Nie nasicie hetych hadzińnikaŭ z kaściumam! Praviły vybaru mužčynskich hadzińnikaŭ 

The Wall Street Journal sabraŭ asnoŭnyja praviły dobraha tonu, jakija datyčać hadzińnikaŭ. Jany dapamohuć vam razabracca, što hladzicca kruta, što padkreślivaje status, a što prosta ŭsprymajecca jak pycha. A čaho prosta nielha nasić z kaściumam.

1. Kali apranajecie kaścium, vybirajcie strymany hadzińnik

Tonki, ścipły kłasičny hadzińnik — najlepšy spadarožnik dla kaściuma. U centry ŭvahi pavinna być tkanina, a ŭsio astatniaje — «fonavy supravadžalny huk», kaža Denieł Hrynvud (Daniel Greenwood), 39 hadoŭ, dyrektar roźničnaha adździeła ŭ ZŠA brenda mužčynskaj mody The Armoury.

Džastyn Chast (Justin Hast), 36 hadoŭ, łondanski žurnalist i suzasnavalnik London Watch Week, nazyvaje Lange 1 ad A. Lange & Söhne (ad $47,000) vybaram znaŭcaŭ: «Jon niby šeptam padkreślivaje svoj kłas».

Jon taksama chvalić paduškapadobny American 1921 ad Vacheron Constantin (ad $35,100) i pramavuholny Reverso Tribute ad Jaeger-LeCoultre (ad $8,900). (Kali treba nie takaja darahaja pramavuholnaja pierlina — pasprabujcie DolceVita ad Longines za $1,850.)

Spałučeńnie kłasičnaha hadzińnika z kaściumam demanstruje viedańnie historyi hadzińnikavaj spravy.

Hruvastkija dajviery (pryznačanyja dla padvodnaha vykarystańnia) i spartyŭnyja chranohrafy (z funkcyjaj siekundamiera) pieršapačatkova byli raspracavanyja dla aktyŭnaha adpačynku, a nie pad harnitur. Tamu, skažam, kali nabližany da Alaksandra Łukašenki Dźmitryj Baskaŭ nosić pad čorny kaścium Skeleton Chronograph z žoŭtaha zołata ad šviejcarskaha brenda ChronoSwiss Opus, heta vyhladaje demanstratyŭna. Ale całkam u styli hetaha čałavieka.

Pavialičyć

«Kali ja ŭ kaściumie, ja nie nadziavaju svajho Rolex-dajviera, — kaža Filip Chury (Philip Khoury), 36 hadoŭ, vykanaŭčy dyrektar turahienctva ŭ Kanektykucie i saŭładalnik hadzińnikavaha biźniesu, — Heta vyhladaje jak unutranaja supiarečnaść. Vy ž nie Džejms Bond, vy ž nie skačacie ŭ akijan u smokinhu».

2. Pakińcie Apple Watch dla ranišniaj prabiežki

Nichto nie admaŭlaje, što Apple Watch — heta šmatfunkcyjanalny technałahičny instrumient. Ale ŭ spałučeńni z kaściumam ci pidžakom jon vyhladaje absalutna niedarečna.

«Heta maleńki kampjutar, a nie hadzińnik», — miarkuje Hrynvud, nazvaŭšy našeńnie jaho z aficyjnym strojem «vialikaj pamyłkaj». (Heta datyčyć faktyčna ŭsich smart-hadzińnikaŭ.)

Pavialičyć

3. Nie haniciesia za pamieram

Paśla taho jak vialikija madeli daminavali na mužčynskim rynku bolšuju častku 2010-ch, apošnija piać hadoŭ nazirajecca tendencyja da pamianšeńnia. «Maleńkija hadzińniki stanoviacca ŭsio bolš modnymi. Ja heta baču pa tym, jak moładź kuplaje», — kaža Adam Viktar (Adam Victor), kalekcyjanier i pradaviec vintažnych hadzińnikaŭ u Ńju-Jorku.

Heta datyčyć mnohich paŭsiadzionnych hadzińnikaŭ — ale asabliva kłasičnych. Siarod pieravah: maleńki hadzińnik lahčej źmiaščajecca pad abšyŭkaj kašuli.

Pavialičyć

«Nie treba, kab usio źbirałasia ŭ kamiak na ruce z-za vializnaha hadzińnika», — kaža Viktar.

Jakija pamiery?

• Dla spartovych madelaŭ šukajcie dyjamietr korpusa kala 41 mm i mienšy.

• Dla kłasičnych madelaŭ Hrynvud addaje pieravahu 36 mm i mienšamu.

• Chury ličyć, što kali kłasičny hadzińnik pieravyšaje 38 mm, jaho praporcyi pačynajuć vyhladać dziŭna, asabliva kali na cyfierbłacie tolki try strełki, bo «tam zanadta šmat pustoj prastory». Z druhoha boku, jon nie apuskajecca nižej za 30 mm: «Nižej hetaha vy ŭvachodzicie na terytoryju žanočych hadzińnikaŭ. Mnohija mužčyny nosiać žanočyja madeli, ale dla mianie heta čyrvonaja linija».

Pavialičyć

Nie abapirajciesia tolki na pamiery, padkreśliŭ Chast, bo hadzińniki vyhladajuć pa-roznamu ŭ zaležnaści ad pamieru zapiaścia. Važnyja i inšyja faktary — naprykład, daŭžynia «vušak» korpusa.

«Vuški nie pavinny vystupać za šyryniu zapiaścia», — skazaŭ Chast. «Kali sumniavajeciesia, biarycie mienšaje».

Jašče adna jaho «balučaja tema» — heta svabodnyja ramieńčyki. «Ja nie lublu, kali hadzińnik apuskajecca nižej kostki zapiaścia, kali jon upirajecca ŭ vierchniuju častku dałoni. Heta mianie žudasna razdražniaje».

Pavialičyć

4. Nie na pracy vybirajcie praktyčnaść

Kali vy nie ŭ kaściumie ci pinžaku, addajcie pieravahu bolš spartyŭnym madelam i «instrumientalnym» hadzińnikam — GMT, dajvieram, chranohrafam, jakija bolš paŭsiadzionnyja.

Chury nosić ich «z džynsami i poła, abo z čynasami i kašulaj na huzikach».

Kali jon apranaje niešta niefarmalnaje, Hrynvud addaje pieravahu svajmu Omega Speedmaster — chranohrafu «biez vykrutasaŭ» z čornym cyfierbłatam. Kali robicie niešta na adkrytym pavietry, abiarycie praktyčny hadzińnik. Darahaja, niepraktyčnaja madel — zanadta vialikaja ci dalikatnaja — budzie vyhladać niedarečna.

«Hulać u holf u vialikim hadzińniku prosta niazručna», — kaža Džastyn Uokier (Justin Walker), 51 hod, pradprymalnik i kalekcyjanier hadzińnikaŭ z Denviera. «Vy robicie heta demanstratyŭna, i ŭ takim vypadku vy zanadta starajeciesia».

Vybierycie pryvabnuju madel siaredniaha pamieru.

Chast, naprykład, maje 38-mm hadzińnik u śvietła-zialonym kolery ź nieonavymi žoŭtymi akcentami ad Blok, łas-andželeskaha brenda, jaki pačaŭ ź dziciačych madelaŭ, ale ciapier vypuskaje jarkija darosłyja varyjanty koštam mienšym za $450. Jon moža nasić jaho «u basiejnie na adpačynku ci jedučy na rovary ŭ horad. Heta vydatnaja nahoda dla razmovy. Heta viesieła».

Pavialičyć

5. Nie ihnarujcie ramieńčykaŭ

Chast «ciarpieć nie moža» ramieńčyki, jakija bolšaść brendaŭ prapanujuć razam z hadzińnikami. «Heta jak stary dziedaŭ ramieńčyk na cudoŭnym hadzińniku. Jany časta toŭstyja i nievytančanyja». Tamu, kali jon kuplaje novy hadzińnik, amal zaŭsiody adrazu zamianiaje ramieńčyk.

Jon rekamienduje japonskuju majsterniu Atelier Tamago, dzie robiać vydatnyja zamšavyja i ź ziernistaj cialačaj skury ramieńčyki ad $130.

Heta lohka i niadoraha moža źmianić nastroj hadzińnika. Žoŭtaje zołata ź mietaličnym branzaletam moža vyhladać zanadta pychliva, adznačaje Viktar — zamianicie jaho na skurany ci zamšavy ramieńčyk, i vobraz stanie bolš strymanym. Naadvarot, kalarovyja ramieńčyki mohuć ažyvić cichuju madel.

Apošniaje praviła: «Paźbiahajcie dajvieraŭ na NATO-ramieńčykach», — kaža Hrynvud, majučy na ŭvazie tryvałaje niejłonavaje macavańnie, pieršapačatkova raspracavanaje dla vajskoŭcaŭ. «Heta zanadta vidavočna».

Pavialičyć

6. Chočacie maksimum bałaŭ ad znaŭcaŭ — vybirajcie nišavyja abo ŭžyvanyja madeli

Kali vy chočacie hadzińnik, jaki padkreślić vaš status insajdara i maje dušu, kuplajcie abo na druhasnym rynku, abo ŭ nievialikich niezaležnych brendaŭ.

Kali heta staraja madel, skazaŭ Viktar, «małaimavierna, što vy sustreniecie čałavieka z takim ža hadzińnikam».

Dla jaho supierstylovy, ale ścipły varyjant — heta Rolex Day-Date u płacinie, 36 mm, z 1990-ch abo pačatku 2000-ch. Inšy jaho favaryt — stalovy Rolex Daytona z 1990-ch hadoŭ i paźniej. Košt: ad $35,000 za pieršy i ad $17,000 da $30,000 za druhi.

Novyja hadzińniki niekatorych małych brendaŭ taksama dadajuć prestyžu.

«Siońnia sapraŭdy cikavyja rečy stvarajuć hetyja majstry, imiony jakich stajać na cyfierbłacie», — upeŭnieny Chast.

Aŭtarskija hadzińniki F.P.Journe, Simon Brette i Sylvain Berneron vyrablajucca tysiačami ci navat sotniami štuk u hod. Jany kaštujuć dziasiatki tysiač dołaraŭ jak minimum.

Najbolš žadanyja madeli? Vytančana azdoblenyja tvory bratoŭ Rekšepa i Dževdeta Rekšepi, što žyvuć u Šviejcaryi. «Heta jak niešta z razradu «niedasiažnaha», — kaža Chury. «Ich praktyčna niemahčyma dastać».

7. Viedajcie svaju aŭdytoryju

Adnak, kolki ludziej u vašym kole paznaje Xhevdet Rexhepi? Jak adznačyŭ Uokier: «Vy nie demanstrujecie nijakaha statusu, kali nichto nie viedaje, što heta. U vas moža być $300,000 na rukach u vyhladzie niezaležnaha hadzińnika, ale susied padumaje, što jon nie lepšy za toj, što vy kupili ŭ Target».

Viadoma, možna nasić darahi hadzińnik prosta dla siabie, ale kali vy chočacie pakazać status, a pobač niama amataraŭ hadzińnikaŭ, mahčyma, varta prapuścić nišavyja brendy.

Zaŭsiody ŭličvajcie situacyju. Peŭnyja paznavalnyja, vielmi darahija madeli mohuć padać niapravilny sihnał. Zvalniajecie ludziej? A ŭ samich na ruce hihancki Richard Mille za $350,000?

Jak skazaŭ Uokier, jaki vałodaje «šaściznačnym» Patek Philippe:

«Dla dziełavoj sustrečy — ci chaču, kab mianie zapomnili jak «taho čałavieka, u jakoha hadzińnik za $100,000?» Napeŭna, nie».

Jon pakidaje jaho dla asablivych vypadkaŭ. Na sustrečy jon nadziavaje Rolex u dyjapazonie $10,000—$20,000 — naprykład, stalny Submariner, Sky-Dweller abo Cosmograph Daytona. Usie try «pakazvajuć, što vy paśpiachovy i dastatkova razumiejeciesia ŭ hadzińnikach, ale pry hetym nie starajeciesia zasłanić saboj usich u pakoi».

Prytrymlivajučysia hetych paradaŭ, vy zmožacie vybirać madeli, što padkreślivajuć status, i paźbiahać stylovych pamyłak.

• 8
• 1
• 3
• 14
• 1
• 1
• 0
• 0