Skandał z maršrutkaj z Novaj Baravoj: maci nie dazvolili pravieźci dzicia na kaleniach biaspłatna. Chto maje racyju?

Situacyja adbyłasia na hetym tydni ŭ maršrutnym taksi №1152, jakoje idzie ad Novaj Baravoj da DS Łošyca-2 u Minsku, piša «Prystaličča». Žančyna zajšła ŭ transpart i skazała, što apłacić tolki svoj prajezd — dva rubli, a dzicia voźmie na kaleni. Kiroŭca admoviŭ. Jon abhruntavaŭ heta tym, što dzicia ŭžo vialikaje, pry hetym pryšpilicca ŭdvaich na adnym kreśle niemahčyma, i ŭ vypadku pravierki DAI heta budzie rasceniena jak parušeńnie.

Pavialičyć

Žančyna spytała, jak być z pasažyrami, jakija jeduć stojačy, vidać, namiakajučy, što takija situacyi jana ŭžo nazirała. Kiroŭca nazvaŭ hetaje pytańnie «abciakalnym».

Ček pasažyrka atrymała tolki pry vychadzie — pa patrabavańni, praz paŭhadziny paśla pasadki. Pry hetym jana zaŭvažyła, što bilety inšym pasažyram taksama nie vydavali.

Biaspłatny prajezd: što kaža zakon

Pavodle słoŭ namieśnika dyrektara — načalnika HP «Staličny transpart i suviaź» Andreja Iłaryjonava, prava biaspłatnaha prajezdu dla dziaciej da siami hadoŭ raspaŭsiudžvajecca tolki na transpart ahulnaha karystańnia — aŭtobusy, tralejbusy, tramvai.

Maršrutnyja taksi da hetaj katehoryi nie adnosiacca, tamu patrabavańnie kiroŭcy ab apłacie prajezdu za siamihadovaje dzicia absalutna pravamiernaje.

Admovu kiroŭcy pravozić dzicia na kaleniach śpiecyjalist źviazvaje ŭ pieršuju čarhu z zabieśpiačeńniem biaśpieki pasažyraŭ.

— Pry ekstremalnym tarmažeńni jość niebiaśpieka nie ŭtrymać dzicia ŭ rukach. Akramia taho, remień biaśpieki raźličany na adnaho čałavieka, a pryšpilicca ŭdvaich pa zakonie nielha. Heta abyvacielskaja zvyčka, jakaja moža rana ci pozna drenna skončycca, — tłumačyć Andrej Iłaryjonaŭ.

Što ž tyčycca pasažyraŭ, jakija jeduć stojačy, Andrej Iłaryjonaŭ adznačyŭ: takich być u sałonie nie pavinna.

— Prajezd stojačy ŭ aŭtamabilach katehoryi M2, da jakich jak razoŭ i adnosiacca maršrutnyja taksi, zabaronieny. Bolš za toje, jon navat nie praduhledžany vytvorcam transpartnych srodkaŭ. Kali jość taki fakt, kiroŭcu pahražaje štraf, — adznačyŭ namieśnik dyrektara pradpryjemstva.

Ci abaviazany kiroŭca vydavać čeki paśla apłaty pajezdki? U «Staličnym transparcie i suviazi» rastłumačyli, što kiroŭca abaviazany pradastavić kasavy ček pa fakcie pryjomu najaŭnych hrašovych srodkaŭ abo inšaha sposabu apłaty prajezdu. I ŭ hetym punkcie pretenzii pasažyrki abhruntavanyja.

• 1
• 0
• 0
• 0
• 0
• 0
• 0
• 0