Biełarusy z dypłamatyčnymi pašpartami fihurujuć u hučnaj kryminalnaj spravie ŭ Turcyi

Prakuratura Ankary vydała ordary na zatrymańnie 43 čałaviek. 13 žniŭnia ŭ ramkach rasśledavańnia byli zatrymanyja 38 čałaviek, u tym liku sam Kuryš. Častka padazravanych znachodzicca za miežami Turcyi.

Padčas rasśledavańnia śledčyja źviarnuli ŭvahu na niekalki aŭtamabilaŭ, jakimi karystalisia ludzi z atačeńnia Kuryša. Pavodle tureckich ŚMI, try ź ich byli aficyjna zarehistravanyja na imia byłoha ministra ŭnutranych spraŭ Turcyi Idrysa Naima Šachina, paviedamlaje tureckaje vydańnie A Haber.

Adzin z hetych aŭtamabilaŭ, numar 34 S 7815, vykarystoŭvaŭsia dla pieravozki troch biełarusaŭ z dypłamatyčnymi pašpartami.

Pavodle materyjałaŭ spravy, biełarusy prybyli ŭ Turcyju praz aeraport Bodruma 6 žniŭnia. Sistema aŭtamatyčnaha raspaznavańnia numaroŭ zafiksavała ich 21 žniŭnia ŭ aŭtamabili, jaki ruchaŭsia pamiž kurortnymi rajonami Hiuvierdžynlik i Tarba.

Paźniej, pavodle viersii śledstva, biełarusaŭ pieravieźli ŭ Bursu, dzie ich pieradali ŭ inšy aŭtamabil. Paśla hetaha ich dastavili ŭ aeraport. 22 žniŭnia ŭsie troje vylecieli z Turcyi ŭ Minsk.

Śledčyja taksama vyśvietlili, što dźvie SIM-karty, jakimi, jak miarkujecca, karystalisia biełarusy, byli aktyvavanyja 4 žniŭnia na imia Amiera Judžela — čałavieka, źviazanaha ź fihurantami rasśledavańnia.

U spravie jość i bolš stary epizod, źviazany ź Biełaruśsiu. Jašče ŭ 2011 hodzie biznes-partnior Judžela Nievzat Biukium paviedamlaŭ tureckim uładam pra schiemu šantažu z vykarystańniem žančyn, pryviezienych ź Biełarusi. Pavodle materyjałaŭ rasśledavańnia, žančyn tajemna zdymali, a atrymanyja zapisy vykarystoŭvali dla cisku na ludziej i ŭpłyvu na vyniki tendaraŭ.

Pavodle tureckich ŚMI, śledstva ciapier vyvučaje mahčymuju suviaź pamiž hetaj staroj schiemaj i sučasnaj strukturaj arhanizacyi, u tym liku praź ludziej i aŭtamabili, jakija fihurujuć u spravie.

Pry hetym sama najaŭnaść troch biełarusaŭ u materyjałach rasśledavańnia nie aznačaje, što jany źjaŭlajucca padazravanymi abo abvinavačanymi. U apublikavanych materyjałach jany zhadvajucca pieradusim u suviazi ź ich pieramiaščeńniem i transpartam, jakim jany karystalisia.

Bodrum užo nie pieršy hod źjaŭlajecca miescam adpačynku pradstaŭnikoŭ atačeńnia Alaksandra Łukašenki. Dla pajezdak tudy vykarystoŭvajecca ŭ tym liku ŭradavy biznes-džet EW-301PJ. 21 žniŭnia hety samalot znachodziŭsia ŭ Dałamane, a zatym prybyŭ u Bodrum; na 24 žniŭnia byŭ zapłanavany jaho vylet u Minsk.

• 0
• 0
• 4
• 0
• 0
• 0
• 0
• 0