Сотні літоўскіх фур захраслі ў Беларусі — транспартнікі Літвы заклікаюць урад тэрмінова шукаць выйсце
Пасля таго як Літва 29 кастрычніка на месяц закрыла мяжу з Беларуссю, некалькі сотняў грузавікоў літоўскіх транспартных кампаній не могуць вярнуцца ў краіну. У сувязі з гэтым Нацыянальная асацыяцыя аўтаперавозчыкаў Linava звярнулася да ўрада з заклікам тэрмінова сумесна з прадстаўнікамі бізнэсу шукаць выйсце са складанай сітуацыі, піша LRT.
Па словах прадстаўнікоў асацыяцыі, частка перавозчыкаў вымушана вяртацца праз Латвію ці Польшчу, аднак і на памежных пунктах гэтых краін утварыліся вялізныя чэргі, з-за чаго некаторыя грузавікі не могуць праехаць і там, паведаміла «Linava».
Генеральны сакратар асацыяцыі Нарунас Раўлінайціс заявіў, што сітуацыя крытычная — частка кіроўцаў вымушана шукаць аб'язныя шляхі, што павялічвае выдаткі і парушае ланцужкі паставак.
Акрамя таго, кіроўцы гадзінамі чакаюць без яснай інфармацыі, некаторыя з іх сутыкаюцца з праблемамі забеспячэння і адпачынку.
«Акрамя таго, дзясяткі транспартных сродкаў цяпер не могуць выехаць праз латвійскія або польскія пункты пропуску, таму што яны ўжо былі аформлены з боку Беларусі, але пасля закрыцця мяжы ім не дазволілі вярнуцца ў Літву. Такая сітуацыя выклікае сур'ёзныя пытанні адносна правоў кіроўцаў», — заявіў Раўлінайціс.
Паводле яго слоў, улады павінны неадкладна распачаць дзеянні.
«Мы просім урад тэрмінова правесці нараду з прадстаўнікамі транспартнага сектару, каб знайсці рашэнне па вяртанні транспартных сродкаў перавозчыкаў у Літву і забяспечыць далейшы рух грузаў», — заявіў кіраўнік асацыяцыі.
«Запускайце далей салюты, а я выклічу міліцыю». Беларусы спрачаюцца пра забарону на феерверкі2
Каментары
У чым праблема? Каментатары тут раілі дабірацца іншымі шляхамі: праз Турцыю на самалёце і гэтак далей. Няхай літоўскія аўтаперавозчыкі скарыстаюцца гэтымі парадамі.
(Ці такія маршруты толькі родзічам беларускіх палітвязняў і беларускім студэнтам каментатары раяць, а літоўскім перавозчыкам такое раіць нельга? )
Вунь і Наўседа казаў - павінна быць моцна больна Беларусі. Ну. А вы чаго галосіце?