Navukoŭcy vyznačyli adnu detal, jakaja istotna pavyšaje ŭvahu da vašaha profilu ŭ dadatku dla znajomstvaŭ

Žurnalisty vydańnia źviartajuć uvahu na daśledavańnie izrailskaha psichołaha Huryt Birnbaum. Jana razam z kaleham vyvučała, jakija profili ŭ znajomstvach sapraŭdy vyklikajuć cikavaść.

Hipoteza daśledavańnia pryjšła z markietynhu. Tam daŭno viadoma: rekłama, jakaja vyklikaje emocyi i ŭciahvaje ŭ historyju, pracuje lepš za suchija fakty. Navukoŭcy vyrašyli pravieryć, ci dziejničaje toj ža pryncyp na rynku znajomstvaŭ — prastory, dzie ludziej časta ŭsprymajuć paviarchoŭna i aceńvajuć pa źniešnaści.

Jak pravodziłasia daśledavańnie

U troch ekśpierymientach udzielničali amal 600 čałaviek — prykładna paroŭnu mužčyn i žančyn. Usie jany spačatku stvarali ŭłasnyja profili, kab apynucca ŭ realistyčnaj situacyi, a paśla aceńvali čužyja. Asnoŭnaje, što cikaviła daśledčykaŭ, — heta ŭzrovień empatyi: nakolki ŭdzielniki adčuvali suviaź z čałaviekam za profilem.

U pieršym ekśpierymiencie 131 student pračytaŭ dźvie viersii vydumanaha profilu dla znajomstvaŭ. Abiedźvie ŭtrymlivali absalutna adnolkavuju infarmacyju. Adnak kali ŭ pieršym prosta pieraličvalisia chobi, prafiesija i vopyt padarožžaŭ, to ŭ druhim tyja ž fakty byli źviazany ŭ siužet z pačatkam, pavarotam i finałam.

Faktałahičny profil umoŭnaha «Dena» vyhladaŭ nastupnym čynam: «Majo žyćcio pačałosia ŭ śviecie mastactva. Jašče ŭ dziacinstvie ja navučyŭsia hrać na hitary. Maja pieršaja hitara była padarunkam ad dziaduli. Paśla škoły ja pajechaŭ ź siabrami ŭ Paŭdniovuju Amieryku. Heta padarožža było doŭhim i niezabyŭnym. Siońnia ja student-ekanamist i adnačasova pracuju ŭ śfiery vysokich technałohij. U volny čas ja biehaju truškom, a ŭ kancy dnia vypivaju kielich vina i hraju na hitary».

Profil «Dena» ŭ formie historyi: «Kolki ja siabie pamiataju, ja žyvu mastactvam. Moj dziadula vieryŭ, što muzyka złučaje ludziej, i ŭ siem hadoŭ padaryŭ mnie hitaru, jakaja stała nieadjemnaj častkaj mianie. Paśla škoły ja palacieŭ ź siabrami ŭ Paŭdniovuju Amieryku. Ščyryja razmovy ź miascovymi žycharami navučyli mianie canić toje, što sapraŭdy važna ŭ žyćci. U rešcie rešt mnie pryjšłosia vyrašać, ci zastavacca mnie ŭ mastactvie, ci abrać novy kirunak. Nie budu trymać vas u napruzie: siońnia ja student-ekanamist i pracuju ŭ śfiery vysokich technałohij. Ale nie chvalujciesia, hitara ŭsio jašče sa mnoj».

U druhim ekśpierymiencie z udziełam 130 čałaviek uvaha była źviernuta na zdymki. Adnoj hrupie pakazvali sieryju zdymkaŭ, jakija składalisia ŭ «dzień z žyćcia»: sport ranicaj, pryhatavańnie ježy ŭ abied, sustrečy ź siabrami viečaram. Fotazdymki byli źviazanyja pamiž saboj i napoŭnienyja kantekstam. Druhaja hrupa bačyła taho ž vydumanaha čałavieka, ale ŭ niejtralnych, nie źviazanych pamiž saboj situacyjach, naprykład, u parku ci na vulicy.

U trecim ekśpierymiencie (z udziełam 333 čałaviek) abjadnali tekst i vyjavy. Daśledčyki paraŭnoŭvali čatyry varyjanty: i tekst, i fota ŭ formie historyi; apaviadalny tolki tekst; tolki fota, abjadnanyja ŭ siužet; tekst i fota niejtralnyja i faktałahičnyja.

Vyniki

Ekśpierymienty pakazali: toj, chto čytaŭ ci bačyŭ historyju, adčuvaŭ bolš empatyi da čałavieka. I heta nadziejna pradkazvała, ci ŭźniknie ŭ kahości ramantyčnaja cikavaść. Spałučeńnie apaviadalnaha tekstu i apaviadalnych vyjaŭ stvarała samuju mocnuju emacyjnuju suviaź i najbolšuju cikavaść.

Daśledčyki apisvajuć empatyju jak vyrašalny psichałahičny miechanizm, emacyjny most pamiž usprymańniem čałavieka i žadańniem paznajomicca ź im. Jany nazyvajuć heta «naratyŭnaj transpartacyjaj» — adčuvańniem zanureńnia ŭ śviet inšaha čałavieka jašče da taho, jak vy abmianialisia choć adnym słovam.

U vypadku z druhim «Denam» uźnikaje adčuvańnie, što vy jaho ŭžo krychu viedajecie. Jaho mini-historyja stvaraje film u hałavie i robić toje, čaho nie moža zrabić pieralik faktaŭ: jana pieraadolvaje typovyja barjery anłajn-znajomstvaŭ — strach admovy, niedavier da čužych profilaŭ.

Dyk što rabić?

Što heta značyć dla ludziej, jakija šukajuć metč u Tinder, ci Zorki?

«Nas zachaplajuć historyi, ale svaje profili dla znajomstvaŭ my pišam jak śpisy pakupak», — kaža Birnbaum.

Pa słovach daśledčycy, nie rost ci ambicyi prymušajuć kahości zachaplacca inšym. Važna adčuć čałavieka za hetymi detalami, a heta niemahčyma, kali infarmacyja padadziena ŭ vyhladzie karotkich tezisaŭ.

Daśledčyki rekamiendujuć adyści ad šabłonu — tezisnaha pieraliku kštałtu źniešnaść, praca, chobi. Zamiest hetaha pasprabujcie vybudavać paśladoŭnuju historyju: čamu vy niečym zajmajeciesia, jak da hetaha pryjšli, što vas u hetym pryvablivaje. Navat u 150, 300 ci 500 znakach možna źmiaścić mini-historyi.

Nie prosta «lublu padarožničać», a — jak i čamu heta stała važnym. Nie prosta «hraju na hitary», a — adkul heta źjaviłasia ŭ vašym žyćci. Mienavita takija detali dazvalajuć vyjści za miežy standartnaha profilu.

Birnbaŭm bačyć u svaich vynikach taksama adkaz na prablemu, jakuju viedajuć mnohija: stomlenaść ad biaskoncaha svajpu. Kali ŭsie profili vyhladajuć adnolkava, ludzi pačynajuć usprymać adzin adnaho jak zamiennyja abjekty. Historyi ž viartajuć adčuvańnie, što pierad taboj žyvy čałaviek.

Praŭda, aŭtary zaŭvažajuć, što ich vyniki majuć abmiežavańni. U daśledavańni ŭdzielničali ŭ asnoŭnym maładyja studenty, pieravažna hieteraseksualnyja. Tamu nie fakt, što vyniki całkam pieranosiacca na inšyja ŭzrostavyja abo sacyjalnyja hrupy. Akramia taho, ekśpierymienty pravodzilisia nie ŭ realnych dadatkach, a ŭ zmadelavanych umovach. Taksama niezrazumieła, ci harantuje «historyja ŭ profili» bolš ščaślivyja praciahłyja adnosiny.

• 0
• 0
• 0
• 0
• 0
• 0
• 0
• 0