Падборка дэсертаў з ляснымі ягадамі

Пясочныя тарталеткі з ягадным жэле

Спатрэбіцца:

• 150 г пшанічнай мукі
• 50 г молатага міндалю
• 300 мл халоднай вады
• 100 мл алею
• па жаданні — шчопаць солі
• 6 сталовых лыжак сіропу агавы
• 2 шклянкі малінаў і чарніц
• 2 чайныя лыжкі агар-агару

Як гатаваць:

З мукі, міндалю, 100 мл вады, алею, солі і дзве сталовыя лыжкі сіропу агавы замешваем цеста. Раскачваем яго ўтоўшчкі 2—3 мм, выразаем кружкі і выкладаем імі змазаныя алеем формы для тарталетак. Прыціскаем цеста да дна і бакоў формы, наколваем відэльцам і выпякаем у духоўцы, разагрэтай да 180°C, каля 15 хвілін. Астуджваем.

У каструлю ўліваем 200 мл вады, дадаём ягады, варым некалькі хвілін, пакуль яны не пачнуць развальвацца.

Дадаём агар і сіроп з агавы, які застаўся, варым яшчэ прыкладна 5 хвілін, зрэдку памешваючы. Трохі астуджаем, пакуль жэле крыху не загусне. Уліваем ягадную масу ў пясочныя кошыкі, ставім у халадзільнік на гадзіну.

Запечаныя ягады пад крошкай

Спатрэбіцца:

• 100 г чарніц
• 100 г суніц
• 3 яблыкі
• 2 сталовыя лыжкі аўсяных шматкоў
• 2 сталовыя лыжкі грэцкіх арэхаў
• 2 сталовыя лыжкі аблупленага сланечніка
• 2 сталовыя лыжкі мёду
• 2 сталовыя лыжкі масла
• лісцікі мелісы
• молатыя карыца і кардамон

Як гатаваць:

Чарніцы і суніцы мыем. Яблыкі таксама мыем, выразаем у іх сярэдзіну і наразаем паўкольцамі. У маленькія формачкі для запякання спачатку выкладваем чарніцы і суніцы. Зверху — яблыкі.

Аўсяныя шматкі, арэхі і сланечнік здрабняем у блендары. Дадаём у крошку мёд, масла і спецыі, змешваем. Пасыпаем гэтай крошкай ягады з яблыкамі.

Запякаем у духоўцы, разагрэтай да 180°C, каля 15 хвілін. Мелісу прамываем і ўпрыгожваем ёй гатовы дэсерт.

Салата з грыляваных абрыкосаў і ажын

Інгрэдыенты:

• 5 абрыкосаў
• 100 г ажын
• 1 чырвоная цыкорыя
• 1 зялёная цыкорыя
• жменька арэхаў кэш’ю
• 2 сталовыя лыжкі аліўкавага алею
• 1 чайная лыжка бальзамічнага воцату
• 1 чайная лыжка мёду
• соль, перац

Як гатаваць:

Садавіну, ягады і цыкорыю прамываем. Абрыкосы разразаем напалам і выдаляем костачкі. Паліваем іх сталовай лыжкай алею і абсмажваем на патэльні-грылі з абодвух бакоў.

Цыкорыю разрываем на лісты і выкладваем на талеркі. Зверху кладзём абрыкосы і ажыны.

Арэхі падсмажваем на сухой патэльні да залацістага колеру, пасыпаем імі салату. З другой лыжкі алею, воцату, мёду, солі і перцу робім запраўку і паліваем ёй салату.

З-за наяўнасці кэш’ю гэтая страва пасуе толькі для дзяцей старэйшых за 1 год.

• 0
• 0
• 0
• 0
• 0
• 0
• 0
• 0