Трамп дапусціў, што можа прыехаць у Турцыю, дзе Зяленскі будзе чакаць Пуціна
Прэзідэнт ЗША Дональд Трамп заявіў, што не выключае візіту ў Турцыю 15 траўня, дзе прэзідэнт Украіны Уладзімір Зяленскі будзе чакаць прэзідэнта Расіі Уладзіміра Пуціна для «мірных перамоваў». Гэта вынікае са слоў Трампа падчас прэс-канферэнцыі ў Белым доме 12 траўня, піша «Еўрапейская праўда».
Прэзідэнт ЗША выказаў надзею, што і Зяленскі, і Пуцін будуць прысутнічаць у Турцыі ў чацвер, і дадаў, што сам «разважаў над тым, каб прыляцець», калі палічыць, што «сёе-тое можа адбыцца».
Пазней ён удакладніў у адказ на пытанне журналістаў, што можа прыляцець, калі палічыць, што гэта «важна для заключэння пагаднення» — як мяркуецца, ён меў на ўвазе пагадненне паміж Кіевам і Масквой.
«Яны не маглі дамовіцца пра сустрэчу, таму што адзін казаў пра спыненне агню, другі — не, і так туды-сюды. Я сказаў: «Паслухайце, на гэтым этапе мы павінны спыніцца. Проста ідзіце на сустрэчу, сустрэча ўжо прызначаная, ідзіце на сустрэчу ў чацвер», — сказаў прэзідэнт ЗША.
«І калі я падумаю, што гэта будзе карысна — я не ведаю, дзе я буду ў гэты момант, я буду дзесьці на Блізкім Усходзе — але я палячу туды, калі палічу, што гэта будзе карысна», — дадаў ён.
Трамп пазней таксама заявіў пра «пачуццё, што яны [Расія] пагодзяцца» на 30-дзённае безумоўнае спыненне агню, якое Масква дагэтуль адпрэчвала.
Уладзімір Зяленскі падтрымаў гэтую заяву Трампа:
«Я буду ў Турцыі. Спадзяюся, што расіяне не будуць пазбягаць гэтай сустрэчы. І, вядома, мы ўсе ва Украіне хацелі б, каб прэзідэнт Трамп змог быць там з намі — на гэтай сустрэчы ў Турцыі. Гэта правільная ідэя. Шмат што можам змяніць», — заявіў ён.
Раней Уладзімір Пуцін заявіў, што настроены на «прамыя перамовы» з Кіевам у Стамбуле ў чацвер, 15 траўня. Пасля прэзідэнт ЗША Дональд Трамп абвясціў, што патрабуе ад Украіны пагадзіцца на сустрэчу з Расіяй у Стамбуле, нягледзячы на тое, што Масква ігнаруе ўмову «спачатку перамір'е, потым перамовы». У сваю чаргу Зяленскі сказаў, што гатовы асабіста гаварыць з кіраўніком Расіі ў чацвер у Стамбуле.
Каментары
Похоже путами путают пу.