Tramp zajaviŭ, što nie choča pieramirja ź Iranam, i znoŭ abrynuŭsia na sajuźnikaŭ pa NATA

Hetyja zajavy prahučali na fonie paviedamleńniaŭ amierykanskich ŚMI pra toje, što ZŠA adpraŭlajuć na Blizki Uschod dadatkovyja siły, što moža śviedčyć pra padrychtoŭku da naziemnaj apieracyi. Sam Tramp taki varyjant raniej vyklučaŭ, piša Bi-bi-si.

«Ja dumaju, my pieramahli», — zajaviŭ Tramp u razmovie z žurnalistami na hazonie kala Biełaha doma, stojačy razam ź dziaržsakratarom Marka Rubia.

«Ja nie chaču spynieńnia ahniu. Vy ž viedajecie, što nie zaklučajuć pahadnieńniaŭ ab spynieńni ahniu, kali vy litaralna źniščajecie praciŭnika», — dadaŭ jon, čarhovy raz paŭtaryŭšy, što ŭ Irana nie zastałosia ni fłotu, ni VPS, ni inšaj techniki, ni lidaraŭ.

Tym nie mienš Iran faktyčna zabłakavaŭ Armuzski praliŭ, što pryviało da rezkaha rostu suśvietnych cen na naftu, a ŭ Piersidskim zalivie sabrałasia mnostva handlovych sudnaŭ.

Raniej amierykanskija ŚMI, u tym liku NBC News, Wall Street Journal i Axios, paviedamlali, što ŭ rehijon nakiroŭvajucca padraździaleńni marskoj piachoty ZŠA na niekalkich karablach, a Bieły dom razhladaje mahčymaść adpraŭki na Blizki Uschod dadatkovych vojskaŭ.

U piatnicu vydańnie Axios taksama paviedamiła, što amierykanskaja administracyja razhladaje płany akupacyi abo błakady iranskaha vostrava Chark, praź jaki prachodzić 90% ekspartu iranskaj nafty. Heta, jak spadziajecca administracyja, dazvolić joj nacisnuć na Iran i prymusić jaho razbłakavać Armuzski praliŭ.

Raniej ZŠA nanieśli ŭdar pa vostravie, a Tramp padkreślivaŭ, što ŭdary nanosilisia pa vajennych abjektach, ale nie pa naftavaj infrastruktury. Iranskija ŭłady taksama zajaŭlali, što infrastruktura nie paciarpieła.

U piatnicu Tramp, adkazvajučy na prośbu karespandenta AFP prakamientavać hetyja paviedamleńni, skazaŭ: «U mianie moža być płan, a moža i nie być». Da hetaha Bieły dom paviedamiŭ ahienctvu, što ZŠA mohuć prosta «źniščyć» hety naftavy chab u luby momant, kali amierykanski lidar hetaha pažadaje.

Ranicaj u piatnicu Donald Tramp znoŭ abrynuŭsia z krytykaj na inšyja krainy NATA za toje, što sajuźniki nibyta nie prysłuchalisia da jaho prośby ab dapamozie ŭ zabieśpiačeńni biaśpieki Armuzskaha praliva.

«Biez ZŠA NATA — heta papiarovy tyhr! Jany nie chacieli ŭstupać u vajnu suprać Irana, jaki vałodaje jadziernaj zbrojaj. Ciapier hetaja vajna vyjhrana ŭ vajennym płanie, i dla ich heta praktyčna nie ŭjaŭlaje niebiaśpieki. Jany skardziacca na vysokija ceny na naftu, jakija im davodzicca płacić, ale nie chočuć dapamahčy adkryć Armuzski praliŭ […]. Im tak lohka heta zrabić, z takoj minimalnaj ryzykaj. BIAZDUŠNYJA, i my heta ZAPOMNIM!» — napisaŭ jon u svajoj sacsietcy Truth Social.

Praź niekalki hadzin paśla hetaj zajavy Brytanija abjaviła, što dazvoliła ZŠA vykarystoŭvać svaje bazy dla naniasieńnia ŭdaraŭ pa iranskich abjektach, jakija pahražajuć Armuzskamu pralivu.

Raniej Łondan dazvoliŭ amierykanskim vojskam vykarystoŭvać brytanskija bazy dla apieracyj pa praduchileńni zapusku Iranam rakiet, jakija mahli pahražać brytanskaj ułasnaści abo žyćciu brytanskich hramadzian, ale paśla piatničnaha pasiedžańnia było vyrašana dazvolić ZŠA karystacca brytanskimi bazami dla abarony sudnaŭ u Armuzskim pralivie.

Brytanija pa-raniejšamu nie budzie prymać niepasrednaha ŭdziełu va ŭdarach, a «pryncypy, jakija lažać u asnovie padychodu Vialikabrytanii da kanfliktu, zastajucca raniejšymi».

Tramp u razmovie z žurnalistami nazvaŭ reakcyju Łondana zapoźnienaj.

«Ščyra kažučy, ja byŭ krychu ździŭleny pavodzinami Vialikabrytanii — im treba było dziejničać značna chutčej», — skazaŭ Tramp, jaki raniej nieadnarazova krytykavaŭ brytanskaha premjer-ministra Kira Starmiera za niehatoŭnaść dapamahčy Vašynhtonu na rańnich etapach apieracyi.

Ministr zamiežnych spraŭ Irana Abas Arahčy, kamientujučy apošnija paviedamleńni, zajaviŭ, što Starmier «stavić pad pahrozu žyćci brytancaŭ» z-za rašeńnia pa bazach, i papiaredziŭ, što Iran «skarystajecca pravam na samaabaronu».

«Pieravažnaja bolšaść brytancaŭ nie chočuć udzielničać u vajnie Izraila i ZŠA suprać Irana. Ihnarujučy ŭłasny narod, spadar Starmier stavić pad pahrozu žyćci brytancaŭ, dazvalajučy vykarystoŭvać brytanskija bazy dla ahresii suprać Irana», — napisaŭ jon u sacsietcy X.

Raniej MZS Irana paviedamiŭ, što Arahčy pravioŭ telefonnuju razmovu z kiraŭnikom Foryn-ofisa Iviet Kupier, u chodzie jakoj zajaviŭ, što lubaja dapamoha, akazanaja Brytanijaj ZŠA, pryviadzie da eskałacyi.

• 0
• 0
• 1
• 1
• 1
• 0
• 0
• 0