Jak ciapier vyhladaje rynak «Ždanovičy», dzie idzie vialikaja budoŭla FOTY
U «Ždanovičach» pačałosia budaŭnictva adnaho z samych doŭhich mastoŭ Minska. Tochka.by pahladzieła, jak idzie budoŭla i što stała z handlovymi radami, i daviedałasia, što źmienicca dla vadzicielaŭ i pakupnikoŭ rynku ŭžo sioleta.
«Ždanovičy» siońnia nie tolki adzin z samych viadomych rynkaŭ krainy, ale i vialikaja budaŭničaja placoŭka.
Tam, dzie jašče niadaŭna handlavali adzieńniem i bytavymi drobiaziami, zaraz hrukoča technika, vyvoziać razabranyja paviljony i zabivajuć pieršyja pali jak padmurak budučaha puciepravoda.
Prajekt, pra jaki kazali nie adzin hod, narešcie pierajšoŭ u aktyŭnuju fazu realizacyi. Havorka idzie pra novy most, jaki prakładuć pa vulicy Kaleśnikava — ad Lucynskaj da Cimirazieva.
Puciepravod projdzie nad čyhunkaj i častkova nad terytoryjaj rynku. Dla Minska heta budzie adzin z samych bujnych transpartnych abjektaŭ za apošnija hady.
Jak byccam raźbirajuć pa kavałačkach
Pieršaje, što kidajecca ŭ vočy, — maštabny demantaž. Były rečavy rynak faktyčna źnik. Nie ŭvieś, viadoma, a jaho častka, ale vielmi prystojnaja.
Terytoryja abharodžana bietonnymi błokami, paŭsiul bačnyja hrudy śmiećcia, mietału, draŭlanyja karkasy, skrynki i niejkija reštki paviljonaŭ. Raboty iduć amal bieź pierapynku.
«Ja tut 15 hadoŭ pracavała i nie dumała, što adnojčy ŭsio heta źniasuć. Z adnaho boku, škada. Ź inšaha — kali darohi stanuć lepš, moža, i pravilna robiać», — kaža prachožaja, jakaja nazvałasia Natallaj.
Paralelna idzie padrychtoŭka da budaŭnictva novaj trasy. Uzdoŭž vulicy Kaleśnikava ŭžo vystavili aranžavyja achoŭnyja sietki, vyraŭnavali častku placoŭki, pracuje technika.
Navat u poźni viečarovy čas huduć ekskavatary, hruzaviki, mitusiacca rabočyja ŭ kaskach. Pryvieźli na placoŭku i palebojnyja ŭstanoŭki.
Rynak nie źnikaje — jon pierajazdžaje
Niahledziačy na maštabnyja źmieny, rynak nie zakryvajuć — jaho prosta pierajnačvajuć. Častka paviljonaŭ užo pierajechała: handlovyja punkty, jakija raniej znachodzilisia kala «Śvietu mody — 2», zaraz mieściacca bližej da «Śvietu mody — 1» i na asnoŭnaj terytoryi «Modnaha kvartała».
Zaabataničny rynak taksama źmianiŭ adras — jaho pieranieśli tudy, dzie raniej pradavali meblu.
«Spačatku naohuł ničoha niezrazumieła było, kudy iści. Zaraz užo razabralisia. Prakłali plity bietonnyja, kab zručna było abychodzić budoŭlu. Ščyra kažučy, padziemny pierachod pad čyhunačnymi puciami daŭno nadakučyŭ. Jon taki nizki, hałavu raźbić možna, i ciomny. Pa moście budzie zručniej chadzić. Čakajem, kali ŭžo skončać», — dzielicca Siarhiej, jaki žyvie na vulicy Kaleśnikava.
Jakim budzie novy puciepravod
Pa prajekcie, most stanie adnym z samych praciahłych u Minsku. Jaho daŭžynia pieravysić 380 m, a šyrynia składzie ad 41 da 48 m. Heta surjozny maštab navat pa minskich mierkach.
Na puciepravodzie praduhledziać pa try pałasy ruchu ŭ kožnym napramku. Prajeznuju častku adździelać ad tratuaraŭ žalezabietonnaj aharodžaj. Inžyniery abiacajuć, što kanstrukcyja budzie maksimalna «dalikatnaj» ŭ adnosinach da čyhunki i navakolnaj zabudovy — bieź lišniaha ŭmiašańnia ŭ infrastrukturu, što ŭžo isnuje.
Hałoŭnaja zadača — razhruzić transpartnyja patoki pamiž dvuma hustanasielenymi rajonami horada. Most pavinien zabiaśpiečyć zručny vyjezd u bok MKAD, Ždanovičaŭ i Zasłaŭja. Zaraz hetyja napramki časta stajać u zatorach, asabliva ŭ vychadnyja, kali rynak pryciahvaje tysiačy pakupnikoŭ.
Što budzie paśla budoŭli
Paśla zaviaršeńnia rabot terytoryja vakoł rynku prykmietna źmienicca. Vyzvalenyja ŭčastki płanujuć dobraŭparadkavać. Tut źjaviacca parkoŭki i handlovyja zony. Va ŭsiakim razie, tak abiacajuć.
Cikava, što prastoru pad novym mostam taksama nie chočuć pakidać pustoj. Jaje razhladajuć jak funkcyjanalnuju zonu. Tam mohuć źjavicca prachody, prajezdy i handlovyja punkty. Pa sutnaści, rynak častkova sydzie pad most.
Heta rašeńnie vyhladaje łahičnym: zachavać handlovuju aktyŭnaść i adnačasova ŭpisać jaje ŭ novuju transpartnuju infrastrukturu.
Žyćcio pobač z budoŭlaj
Dla žycharoŭ najbližejšych damoŭ, asabliva pa vulicy Kaleśnikava, budoŭla — štodzionnaja realnaść.
«Užo hrymiać tak, što budzilnik nie patrebny. Ale, kali ščyra, usie razumiejuć: heta časova. A moj muž naohuł ź nieciarpieńniem čakaje adkryćcia mosta. My tut žyviem 10 hadoŭ, i ŭsie hetyja hady časta staim u zatorach pry vyjeździe na MKAD. Hałoŭnaje, kab potym sapraŭdy stała zručniej. U lubym vypadku most tut daŭno patrebny byŭ»,— adznačaje miascovaja žycharka Volha.
Horad mianiajecca — i rynak taksama
Rynak, jaki doŭhija hady žyŭ pa svaich praviłach, ciapier padładžvajecca pad palepšanuju infrastrukturu. Chutka tut uźviaduć i sučasnyja paviljony.
Novy ž most pabudujuć chutka. Jaho abiacajuć adkryć da kanca 2026 hoda.
Kamientary