«Дрэва напалову бус зламала». Сталі вядомыя новыя падрабязнасці трагічнага здарэння з беларускімі турыстамі ў Грузіі
Беларус, які стаў выпадковым відавочцам жудаснай аварыі, у якую трапіў мікрааўтобус з беларускімі турыстамі ў Грузіі, расказаў падрабязнасці таго, што ён бачыў, у Threads.
«Пры мне 4 хуткія прыехалі ды ратавальнікі, выцягнулі дзяцей і далі ім абязбольвальныя ды вады.
Дэталёва і сам аглядзеў месца аварыі, запытаўся ў знаёмага кіроўцы і яшчэ аднаго сведкі ДТЗ. Казалі, што перагрэліся тармазы, яны сталі мяккімі, і бус пакаціўся з вялікай хуткасцю на павароце. Перакуліўся бус ды выляцеў за агароджу і моцна дахам ляснуўся аб дрэва.
Дрэва напалову бус зламала, частка людзей выляцела праз вокны ў абрыў, а частку людзей разламаным напалову бусам моцна заціснула між сабою, і яны павіслі ў крыві, загінулі імгненна.
Таксама некалькі чалавек крычалі ад болю, іх заціснула зверху, выцягвалі ратавальнікі.
Здарылася гэта ўжо амаль у самым нізе дарогі з Гоміс Мта да Азургеці. А мы туды з сябрамі, наадварот, падымаліся, каб неба паздымаць з вышыні.
Казалі яшчэ пазней, што кіроўца выскачыў з буса перад самым ДТЗ. І быў цэлы бус з беларусамі…
Сам па сабе дзень быў жахлівы: мы пабачылі ажно 4 ДТЗ ад самога Батумі, дзе хтосьці заляцеў на капот, грузавік, што ляснуўся ў дрэва, згарэлую фуру і да гэтага жахлівага ДТЗ у гарах», — напісаў відавочца трагедыі.
Дарожна-транспартнае здарэнне з удзелам мікрааўтобуса, які перавозіў грамадзян Беларусі, адбылося 12 жніўня ў грузінскім рэгіёне Гурыя.
У мікрааўтобусе знаходзіліся 19 грамадзян Беларусі. Чатыры чалавекі загінулі, 15 атрымалі траўмы рознай ступені цяжкасці. Сярод пацярпелых — шасцёра непаўналетніх.
Бяляцкі: Не трэба спяшацца адмяняць санкцыі. Бо гэта будзе ўспрынята рэжымам як яго перамога і слабасць Еўропы15
Каментары