Praz ukrainskija ŭdary pa rasijskich NPZ rezka ŭzraśli pastaŭki ŭ Rasiju bienzinu ź Biełarusi

Asabliva prykmietny rost adbyŭsia ŭ druhoj pałovie miesiaca: za niekalki dzion abjomy prodažaŭ amal u čatyry razy pieravysili pakazčyki papiaredniaha tydnia. Najbolš zapatrabavanymi stali marki AI-92 i AI-95, krychu mienš — AI-100.

Popyt na biełaruskaje paliva tłumačycca situacyjaj na rasijskim rynku. Tam uźnik niedachop bienzinu z-za niezapłanavanych ramontaŭ na šerahu naftapierapracoŭčych zavodaŭ, vyklikanych ukrainskimi ŭdarami pa rasijskaj vajskovaj infrastruktury. Taksama mieŭ upłyŭ siezonny rost spažyvańnia paliva napiaredadni leta. U takich umovach spažyŭcy hatovyja nabyvać paliva z-za miažy, navat kali jano kaštuje daražej.

Košt biełaruskaha bienzinu sapraŭdy zaŭvažna pieravyšaje košt rasijskaha. Pa stanie na 25 maja biełaruski AI-92 kaštavaŭ 96—97,5 tysiač rasijskich rubloŭ za tonu, AI-95 — 104,7 tysiačy rasijskich rubloŭ. U toj ža čas pa vynikach tarhoŭ 26 maja ceny AI-92 pa indeksie jeŭrapiejskaj častki Rasii na biržy vyraśli na 0,01%, da 67,44 tysiačy rasijskich rubloŭ za tonu, AI-95 — na 3,24%, da 74,95 tysiačy rasijskich rubloŭ za tonu. Aptovaja cana letniaha dyzielnaha paliva źniziłasia na 1,69%, da 66,16 tysiačy rasijskich rubloŭ za tonu.

Tym nie mienš, popyt na biełaruskaje paliva zachoŭvajecca, bo važnuju rolu tut adyhryvajuć nie tolki ceny, ale i faktyčnaja najaŭnaść paliva i chutkaść pastavak.

Ekśpierty adznačajuć, što ciapierašniaja schiema pastavak nie zusim efiektyŭnaja. Jana praduhledžvaje, što rasijskaja nafta adpraŭlajecca ŭ Biełaruś, tam pierapracoŭvajecca, a potym hatovy bienzin viartajecca nazad u Rasiju. Takaja madel pavialičvaje kančatkovy košt pradukcyi. Tamu, niahledziačy na rost pastavak, ich upłyŭ na ahulnuju situacyju abmiežavany.

Ahulnyja abjomy impartu ź Biełarusi zastajucca nievialikimi ŭ paraŭnańni z patrebami rasijskaha rynku, dzie štohod spažyvajecca kala 40 miljonaŭ ton bienzinu. Heta značyć, što biełaruskija pastaŭki mohuć tolki častkova zakryć łakalnyja prablemy, ale nie zdolnyja poŭnaściu kampiensavać niedachop.

Pry hetym situacyja ŭ Rasii pakul nie ličycca krytyčnaj. Jana nie takaja napružanaja, jak, naprykład, u kancy 2025 hoda, kali ceny na bienzin dasiahali rekordnych značeńniaŭ. Adnak ryzyki zastajucca. Častka rasijskich zavodaŭ usio jašče nie pracuje abo pracuje nie na poŭnuju mahutnaść, i kali popyt praciahnie raści, heta moža pryvieści da novych prablem.

Asabliva składana moža stać niezaležnym sietkam aŭtazapravak, jakija nie majuć ułasnaj pierapracoŭki. Jany ŭžo raspradajuć zapasy i ŭ budučyni mohuć być vymušanyja abo kuplać paliva pa niavyhadnych cenach, abo navat časova spyniać pracu. 

• 1
• 0
• 0
• 0
• 0
• 0
• 1
• 0