У краінах Паўднёва-Усходняй Азіі зафіксаваная рэкордная спёка. У В'етнаме больш за 44°C
У В'етнаме зафіксаваная самая высокая тэмпература ў гісторыі краіны — крыху больш за 44 градусы Цэльсія — і эксперты прадказваюць, што з-за змены клімату гэты рэкорд пратрымаецца нядоўга.
Рэкорд быў усталяваны ў паўночнай правінцыі Тханьхоа, дзе ўлады заклікалі людзей заставацца дома ў самы гарачы час дня. У іншых краінах рэгіёна таксама назіраецца надзвычай гарачае надвор'е, паведамляе Бі-бі-сі.
Улады Тайланда паведамілі аб рэкорднай тэмпературы 44,6 градуса ў заходняй правінцыі Мак.
Бірманскія СМІ паведамілі, што ў адным з гарадоў на ўсходзе краіны была зафіксаваная тэмпература 43,8 градуса, самая высокая за апошняе дзесяцігоддзе.
Перад сезонамі мусонаў у абедзвюх краінах спёка — звычайная справа, але гэтым разам тэмпература працягвае біць рэкорды.
У Ханоі эксперт па змяненні клімату Нгуен Нгок Хуэй заявіў AFP, што ў кантэксце змены клімату і глабальнага пацяплення новы рэкорд В'етнама выклікае непакой.
Ён чакае, што падобныя рэкорды будуць назірацца тут яшчэ шмат разоў. «Гэта даказвае праўдзівасць вынікаў кліматычных мадэляў», — лічыць навуковец.
У горадзе Дананг у В'етнаме фермер Нгуен Тхі Лан распавёў, што спёка прымушае рабочых пачынаць працу раней, чым звычайна, і заканчваць яе ўжо да 10 раніцы.
Папярэдні рэкорд у В'етнаме — 43,4 градуса — быў усталяваны ў цэнтральнай правінцыі Ха Цінь чатыры гады таму.
Спёка ўсталявалася не толькі ў краінах Паўднёва-Усходняй Азіі. У сталіцы Бангладэш, горадзе Дака была зафіксаваная самая высокая тэмпература з 1960-х гадоў, а ўлады Індыі паведамілі, што ў некаторых раёнах краіны тэмпература перавысіла норму на тры-чатыры градусы.
У Іспаніі ў аэрапорце Кардовы на поўдні краіны была зафіксаваная самая высокая тэмпература для красавіка — 38,8°С.
У сакавіку навукоўцы-кліматолагі заявілі, што дасягнуць заяўленых раней ключавых мэтаў па зніжэнні глабальнай тэмпературы, хутчэй за ўсё, не атрымаецца.
З пачатку індустрыяльнай эпохі свет ужо пацяплеў прыкладна на 1,1 градуса, і тэмпература будзе працягваць расці, калі ўрады не пойдуць на рэзкае скарачэнне выкідаў.
Урады раней дамовіліся прыняць меры, каб пазбегнуць павышэння глабальнай тэмпературы больш чым на паўтара градуса. Але планета ўжо пацяплела на 1,1 градуса, і цяпер эксперты кажуць, што ў 2030-х гадах рост сярэдняй тэмпературы Зямлі можа перавысіць 1,5 градуса.
У сваім дакладзе міжурадавая група экспертаў ААН па змяненні клімату заявіла, што кожны прырост сярэднегадавой тэмпературы будзе ўзмацняць негатыўныя наступствы глабальнага пацяплення.
Іна Кулей: Мілінкевіч перамог смерць, але шлях да поўнага адужання няблізкі4
Каментары