«ЗША хочуць нармалізацыі літоўска-беларускіх адносін. Адсюль і рухі з офісам Ціханоўскай»

Польскія журналісты паразмаўлялі з некалькімі людзьмі, якія маюць дачыненне да кулуараў літоўскай палітыкі. Адзін з іх звязаў праблемы офіса Святланы Ціханоўскай з расколам у літоўскім палітыкуме.

«Гаворка ідзе не пра здраду ці раптоўную змену палітыкі Літвы ў дачыненні да Аляксандра Лукашэнкі. З 2020 года стаўленне літоўскага грамадства да беларускай апазіцыі змянілася. Калі ўжо стала відавочна, што рэвалюцыя ў Беларусі не ўдалася, паменшылася колькасць ахвотных падтрымліваць праціўнікаў рэжыму Лукашэнкі.

Сёння наша грамадства ў гэтым пытанні моцна падзеленае. Не апошняе месца займае рост непрыязнасці да рускамоўных імігрантаў, сярод якіх дамінуюць украінцы і беларусы», — кажа суразмоўца RP, добра дасведчаны ў кулуарах літоўскай палітыкі.

На яго думку, гаворка ідзе не пра раптоўную змену палітыкі Літвы ў дачыненні да Лукашэнкі, а ў цэлым пра настроі ў літоўскім грамадстве.

«Гэтыя настроі адбіваюцца на пазіцыі палітычных эліт. Адбыўся распад ранейшага кансэнсусу, што тычыцца ўсходняй палітыкі Літвы. Эліты шукаюць новую ідэю для палітыкі ў дачыненні да Беларусі», — дадае ён.

Змена ўрада ў Літве і той факт, што са снежня краінай сукіруе антысістэмная «Нёманская зара», таксама спрычыніліся да змены стаўлення да ранейшай усходняй палітыкі краіны. Вільня, у прыватнасці, спрабуе палепшыць адносіны з Кітаем, сапсаваныя раней адкрыццём прадстаўніцтва Тайваня ў Літве.

Нельга выключаць, аднак, што справа значна больш складаная, чым здаецца на першы погляд, і можа выходзіць далёка за межы літоўска-беларускіх адносін. Такой думкі прытрымліваецца іншы суразмоўца, якога польскае выданне называе ўплывовым.

«Ключом да разумення сітуацыі з'яўляецца змена палітыкі ў ЗША. Яны хочуць адкрыць шлях да далейшых перамоў з Лукашэнкам. Амерыканцы заявілі, што нармалізацыя літоўска-беларускіх адносін стабілізуе сітуацыю на ўсходнім флангу НАТА, знізіць рызыку канфлікту і зэканоміць сродкі амерыканскіх падаткаплацельшчыкаў.

Думаю, гісторыя робіць круг, і офіс Ціханоўскай паўторыць лёс урада Беларускай Народнай Рэспублікі, які некалі месціўся ў Коўне (Літва перастала яго падтрымліваць у 1923 годзе, і беларусы мусілі пераехаць у Прагу)», — мяркуе ён.

Пасланнік Белага дома Джон Коўл апошнім часам неаднаразова наведваў Мінск, едучы ў Беларусь праз Літву. Дзякуючы гэтым візітам удалося вызваліць больш за 60 палітычных зняволеных, у тым ліку Сяргея Ціханоўскага.

Прэзідэнт ЗША таксама правёў з Лукашэнкам тэлефонную размову і ў адным са сваіх допісаў у сетцы назваў яго «паважаным прэзідэнтам». З паведамленняў заходніх СМІ вынікае, што Лукашэнка разглядаецца як адзін з інструментаў камунікацыі Вашынгтона з Масквой.

• 6
• 6
• 9
• 21
• 1
• 2
• 28
• 0