Патрыярх Кірыл звольніў кіраўніка РПЦ у Заходняй Еўропе за захапленне покерам
Мітрапаліта Корсунскага і Заходнееўрапейскага Нестара (Яўгенія Сіраценку) адхілілі ад кіравання экзархатам Заходняй Еўропы. Рашэнне прыняў кіраўнік Рускай праваслаўнай царквы (РПЦ) патрыярх Кірыл, спаслаўшыся на пачатак царкоўна-судовага разбору ў адносінах да архірэя.
Абавязкі Нестара часова перадалі мітрапаліту Разанскаму і Міхайлаўскаму Марку (Сяргею Галаўкову). Экзархат уключае ў сябе епархіі ў Францыі, Вялікабрытаніі, Бельгіі, Італіі, Ірландыі, Іспаніі, Швейцарыі, Партугаліі, Ліхтэнштэйне, Люксембургу і Манака.
Прычына суда не раскрываецца. Аднак «Новая газета Еўропа» высветліла, што незадаволенасць патрыярха выклікала захапленне Нестара покерам. Мітрапаліт на працягу многіх гадоў удзельнічае ў міжнародных турнірах па гэтай карткавай гульні пад сваім мірскім імем. Яго профіль ёсць у найбуйнейшай базе даных па жывым покеры. На партале Pokernews апублікаваныя фотаздымкі архірэя, зробленыя падчас турніраў. Паводле даных афіцыйнай статыстыкі The Hendon Mob, сумарны выйгрыш Нестара за гады ўдзелу ў спаборніцтвах па покеры перавысіў $47 тысяч.
Вышэйшы агульнацаркоўны суд павінен ацаніць гэтыя факты, як і выкарыстанне святаром сродкаў РПЦ для гэтых мэт. Апостальскія правілы прадугледжваюць пазбаўленне сана за азартныя гульні. 50‑е правіла Лаадыкійскага сабору забараняе клірыкам нават наведваць месцы, дзе праводзяцца такія мерапрыемствы.
Хто такая Алеся Пархоменка з Кіпра, якая развязала беларуска-беларускую вайну88
Хто такая Алеся Пархоменка з Кіпра, якая развязала беларуска-беларускую вайну
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1515
Каментары