Можа і добра было б, каб мужчыны рабілі гэта 20 разоў на месяц

Працяглае сэксуальнае ўстрыманне можа адбівацца на мужчынскім арганізме не найлепшым чынам. Медыкі абмяркоўваюць магчымыя наступствы — ад зніжэння ўзроўню тэстастэрону да пагаршэння эрэкцыі і змен у тканках палавога органа. На гэтым фоне ўсё больш даследаванняў прысвячаецца таму, ці могуць рэгулярныя семявывяржэнні (незалежна ад таго, адбываюцца яны падчас сэксу ў пары або пры мастурбацыі) мець ахоўны эфект для здароўя.

Асаблівую вядомасць набыло маштабнае даследаванне Гарвардскага ўніверсітэта, у якім больш за 30 тысяч мужчын назіраліся на працягу амаль 40 гадоў. Навукоўцы параўноўвалі інфармацыю пра іх сэксуальнае жыццё і выпадкі развіцця раку прастаты.

У выніку высветлілася, што ў мужчын, якія ў 20—25 гадоў мелі 21 эякуляцыю на месяц і больш, рызыка раку прастаты была на 19% ніжэйшай, чым у тых, хто ў той жа перыяд эякуляваў не часцей за сем разоў на месяц.

Выданне Fitbook распытала ўролага, доктара медыцыны Крыстафа Піса, як варта ацэньваць гэтыя даныя.

Эксперт падкрэслівае: гаворка ідзе пра статыстычную сувязь, а не пра канчаткова даказаную прычынна-выніковую залежнасць. Інакш кажучы, нельга адназначна сцвярджаць, што менавіта частыя аргазмы абараняюць ад раку.

Магчыма, на вынік уплываюць іншыя фактары — агульны лад жыцця, гарманальны фон або псіхалагічны стан тых людзей, якія схільныя да большай сэксуальнай актыўнасці.

Адна з галоўных гіпотэз тлумачыць магчымы эфект тым, што падчас рэгулярных семявывяржэнняў прастата часцей «ачышчаецца». Мяркуецца, што патэнцыйна шкодныя рэчывы не затрымліваюцца ў ёй надоўга, а выводзяцца разам з сакрэтам залозы.

Акрамя таго, уролаг згадвае і іншыя магчымыя механізмы — зніжэнне запаленчых працэсаў, асаблівасці гарманальнай рэгуляцыі і нават тое, што сэксуальна актыўныя мужчыны часта ў цэлым больш уважліва ставяцца да свайго здароўя.

Іншыя магчымыя перавагі для здароўя

Нават калі лічба 21+ не мае афіцыйнага статусу медыцынскай нормы, спецыялісты прызнаюць, што рэгулярнае сэксуальнае жыццё прыносіць арганізму карысць.

Паводле даследаванняў, пасля аргазму чалавек звычайна лепш спіць, а якасны сон важны для працы імуннай сістэмы. Падчас сэксу або мастурбацыі таксама вылучаюцца эндарфіны — так званыя гармоны шчасця, а ўзровень гармону стрэсу картызолу, наадварот, зніжаецца.

Менавіта таму навукоўцы вывучаюць сувязь паміж сэксуальнай актыўнасцю і псіхалагічным станам. Ёсць назіранні, што рэгулярнае сэксуальнае жыццё можа зніжаць рызыку дэпрэсіўных станаў.

Сэкс не павінен станавіцца здачай нарматыву

Пры гэтым уролагі папярэджваюць: нельга ператвараць сэксуальную актыўнасць у «нарматыў». У сучасным грамадстве, дзе тэма сэксу пастаянна прысутнічае ў медыя і сацыяльных сетках, многія мужчыны і без таго адчуваюць псіхалагічны ціск. Спробы любой цаной дасягнуць умоўнага «21 разу на месяц» могуць стаць дадатковай крыніцай стрэсу, а гэта ўжо не на карысць здароўю.

Як кажуць медыкі, маладыя, да 25 гадоў, мужчыны ў сярэднім займаюцца сэксам ці мастурбуюць дзесяць разоў на месяц. З гадамі гэтая частата звычайна змяншаецца — асабліва ў парах, якія даўно разам. І хоць даследаванні паказваюць, што актыўнае сэксуальнае жыццё карыснае, медыкі раяць арыентавацца не на лічбы, а на ўласнае самаадчуванне і натуральныя патрэбы арганізма.

• 12
• 0
• 7
• 4
• 3
• 1
• 0
• 0