańnie, jakoje stała rezanansnym — toj post sabraŭ kala 250 kamientaroŭ:

«Biełaruś biez Łukašenki budzie najlepšaj krainaj u śviecie. U nas buduć lehalizavanyja adnapołyja šluby, marychuana, prastytucyja. Bieźviz ź Jeŭraźviazam, svaboda słova, vysokija zarobki, anime-fiestyvali. I heta budzie ŭžo zusim chutka».

• 3
• 1
• 5
• 22
• 0
• 0
• 0
• 0