Kampanija Stadler admoviłasia pastavić ciahniki Biełaruskaj čyhuncy
U šviejcarskaj kampanii Stadler abvierhli padpisańnie kantrakta z BČ, choć pieramovy pamiž imi sapraŭdy byli. Pra heta ŭ piśmovym kamientaryi vydańniu Office Life paviedamiŭ pradstaŭnik Stadler.
U kancy hetaha tydnia ŭ ŚMI źjaviłasia infarmacyja pra pastaŭku Stadler ciahnikoŭ mižrehijanalnych linij. Havaryłasia, što dla BČ pavinny pastavić 65 ciahnikoŭ, u tym liku 30 elektraciahnikoŭ i 35 dyziel-ciahnikoŭ.
Paśla ŭviadzieńnia sankcyj u 2022 hodzie na zavodzie «Štadler Minsk» u Fanipali spynili vytvorčaść sastavaŭ. Pry hetym šviejcarskaja kampanija praciahvaje zastavacca 100%-m ułaśnikam zavoda ŭ Biełarusi i padtrymlivaje jaho, kab adnavić pracu, jak tolki sankcyi buduć źniaty.
U kamientaryi Office Life pradstaŭnik kampanii padkreśliŭ, što «Stadler całkam vykonvaje sankcyi, uviedzienyja ŭ dačynieńni da Biełarusi. U vyniku sankcyj Stadler skaraciŭ vytvorčaść na svaim zavodzie ŭ Minsku da minimumu».
Taksama ŭ kampanii paćvierdzili, što pieramovy z BČ adbylisia, ale «BČ i Stadler nie padpisali kantrakt».
«Stadler uśviedamlaje, što ŭ ciapierašnich umovach ni pastaŭka ciahnikoŭ u Biełaruś, ni vytvorčaść ciahnikoŭ u Biełarusi nie dapuskajucca», — havorycca ŭ kamientaryi.
U vieraśni minułaha hoda ŭrad Biełarusi paviedamlaŭ, što na zavod «Štadler Minsk» mohuć pryjści inviestary z Rasii, adnak pakul pra kankretnyja kroki ŭ hetym napramku ničoha nie viadoma.
Stadler pracuje na biełaruskim rynku z 2014 hoda.
Ciapier čytajuć
«Ty ŭ nas u Biełarusi!» — «Ja mamu tvaju ja*aŭ». Hościu z Ałtaja nie spadabałasia zaŭvaha za kinuty ŭ centry Minska niedakurak27
Kamientary