Moža i dobra było b, kab mužčyny rabili heta 20 razoŭ na miesiac

Praciahłaje seksualnaje ŭstrymańnie moža adbivacca na mužčynskim arhaniźmie nie najlepšym čynam. Miedyki abmiarkoŭvajuć mahčymyja nastupstvy — ad źnižeńnia ŭzroŭniu testasteronu da paharšeńnia erekcyi i źmien u tkankach pałavoha orhana. Na hetym fonie ŭsio bolš daśledavańniaŭ pryśviačajecca tamu, ci mohuć rehularnyja siemiavyviaržeńni (niezaležna ad taho, adbyvajucca jany padčas seksu ŭ pary abo pry masturbacyi) mieć achoŭny efiekt dla zdaroŭja.

Asablivuju viadomaść nabyło maštabnaje daśledavańnie Harvardskaha ŭniviersiteta, u jakim bolš za 30 tysiač mužčyn naziralisia na praciahu amal 40 hadoŭ. Navukoŭcy paraŭnoŭvali infarmacyju pra ich seksualnaje žyćcio i vypadki raźvićcia raku prastaty.

U vyniku vyśvietliłasia, što ŭ mužčyn, jakija ŭ 20—25 hadoŭ mieli 21 ejakulacyju na miesiac i bolš, ryzyka raku prastaty była na 19% nižejšaj, čym u tych, chto ŭ toj ža pieryjad ejakulavaŭ nie čaściej za siem razoŭ na miesiac.

Vydańnie Fitbook raspytała ŭrołaha, doktara miedycyny Krystafa Pisa, jak varta aceńvać hetyja danyja.

Ekśpiert padkreślivaje: havorka idzie pra statystyčnuju suviaź, a nie pra kančatkova dakazanuju pryčynna-vynikovuju zaležnaść. Inakš kažučy, nielha adnaznačna śćviardžać, što mienavita častyja arhazmy abaraniajuć ad raku.

Mahčyma, na vynik upłyvajuć inšyja faktary — ahulny ład žyćcia, harmanalny fon abo psichałahičny stan tych ludziej, jakija schilnyja da bolšaj seksualnaj aktyŭnaści.

Adna z hałoŭnych hipotez tłumačyć mahčymy efiekt tym, što padčas rehularnych siemiavyviaržeńniaŭ prastata čaściej «ačyščajecca». Miarkujecca, što patencyjna škodnyja rečyvy nie zatrymlivajucca ŭ joj nadoŭha, a vyvodziacca razam z sakretam załozy.

Akramia taho, urołah zhadvaje i inšyja mahčymyja miechanizmy — źnižeńnie zapalenčych pracesaŭ, asablivaści harmanalnaj rehulacyi i navat toje, što seksualna aktyŭnyja mužčyny časta ŭ cełym bolš uvažliva staviacca da svajho zdaroŭja.

Inšyja mahčymyja pieravahi dla zdaroŭja

Navat kali ličba 21+ nie maje aficyjnaha statusu miedycynskaj normy, śpiecyjalisty pryznajuć, što rehularnaje seksualnaje žyćcio prynosić arhanizmu karyść.

Pavodle daśledavańniaŭ, paśla arhazmu čałaviek zvyčajna lepš śpić, a jakasny son važny dla pracy imunnaj sistemy. Padčas seksu abo masturbacyi taksama vyłučajucca endarfiny — tak zvanyja harmony ščaścia, a ŭzrovień harmonu stresu kartyzołu, naadvarot, źnižajecca.

Mienavita tamu navukoŭcy vyvučajuć suviaź pamiž seksualnaj aktyŭnaściu i psichałahičnym stanam. Jość nazirańni, što rehularnaje seksualnaje žyćcio moža źnižać ryzyku depresiŭnych stanaŭ.

Seks nie pavinien stanavicca zdačaj narmatyvu

Pry hetym urołahi papiaredžvajuć: nielha pieratvarać seksualnuju aktyŭnaść u «narmatyŭ». U sučasnym hramadstvie, dzie tema seksu pastajanna prysutničaje ŭ miedyja i sacyjalnych sietkach, mnohija mužčyny i biez taho adčuvajuć psichałahičny cisk. Sproby luboj canoj dasiahnuć umoŭnaha «21 razu na miesiac» mohuć stać dadatkovaj krynicaj stresu, a heta ŭžo nie na karyść zdaroŭju.

Jak kažuć miedyki, maładyja, da 25 hadoŭ, mužčyny ŭ siarednim zajmajucca seksam ci masturbujuć dziesiać razoŭ na miesiac. Z hadami hetaja častata zvyčajna źmianšajecca — asabliva ŭ parach, jakija daŭno razam. I choć daśledavańni pakazvajuć, što aktyŭnaje seksualnaje žyćcio karysnaje, miedyki rajać aryjentavacca nie na ličby, a na ŭłasnaje samaadčuvańnie i naturalnyja patreby arhanizma.

• 12
• 0
• 7
• 4
• 3
• 1
• 0
• 0