«Усё, чаго я хацела дасягнуць у жыцці, я зрабіла ў Польшчы». Легкаатлетка Жодзік расказала пра Беларусь, перамогу і свой ганарар

«Я не хачу вяртацца ў Беларусь. Я ўжо прывыкла да Польшчы. Яшчэ нейкі час таму была надзея, што нешта зменіцца, але цяпер мне здаецца, што ўжо няма шанцаў на гэта», — кажа спартсменка.

Тры гады таму яна прыняла адно з самых цяжкіх рашэнняў у жыцці і цяпер атрымала за гэта ўзнагароду. Гэта быў неверагодны выступ і адзін з апошніх шанцаў для польскай зборнай на медаль, піша Interia Sport.

28‑гадовая спартсменка з Баранавічаў паказала, якую моцную псіхіку яна мае. Бо спаборніцтвы ў скачках у вышыню, дзе яна стала віцэ-чэмпіёнкай свету, былі перапыненыя на гадзіну. Дождж перашкодзіў спартсменкам, выбіў іх з рытму. Аднак гэта не спыніла Жодзік. Так рэагаваць на складаную сітуацыю могуць толькі найлепшыя.

Беларуска, якая выступала за Польшчу, каб забяспечыць сабе медаль, мусіла скокнуць у трэцяй спробе 2,00 м. Гэта было вышэй за яе асабісты рэкорд, які складаў 1,98 м. Нягледзячы на тое, што дождж усё яшчэ ішоў, а разбег быў мокры, яна зрабіла гэта.

Пасля гутарак з журналістамі і антыдопінгавага кантролю Марыя вярнулася ў гатэль а трэцяй раніцы.

— Атрымалася праспаць чатыры гадзіны, — распавяла яна Interia Sport.

«Я апынулася перад выбарам, якога, уласна, не павінна была рабіць»

Адразу пасля таго, як Расія атакавала Украіну, Жодзік вырашыла з'ехаць з Беларусі.

«Гэта сапраўды была для мяне цяжкая сітуацыя. Я апынулася перад выбарам, якога, уласна, не павінна была рабіць. Цяпер, аднак, я жыву ў Польшчы. Тут я жыву і тут планую сваё жыццё. Таму я ўжо не гляджу на гэта так, што нешта страціла. У мяне ў Польшчы выдатныя сябры. Усё тое, што я хацела дасягнуць у жыцці, я зрабіла сярод палякаў і ў Польшчы», — сказала Жодзік.

У Беларусі яна пакінула сям'ю. Ад нядаўняга часу ў Польшчы знаходзіцца яе сястра.

На пытанне, ці калі-небудзь вернецца ў сваю краіну, яна адказала:

— Я хацела б туды калі-небудзь паехаць да бацькоў. Аднак я не думаю, што я хацела б там жыць.

Яна кажа, што ў Польшчы ўжо адчувае сябе як дома.

«Нешта лопнула ў маёй галаве»

Для Жодзік медаль чэмпіянату свету з'яўляецца найвялікшым поспехам у кар'еры. Яна кажа, што не мае намеру спыняцца.

— Цяпер я хачу заставацца на п’едэстале, — заявіла яна.

Яна сама не можа патлумачыць, як пераадолела пэўныя бар'еры.

Павялічыць

— Нешта, напэўна, лопнула ў маёй галаве. Я скокнула першы раз у жыцці два метры і падумала: чаму я раней гэтага не зрабіла?

На трэніроўках Жодзік скача ў межах 1,80 — 1,85 м. Таму яна не ведае, на якія высокія скачкі яе хопіць.

За свой поспех у Токіа яна зарабіла 35 тысяч долараў.

— Гэта мой найвялікшы ганарар у кар'еры, — кажа яна і дзякуе ўсім за віншаванні.

Жодзік родам з Баранавічаў. У 2020 годзе яна падпісала адкрыты ліст спартоўцаў, у якім асуджалася фальсіфікацыя выбараў у Беларусі, а таксама гвалт з боку сілавікоў. Таксама спартоўка асудзіла вайну Расіі супраць Украіны.

• 73
• 1
• 0
• 0
• 0
• 3
• 0
• 15