Католікам дазволілі правесці традыцыйныя Крыжовыя шляхі толькі ў адной вобласці
Сёлета традыцыйныя для Вялікага посту набажэнствы Крыжовага шляху, калі ўшаноўваецца памяць Ісуса Хрыста, католікам дазволілі правесці па вуліцах гарадоў толькі ў адным рэгіёне Беларусі — Гродзенскай вобласці. Там працэнт каталіцкіх вернікаў найбольшы, піша katolik.life.
У мінулую пятніцу католікі праводзілі Крыжовы шлях у цэнтры Смаргоні і Дзятлава, у суботу — па вуліцах Гродна, у нядзелю — у цэнтры Вялікай Бераставіцы.
У Вялікую сераду, 16 красавіка гарадскія набажэнствы пройдуць па вуліцах Іўя і Навагрудка.
Таксама 16 красавіка агульнагарадскі Крыжовы шлях запланаваны ў Мінску, але ён адбудзецца ў двары храма — касцёла на Залатой Горцы.
Больш нідзе ў Беларусі не анансавалася правядзення набажэнства па вуліцах. Зноў не будзе сёлета Крыжовага шляху ў Баранавічах. У гэтым раённым цэнтры Брэсцкай вобласці таксама вялікі працэнт католікаў — у горадзе 5 касцёлаў і адна каталіцкая капліца.
З 2014 года тут штогод праводзілі па цэнтральных вуліцах Крыжовы шлях, які збіраў сотні вернікаў. Летась гарадскія ўлады адмовілі мясцовым католікам у правядзенні гарадскога набажэнства ў сувязі з «інтэнсіўнасцю руху аўтатранспарту» і з прычыны правядзення Масленіцы ў той жа дзень, калі вернікі прасілі дазволіць Крыжовы шлях.
Сёлета ў гарвыканкам зноў падавалі просьбу аб правядзенні набажэнства па вуліцах. Але, як даведаліся вернікі, гэтая просьба была праігнараваная — улады дагэтуль не далі ніякага адказу.
Цяпер чытаюць
Мама Бажэны Ярэміч, якая рыхтуе прыгажунь для Лукашэнкі, купіла элітны катэдж коштам $837 тысяч24
Каментары