Ptušynaja drama: čorny busieł užo 6 hadoŭ sprabuje znajści kampaniju siarod biełych
U ahraharadok Siakieryčy Kleckaha rajona čorny busieł prylataje kožny hod i ŭžo staŭ dla žycharoŭ rodnym, ale dla jaho samoha taki vybar aznačaje adzinotu. Historyju busła Smartpress.by raspavioŭ bijołah Siarhiej Šakała.
Bijołah naziraje za hetym čornym busłom šeść hadoŭ. Prylot čyrvonaknižnaj ptuški na ŭskrainu nasielenaha punkta byŭ dziŭnym, bo, u adroźnieńnie ad biełych, čornyja busły zvyčajna paźbiahajuć čałavieka i sielacca ŭ nieprałaznych lasnych huščarach na vysokich drevach.
Na ŭskrainie haradka pry hetym daŭno astalavalisia biełyja busły.
«Čamu jon tak imkniecca da ich, niezrazumieła, — kaža Siarhiej Šakała. — Mahčyma, jon niejkim čynam vyras siarod biełych busłoŭ i ličyć ich svajoj siamjoj».
Ptuška źjaŭlajecca ŭ Siakieryčach kožnuju viasnu, zajmaje «vartavy» słup praz darohu ad buślinaha hniazda, naziraje za svaimi biełymi rodzičami i biespaśpiachova sprabuje ź imi zblizicca.
«Hniazdo ŭ vioscy jon ni razu nie budavaŭ, tak i siadzić na słupie, dachach navakolnych damoŭ abo adlataje na vodanapornuju viežu, — raspaviadaje bijołah. — Viadoma, nie pastajanna: lataje karmicca na navakolnyja pali i vadajomy. Niekalki razoŭ jaho bačyli kala hniazda inšych busłoŭ u susiedniaj vioscy».
Družby pamiž rodnasnymi vidami pakul nie zdaryłasia. Biełyja chutčej ciarpiać «čornaha prylipału», u šlubny siezon jaho i zusim adhaniajuć dalej ad hniazda.
U minułym hodzie pavodle svajoj zvyčki čorny «izhoj» viasnoj znoŭ prylacieŭ u Siakieryčy. Praŭda, letam źjaŭlaŭsia tam nie časta.
Kamientary