Як цяпер выглядае рынак «Ждановічы», дзе ідзе вялікая будоўля ФОТЫ
У «Ждановічах» пачалося будаўніцтва аднаго з самых доўгіх мастоў Мінска. Tochka.by паглядзела, як ідзе будоўля і што стала з гандлёвымі радамі, і даведалася, што зменіцца для вадзіцеляў і пакупнікоў рынку ўжо сёлета.
«Ждановічы» сёння не толькі адзін з самых вядомых рынкаў краіны, але і вялікая будаўнічая пляцоўка.
Там, дзе яшчэ нядаўна гандлявалі адзеннем і бытавымі дробязямі, зараз грукоча тэхніка, вывозяць разабраныя павільёны і забіваюць першыя палі як падмурак будучага пуцеправода.
Праект, пра які казалі не адзін год, нарэшце перайшоў у актыўную фазу рэалізацыі. Гаворка ідзе пра новы мост, які пракладуць па вуліцы Калеснікава — ад Люцынскай да Ціміразева.
Пуцеправод пройдзе над чыгункай і часткова над тэрыторыяй рынку. Для Мінска гэта будзе адзін з самых буйных транспартных аб'ектаў за апошнія гады.
Як быццам разбіраюць па кавалачках
Першае, што кідаецца ў вочы, — маштабны дэмантаж. Былы рэчавы рынак фактычна знік. Не ўвесь, вядома, а яго частка, але вельмі прыстойная.
Тэрыторыя абгароджана бетоннымі блокамі, паўсюль бачныя груды смецця, металу, драўляныя каркасы, скрынкі і нейкія рэшткі павільёнаў. Работы ідуць амаль без перапынку.
«Я тут 15 гадоў працавала і не думала, што аднойчы ўсё гэта знясуць. З аднаго боку, шкада. З іншага — калі дарогі стануць лепш, можа, і правільна робяць», — кажа прахожая, якая назвалася Наталляй.
Паралельна ідзе падрыхтоўка да будаўніцтва новай трасы. Уздоўж вуліцы Калеснікава ўжо выставілі аранжавыя ахоўныя сеткі, выраўнавалі частку пляцоўкі, працуе тэхніка.
Нават у позні вечаровы час гудуць экскаватары, грузавікі, мітусяцца рабочыя ў касках. Прывезлі на пляцоўку і палебойныя ўстаноўкі.
Рынак не знікае — ён пераязджае
Нягледзячы на маштабныя змены, рынак не закрываюць — яго проста перайначваюць. Частка павільёнаў ужо пераехала: гандлёвыя пункты, якія раней знаходзіліся каля «Свету моды — 2», зараз месцяцца бліжэй да «Свету моды — 1» і на асноўнай тэрыторыі «Моднага квартала».
Заабатанічны рынак таксама змяніў адрас — яго перанеслі туды, дзе раней прадавалі мэблю.
«Спачатку наогул нічога незразумела было, куды ісці. Зараз ужо разабраліся. Праклалі пліты бетонныя, каб зручна было абыходзіць будоўлю. Шчыра кажучы, падземны пераход пад чыгуначнымі пуцямі даўно надакучыў. Ён такі нізкі, галаву разбіць можна, і цёмны. Па мосце будзе зручней хадзіць. Чакаем, калі ўжо скончаць», — дзеліцца Сяргей, які жыве на вуліцы Калеснікава.
Якім будзе новы пуцеправод
Па праекце, мост стане адным з самых працяглых у Мінску. Яго даўжыня перавысіць 380 м, а шырыня складзе ад 41 да 48 м. Гэта сур'ёзны маштаб нават па мінскіх мерках.
На пуцеправодзе прадугледзяць па тры паласы руху ў кожным напрамку. Праезную частку аддзеляць ад тратуараў жалезабетоннай агароджай. Інжынеры абяцаюць, што канструкцыя будзе максімальна «далікатнай» ў адносінах да чыгункі і навакольнай забудовы — без лішняга ўмяшання ў інфраструктуру, што ўжо існуе.
Галоўная задача — разгрузіць транспартныя патокі паміж двума густанаселенымі раёнамі горада. Мост павінен забяспечыць зручны выезд у бок МКАД, Ждановічаў і Заслаўя. Зараз гэтыя напрамкі часта стаяць у заторах, асабліва ў выхадныя, калі рынак прыцягвае тысячы пакупнікоў.
Што будзе пасля будоўлі
Пасля завяршэння работ тэрыторыя вакол рынку прыкметна зменіцца. Вызваленыя ўчасткі плануюць добраўпарадкаваць. Тут з'явяцца паркоўкі і гандлёвыя зоны. Ва ўсякім разе, так абяцаюць.
Цікава, што прастору пад новым мостам таксама не хочуць пакідаць пустой. Яе разглядаюць як функцыянальную зону. Там могуць з'явіцца праходы, праезды і гандлёвыя пункты. Па сутнасці, рынак часткова сыдзе пад мост.
Гэта рашэнне выглядае лагічным: захаваць гандлёвую актыўнасць і адначасова ўпісаць яе ў новую транспартную інфраструктуру.
Жыццё побач з будоўляй
Для жыхароў найбліжэйшых дамоў, асабліва па вуліцы Калеснікава, будоўля — штодзённая рэальнасць.
«Ужо грымяць так, што будзільнік не патрэбны. Але, калі шчыра, усе разумеюць: гэта часова. А мой муж наогул з нецярпеннем чакае адкрыцця моста. Мы тут жывем 10 гадоў, і ўсе гэтыя гады часта стаім у заторах пры выездзе на МКАД. Галоўнае, каб потым сапраўды стала зручней. У любым выпадку мост тут даўно патрэбны быў»,— адзначае мясцовая жыхарка Вольга.
Горад мяняецца — і рынак таксама
Рынак, які доўгія гады жыў па сваіх правілах, цяпер падладжваецца пад палепшаную інфраструктуру. Хутка тут узвядуць і сучасныя павільёны.
Новы ж мост пабудуюць хутка. Яго абяцаюць адкрыць да канца 2026 года.
Цяпер чытаюць
Беларусь ужо не толькі пра палітвязняў. З чым Святлана Ціханоўская паехала на адзін з галоўных форумаў па бяспецы ў ЗША і што там рабіў Сяргей Ціханоўскі2121
Каментары