Paplečnik Alesia Bialackaha znachodziŭsia za kratami ź lipienia 2021 hoda. Jamu dali termin u dzieviać hadoŭ kałonii.
Valancin Stefanovič uvajšoŭ u lik tych palitviaźniaŭ, jakija byli vyzvalenyja 19 sakavika, paviedamiła «Viasna».
Siabra Rady «Viasny», vice-prezident Mižnarodnaj fiederacyi za pravy čałavieka (FIDH) Valancin Stefanovič byŭ zatrymany 14 lipienia 2021 hoda. U toj dzień siłaviki pryjšli ź pieratrusami nie tolki da jaho, ale i ŭ ofis «Viasny», a taksama da dziasiatkaŭ inšych aktyvistaŭ hramadzianskaj supolnaści pa ŭsioj krainie.
Sud pa «spravie Viasny» pačaŭsia tolki ŭ pačatku 2023 hoda. Razam sa Stefanovičam sudzili staršyniu arhanizacyi Alesia Bialackaha i kaardynatara kampanii «Pravaabaroncy za svabodnyja vybary» Uładzimira Łabkoviča. Jašče adnaho fihuranta, Źmitra Sałaŭjova, sudzili zavočna, bo jon znachodziŭsia za miažoj.
Suprać pravaabaroncy zaviali spravu pavodle č. 2 art. 243 Kryminalnaha kodeksa (uchileńnie ad vypłaty padatkaŭ u asabliva bujnym pamiery). Pavodle viersii abvinavačvańnia, pravaabaroncy ŭvozili ŭ Biełaruś hrošy dla dapamohi paciarpiełym ad represij i apłaty advakataŭ.
Praz hod utrymańnia pad vartaj sprava pa hetym artykule była spyniena, ale było pradjaŭlena novaje abvinavačańnie — pavodle č. 4 art. 228 (kantrabanda) i č. 2 art. 342 KK (finansavańnie hrupavych dziejańniaŭ, jakija hruba parušajuć hramadski paradak).
3 sakavika 2023‑ha Stefanoviču vynieśli prysud — 9 hadoŭ źniavoleńnia. Svajoj viny mužčyna nie pryznaŭ. Pakarańnie adbyvaŭ u mahiloŭskaj kałonii № 15. U śniežni 2023 hoda Valancin byŭ pieraviedzieny na paŭhoda ŭ pamiaškańnie kamiernaha typu (PKT) «za parušeńni». Na voli jaho čakali žonka i troje dziaciej.
Bialackaha i Łabkoviča vyzvalili pry dapamozie amierykanskich dypłamataŭ 13 śniežnia.
Valancin Stefanovič naradziŭsia ŭ 1972 hodzie ŭ Minsku. Skončyŭ siaredniuju škołu № 11. Paśla słužby ŭ vojsku z čyrvonym dypłomam skončyŭ jurydyčny fakultet Mižnarodnaha instytuta pracoŭnych i sacyjalnych adnosin, pracavaŭ jurystam na Minskim padšypnikavym zavodzie.
Jašče studentam jon udzielničaŭ u akcyjach Biełaruskaha narodnaha frontu, a ŭ 1994 hodzie byŭ naziralnikam ad BNF na pieršych prezidenckich vybarach u Biełarusi.
U 1996 hodzie Stefanovič staŭ suzasnavalnikam «Maładoha Frontu», u 1997 hodzie byŭ abrany sustaršynioj arhanizacyi, ale nieŭzabavie pakinuŭ jaje. U sakaviku 1997 hoda ŭpieršyniu byŭ zatrymany na akcyi pratestu i adbyŭ 5 sutak administracyjnaha aryštu.
U vieraśni 1998‑ha mužčyna dałučyŭsia da pravaabarončaj arhanizacyi «Viasna-96». Na toj momant jana była zarehistravana jak haradskoje hramadskaje abjadnańnie. Praz dva hady jon staŭ namieśnikam staršyni.
Vosieńniu 2011 hoda padatkovaja inśpiekcyja Partyzanskaha rajona aštrafavała Valancina Stefanoviča za niapoŭnuju vypłatu padatkaŭ. Padstavaj stali źviestki pra zamiežnyja bankaŭskija rachunki kiraŭnikoŭ «Viasny», jakija Litva pieradała aficyjnamu Minsku. Hetaja ž infarmacyja stała padstavaj dla abvinavačvańnia staršyni «Viasny» Alesia Bialackaha, jakoha tady asudzili na 4,5 hoda kałonii z kanfiskacyjaj majomaści.
14 lipienia 2021‑ha pavodle abvinavačvańnia va «ŭchileńni ad vypłaty padatkaŭ» Stefanovič apynuŭsia za kratami. Padčas znachodžańnia pad śledstvam u kastryčniku 2022 hoda mužčyna byŭ pieraabrany vice-prezidentam Mižnarodnaj fiederacyi za pravy čałavieka (FIDH).
Ciapier čytajuć
Viadučy STB Raman Pratasievič pabraŭsia šlubam trecim razam49
Kamientary