Śpis biełaruskich čynoŭnikaŭ, jakim zabaronieny ŭjezd u krainy Eŭraźviazu

Rada Eŭrapiejskaha źviazu zaćvierdziła siońnia śpis biełaruskich čynoŭnikaŭ, adkaznych za ŭdzieł u falsyfikacyjach vynikaŭ prezydenckich vybaraŭ u Biełarusi, jakim zabaronieny ŭjezd na terytoryju Eŭraźviazu. U śpisie, niahledzčy na patrabavańni Polščy, Słavaččyny i Litvy jaho pašyryć, apynułasia 31 asoba na čale z Alaksandram Łukašenkam.

U rašeńni Rady Eŭrapiejskaha źviazu – vykanaŭčaha orhanu Eŭraźviazu, u jakuju, kali havorka idzie pra zamiežnuju palityku, ŭvachodziać ministry zamiežnych spravaŭ krainaŭ abjadnanaj Eŭropy, -- jašče raz padkreślivajecca, što minułyja prezydenckija vybary ŭ Biełarusi nie byli svabodnymi i demakratyčnymi.

Ministry asudzili ŭžyvańnie biełaruskimi ŭładami siły suprać udzielnikaŭ mirnych demanstracyjaŭ, aryšty biełarusaŭ i hramadzianaŭ krainaŭ Eŭraźviazu, a taksama zaklikali nieadkładna vyzvalić usich palitźniavolenych i spynić pieraśled za vykazvańnie hramadzianami ŭłasnych pohladaŭ.

«Majučy na ŭvazie apošnija padziei, Rada vyrašyła ŭvieści sankcyi ŭ dačynieńni da prezydenta Łukašenki, pradstaŭnikoŭ biełaruskaha kiraŭnictva, adkaznych za parušeńni mižnarodnych vybarčych standartaŭ i standartaŭ u halinie pravoŭ čałavieka, a taksama represii suprać hramadzianskaj supolnaści i demakratyčnaj apazycyi. Asoby, čyje imiony znachodziacca ŭ dałučanym śpisie, majuć zabaronu na ŭjezd na terytoryju krainaŭ Eŭraźviazu, suprać ich nia vyklučanyja taksama dalejšyja zachady», - havorycca ŭ zajavie Rady Eŭraźviazu.

U dakumencie adznačajecca, što śpis, u jaki, akramia Łukašenki, patrapili taksama Staršynia CVK Lidzija Jarmošyna, sakratar CVK Mikałaj Łazavik, ministar justycyi Viktar Hałavanaŭ, staršynia Biełteleradyjokampanii Alaksandar Zimoŭski dy inšyja, nie kančatkovy – śpis, jak i źmiest sankcyjaŭ mohuć mianiacca, kali ŭłady źmieniać vybarčaje zakanadaŭstva, vyzvalać palitźniavolenych, spyniać represii, buduć šanavać pravy hramadzianaŭ na svabodu słovaŭ i svabodu schodaŭ.

Zabarona na ŭjezd pačynaje dziejničać ad siońniašniaha dnia.

Miž tym niekalki krainaŭ, siarod jakich Polšča, Litva, Słavaččyna, damahalisia pašyreńnia śpisu biełaruskich čynoŭnikaŭ, jakim zabaronieny ŭjezd na terytoryju Eŭraźviazu i ŭviadzieńnia ekanamičnych sankcyjaŭ – pieradusim zamarožvańnia rachunkaŭ paplečnikaŭ Łukašenki ŭ eŭrapiejskich bankach.

Pradstaŭnik MZS Polščy Pavał Dabravolski zajaviŭ našamu radyjo, što Varšava i nadalej budzie damahacca hetaha.

(Dabravolski: ) «Naš, polski śpis biełaruskich čynoŭnikaŭ, jakim zabaronieny ŭjezd na terytoryju Polščy, šyrejšy. Ciapier tearetyčna tyja hramadzianie Biełarusi, jakich ŭ eŭraźviazaŭskim śpisie niama, a jość u našym, mohuć pralacieć nad našaj terytoryjaj, prykładam, u Niamieččynu, ale my spadziajemsia i budziem vieści takija razmovy, kab śpis Eŭraźviazu byŭ pašyrany».

Dyplamaty Eŭraźviazu ŭ budučym nie vyklučajuć pašyreńnia śpisu, a što da zamarožvańnia rachunkaŭ, dyk tut, jak paviedamiŭ našamu radyjo adzin z pradstaŭnikoŭ sakrataryjatu Rady, «byli techničnyja prablemy».

U svaju čarhu ŭ kamentarach polskich ekspertaŭ u mižnarodnych spravach hučyć peŭnaje ździŭleńnie pazycyjaj Eŭraźviazu. Havoryć były namieśnik ambasadara Polščy ŭ Biełarusi Marak Bućka.

(Bućka: ) «Eŭraźviaz čarhovy raz pakazaŭ, što niama nijakaj voli da rašučych zachadaŭ suprać režymu Łukašenki. Zabarona na ŭjezd dla 31 asoby – sankcyja symbaličnaja, jakaja asabliva režymu nie paškodzić, bo śpis zakarotki, a za im nie pajšli sankcyi ekanamičnyja – zamarožvańnie rachunkaŭ. Brusel zrabiŭ absalutny minimum – mienš prosta ŭžo nielha było. Prykładam Polšča vystupała za bolš rašučyja zachady, ale pierakanać inšych nie ŭdałosia.»

*******************************

Śpis biełaruskich čynoŭnikaŭ, adkaznych za ŭdzieł u falsyfikacyjach vynikaŭ prezydenckich vybaraŭ u Biełarusi, jakim zabaronieny ŭjezd na terytoryju Eŭraźviazu:

1. Alaksandr Łukašenka, prezydent

2. Hienadź Niavyhłas, kiraŭnik Administracyi prezydenta

3. Natalla Piatkievič, namieśnik kiraŭnika Administracyi prezydenta

4. Anatol Rubinaŭ, namieśnik kiraŭnika Administracyi prezydenta

5. Aleh Pralaskoŭski, načalnik idealahičnaj upravy Administracyi prezydenta

6. Alaksandr Radźkoŭ, ministar adukacyi

7. Uładzimier Rusakievič, ministar infarmacyi

8. Viktar Hałavanaŭ, ministar justycyi

9. Alaksandr Zimoŭski, staršynia Biełteleradyjokampanii

10. Ułazimier Kanaploŭ, śpikier Pałaty pradstaŭnikoŭ

11. Mikałaj Čarhiniec, deputat Savieta Respubliki

12. Siarhiej Kaścian, deputat Pałaty pradstaŭnikoŭ

13. Michaił Orda, deputat Pałaty pradstaŭnikoŭ

14. Mikałaj Łazavik, sakratar CVK

15. Piotar Mikłaševič, Hieneralny prakuror

16. Aleh Śližeŭski, načalnik upravy hramadzkich abjadnańniaŭ Ministerstva justycyi

17. Alaksandr Charyton, hałoŭny specyjalist upravy hramadzkich abjadnańniaŭ Ministerstva justycyi

18. Jaŭhien Śmirnoŭ, namieśnik staršyni Vyšejšaha haspadarčaha sudu

19. Nadzieja Reŭckaja, sudździa Maskoŭskaha sudu Miensku

20. Mikałaj Trubnikaŭ – sudździa Partyzanskaha suda Miensku

21. Mikałaj Kupryjanaŭ – namieśnik hieneralnaha prakurora

22. Ściapan Sucharenka – staršynia KDB

23. Vasil Dziemianciej – namieśnik staršyni KDB

24. Leanid Kozik – staršynia Federacyi prafsajuzaŭ Biełarusi

25. Alaksandar Kalada – siabra CVK

26. Mikałaj Usaŭ – siabra CVK

27. Leanid Łučyna – siabra CVK

28. Taćciana Kraŭčanka – siabra CVK

29. Uładzimier Kurłovič – siabra CVK

30. Mikałaj Miacielica – siabra CVK

31. Michaił Piščulonak – siabra CVK

**********************

Varta nahadać, što šeść čynoŭnikaŭ užo znachodzilisia ŭ śpisie JEZ. U vieraśni 2004 hoda Jeŭraźviaz pryniaŭ rašeńnie ab zabaronie vydačy viz padazronym u prynaležnaści da źniknieńniaŭ apazycyjnych palitykaŭ u 1999-2000 hadach - ciapierašniamu ministru ŭnutranych spraŭ Uładzimiru Navumavu; ciapierašniamu dziaržaŭnamu sakrataru Savieta biaśpieki Viktaru Šejmanu, jaki zajmaŭ pasadu kiraŭnika Administracyi prezydenta; Juryju Sivakovu, jaki ŭ peryjad źniknieńnia palitykaŭ zajmaŭ pasadu ministra ŭnutranych spraŭ, i kamandziru bryhady specnaza ŭnutranych vojskaŭ MUS Dźmitryju Paŭličenku. Da rašeńnia Eŭraźviazu dałučylisia ZŠA. U śniežni 2004 hoda, paśla parlamenckich vybaraŭ i referendumu, śpis byŭ pašyrany za košt kiraŭnika CVK Lidzii Jarmošynaj i načalnika minskaha AMAPa Juryja Padabieda. ZŠA dałučylisia i da hetaha śpisu.

Radyjo Svaboda

• 0
• 0
• 0
• 0
• 0
• 0
• 0
• 0