Bar dla svaich u domie pad znos pad Ždanovičami FOTY
Barnaja stojka, staryja kanapy i tajemny pakoj — mienskaja kamanda bmx-eraŭ zrabiła «bar dla svaich».
Prajekt zabudovy ŭžo isnuje i pavinien być zdadzieny niedzie da 2030 hoda. Žycharam dali kvatery niepadalok, ale sam dom pakul staić, i kali jaho nasamreč razbambiać – nieviadoma. Tamu Uład vyrašyŭ padaravać «siamiejnamu ačahu» novaje žyćcio. Jon ź siabrami zrabiŭ tut bar dla svaich ź vialikaj kolkaściu čyłaŭt-zonaŭ i achryściŭ jaho BUZZIT bar'am (pa naźvie svajoj kamandy bmx i mtb ravarystaŭ).
«Atrymałasia miesca, kudy kožny z našych siabroŭ moža pryjści i znajści sabie spravu na svoj hust paśla pracoŭnaha dnia», – kaža Uład.
Uład i jaho siabry prafiesijna katajucca na rovarach bmx i mtb, tamu na ziamielnym učastku (zusim niemaleńkim, darečy) zamiest aharoda pieršaj spravaj vykapali puł dla trenirovak: «Na toje, kab puł adpaviadaŭ usim našym patrabavańniam, syšło dva miesiacy: treba było vykapać, utrambavać i raskatać jaho jak maje być. Ciapier tut pryjemna jeździć – na ziamlu miakčej padać, čym na bieton, zrazumieła».
Kab usio było «na styli», fasad doma było vyrašana rasfarbavać – ciapier na im hrafici, jakoje pakryvaje ścianu razam z voknami.
Svajo hniaździečka chłopcy pačali rabić try miesiacy tamu. Naohuł amal usio tut zroblena z chłamu: niešta paznachodzili na forumach kštałtu «addam daram», niešta atrymałasia adšukać na haryščy, toje-sioje ź interjeru pryciahnuli siabry. Takim čynam, uvieś ramont kaštavaŭ chłopcam $ 100 – stolki jany patracili na toje, kab prydbać farbu. Uvajšoŭšy ŭ BUZZIT bar, apynaješsia niby ŭ andehraŭndnaj jeŭrapiejskaj barčele – pryjemnaje śviatło, jakoje daje čyrvonaja lampa dla fota (baćka Ułada raniej zajmaŭsia fatahrafijaj), barnaja stojka i palicy, zroblenyja sa starych skiejtbordaŭ.
Z kałonak hučna hraje miascovy chip-chopčyk, a ŭ stakany ciače svojskaje vino. «My tut nie žyviom, tolki tusim dy adpačyvajem, – raspaviadaje Uład. – Tut niama vannaha pakoju, prybiralnia na vulicy, vadu biarom z kałonki. Zrazumieła, heta ŭsio było, ale ž było pryniataje rašeńnie źnieści ŭsio lišniaje – tady barnaja stojka atrymlivałasia bolšaj, a heta ŭ našym vypadku było bolš pryjarytetna».
Jašče adzin pakoj adyšoŭ pad toje, kab zrabić idealnaje miesca dla čyłu. Staryja fateli savieckich časoŭ tut nabyvajuć novy šarm, a pamiery pakoja pry žadańni navat dazvalajuć zładzić nievialičkuju dyskateku: «Heta amal adzinaje niedaroblenaje pamiaškańnie. Płanujem i tut pryładzić palicy, prynieści kałonki i naładzić suviaź z tym, što hraje ŭ bary».
Pamiž barnych pamiaškańniaŭ jość maleńki pakoj: kanapa, pijanina i šafa. Zdajecca, ničoha cikavaha, ale, jak u kino, mienavita takija nieprykmietnyja maleńkija pakoi zachoŭvajuć vialikija tajamnicy. Uładalnik bara rasčyniaje dźviery šafy, pichaje ścianu i praz prajom bačnaja jašče adna častka doma. Sapraŭdnyja dźviery ŭ Narniju!
«Heta dyrektarski kabiniet, – tłumačyć Uład. – Tut my razam z maimi najlepšymi siabrami vyrašajem roznyja pytańni. Ci hulajem u UNO». Sakretnaje pamiaškańnie navat maje kamieru nad uvachodam i ekran pierad vačyma «dyrektaraŭ», kab bačyć, što adbyvajecca zvonku.
Uładalniki ŭtulnaha miesca spadziajucca, što dom jašče prastaić niekalki hadoŭ. U płanach inicyjatyŭnych chłopcaŭ – zrabić hukaizalavany pakoj, kab mieć repietycyjnuju kropku dla znajomych muzykaŭ.
Kamientary