Беларусы вяртаюцца з Еўропы і суткамі стаяць на мяжы, кіламетровыя чэргі
Перад навагоднімі святамі на ўезд у Беларусь з Еўропы ўтварыліся велізарныя чэргі перад усімі пунктамі пропуску. Найбольш складаная сітуацыя на мяжы з Польшчай.
Польшча
Чарга з легкавікоў на ўездзе ў Беларусь з Польшчы па стане на 17 гадзін суботы расцягнулася прыблізна на 9,5 кіламетра.
Некаторыя нават вылічваюць сярэднюю хуткасць, з якой рухаецца чарга. Калі такі падлік слушны, то тым, хто цяпер становіцца ў калейку, давядзецца правесці ў чаканні каля трох сутак.
Людзі, якія сталі ў чаргу даўжынёй 5,3 кіламетра, адпісвалі ў чаце, што праз 33 гадзіны прасоўвання ім заставалася 800 метраў да заезду ў пункт пропуску з польскага боку.
Іншыя дадаюць, што за 24 гадзіны праехалі роўна палову адлегласці да пагранперахода.
У другой палове дня 21 снежня з Польшчы ў Беларусь уязджалі тыя, хто стаў у чаргу познім вечарам 19 снежня. Праходжанне мяжы ў іх заняло 37 гадзін. Рэкордным паказчыкам, якімі людзі дзяліліся ў чатах, было 40 гадзін і 40 хвілін.
А вось на выезд з Беларусі ў ЕС чаргі з легкавых машын, можна сказаць, няма. Па стане на 16 гадзін толькі ў пункце пропуску «Брэст» было 10 машын у чарзе.
Сітуацыя з аўтобусамі таксама складаная. Па стане на 17 гадзін суботы налічваецца каля 45-50 аўтобусаў, якія накіроўваюцца з Польшчы ў Беларусь. Раніцай было каля 30-35 аўтобусаў.
Людзі, якія ўчора выехалі аўтобусам з Варшавы а 12-й дня, трапілі ў Беларусь толькі ў 10:30 наступнага дня.
Цяпер, калі не перасаджвацца ў аўтобусы, якія стаяць бліжэй да шлагбаума, то толькі ў чарзе давядзецца правесці каля сутак. Калі атрымліваецца падсесці ў першы аўтобус, то само праходжанне мяжы займае каля 12 гадзін — так учора пісалі ў чатах.
Але выглядае, што сітуацыя з падсадкай пагоршылася. Адна з карыстальніц падзялілася, што ў першых 25 аўтобусах ад шлагбаума вольных месцаў ужо няма.
Літва. «Каменны Лог»
Перад святамі чэргі з легкавікоў вярнуліся і на літоўска-беларускую мяжу.
Аўтобусы ў пункце пропуску «Каменны Лог» праходзяць мяжу прыблізна за 9 гадзін.
Чарга на выезд з Літвы ў Беларусь у гэтым пункце пропуску па стане на 16:30 расцягнулася на 3,5 кіламетра. У чатах пішуць, што гэта каля 450 легкавікоў.
Людзі справаздачацца, што на тое, каб толькі даехаць з канца чаргі да шлагбаума на літоўскім баку, у іх пайшлі роўна суткі. І гэта пры ўмове, што чарга на той момант была каля 2 кіламетраў.
Літва. «Беняконі»
Аўтобусы праз «Беняконі» праязджаюць хутчэй, чым у «Каменным Лозе». На праход мяжы 21 снежня праходзіць каля 3 гадзін.
Чарга з легкавікоў з Літвы ў Беларусь у «Беняконях» а 17-й гадзіне складала 3,4 кіламетра, хоць яшчэ а 5-й раніцы была 2,5 км.
Людзі, якія ўчора а 14-й сталі ў чаргу прыблізна 210-й машынай, дабраліся да шлагбаума з літоўскага боку толькі праз 10 гадзін. Іншыя карыстальнікі дадаюць, што прыблізна столькі ж давядзецца правесці ўнутры пункту пропуску. Такім чынам атрымліваецца, што праезд мяжы займае каля 20 гадзін.
Латвія
Найменшыя чэргі на мяжы з Латвіяй, бо праз яе нельга ехаць на аўто з беларускай рэгістрацыяй. Днём у «Грыгароўшчыне» налічвалася каля 200 машын (каля 1,5 км), якія стаялі ў чарзе на выезд з Латвіі ў Беларусь.
Цяпер чытаюць
Памятаеце Таццяну Зарэцкую, якая са скандалам звальнялася з Кабінета Ціханоўскай? У Эстоніі яе падазраюць у махлярстве48
Каментары