Što płanujecca?
Da druhoha čytańnia ŭ Pałacie pradstaŭnikoŭ rychtujecca prajekt zakona «Ab lizinhavaj dziejnaści».
Deputaty chočuć abmiežavać pierapłaty pa lizinhu: u zakonie prapišuć, kolki lizinhavaja arhanizacyja moža dadać zvyš koštu abjekta ŭ zaležnaści ad terminu zvyš abo da hoda.
«Na ŭzroŭni Nacbanka abmiažujuć štrafy za nievykanańnie abaviazacielstvaŭ, kab čałaviek nie trapiŭ u finansavuju kabału z praźmiernymi pieniami. Zakonaprajekt daje čas na vykanańnie abaviazacielstvaŭ u siłu žyćciovych abstavinaŭ.
Sproščany lizinh žylla i damoŭ na ziamli — raniej uźnikali pytańni z učastkam».
— raskazaŭ staršynia Pastajannaj kamisii Savieta Respubliki pa ekanomicy, biudžecie i finansach Raman Brodaŭ, piša BiełTA.
U zakonaprajekcie zamacavana źjaŭleńnie druhasnaha lizinhu.
«Heta kali pradmiet lizinhu nabyvajecca, pieradajecca lizinhaatrymalniku pa ŭmovach lizinhu, a zatym pa pahadnieńni abo ŭ vyniku abstavinaŭ viartajecca lizinhadaŭcu. U lizinhadaŭca ŭźnikaje pytańnie: što rabić z hetaj majomaściu? Bo jaho meta — nie vałodać joj, a prafinansavać ździełku i pieradać majomaść lizinhaatrymalniku.
Kali majomaść viartajecca, lizinhadaŭcu treba jaje realizavać. Z ulikam śpiecyfiki abstalavańnia abo techniki heta nie zaŭsiody prosta. Druhasny lizinh dazvalaje paŭtorna pieradać hetuju majomaść novamu lizinhaatrymalniku ŭ vałodańnie i karystańnie, u tym liku z mahčymaściu nastupnaha vykupu»,
— patłumačyŭ načalnik upraŭleńnia mietadałohii niabankaŭskich i inviestycyjnych apieracyj hałoŭnaha ŭpraŭleńnia rehulavańnia niekredytnych finansavych arhanizacyj i inviestycyjnych apieracyj Nacyjanalnaha banka Alaksandr Dziadkoŭ.
Što heta daść lizinhavym arhanizacyjam i lizinhaatrymalniku? Dla lizinhavych arhanizacyj heta zabiaśpiečyć finansavy składnik ich dziejnaści, to bok finansavańnie nabyćcia i pieradačy majomaści. Dla lizinhaatrymalnikaŭ — bolšaja hnutkaść.
Naprykład, u Jeŭropie vielmi papularny lizinh, jaki ŭ nas nazyvajecca apieratyŭnym.
«Jon zakančvajecca nie vykupam pradmieta lizinhu, a jaho viartańniem lizinhadaŭcu. Naprykład, usim chočacca mieć dobry aŭtamabil i abnaŭlać jaho pa miery vychadu novych madelaŭ. Adpaviedna, možna zaklučyć damovu ź lizinhavaj arhanizacyjaj: biznesmien zakazvaje aŭtamabil, lizinhavaja kampanija jaho nabyvaje i pieradaje ŭ lizinh na 2‑3 hady. Pa zaviaršeńni terminu stary aŭtamabil viartajecca lizinhadaŭcu, a klijent biare novy na tych ža ŭmovach. Viernuty aŭtamabil pieradajecca inšamu lizinhaatrymalniku pa značna mienšaj canie.
Cikavaść dla druhoha lizinhaatrymalnika ŭ tym, što lizinhavyja arhanizacyi jak ułaśniki stroha kantralujuć stan majomaści. Jany sočać za zachavanaściu, absłuhoŭvańniem i paradkam», — adznačyŭ Alaksandr Dziadkoŭ.
Taki instrumient dazvolić zabiaśpiečanym hramadzianam i pradpryjemstvam atrymlivać u lizinh novuju majomaść, a mienš zabiaśpiečanym — patrymanuju. U Kazachstanie, Kyrhyzstanie i Armienii druhasny lizinh zamacavany na ŭzroŭni zakonaŭ, vykarystoŭvajecca i ličycca normaj. Tamu ŭ Nacbanku nastajali: u Biełarusi jon taksama nieabchodny.
U zakonaprajekcie taksama praduhledžany paŭnamoctvy Nacbanka pa ŭstalavańni sistemy kiravańnia ryzykami ŭ lizinhavych arhanizacyjach.
Što jašče płanujuć?
Jość maksimalnyja pamiery pieravyšeńnia lizinhavych płaciažoŭ nad koštam pradmieta lizinhu — pa anałohii z abmiežavańniem stavak pa kredytach. Ciapier heta nie bolš za dva košty pradmieta lizinhu pa dahavorach zvyš hoda i nie bolš adnaho — pa dahavorach da hoda. Hetyja pamiery źbirajucca pamianšyć u dva razy: pieravyšeńnie nie pavinna być bolš za adzin košt pradmieta lizinhu pa dahavorach zvyš hoda i pałovy koštu — pa dahavorach da hoda.
Nacyjanalny bank atrymaje paŭnamoctvy vyznačać maksimalny pamier uznaharodžańnia pa dahavorach ź fizičnymi asobami.
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku16
Kamientary