«Свабодныя людзі ніколі не пагодзяцца жыць у цемры і несвабодзе». Пра што гаварыў Байдэн у Варшаве
Публічная прамова Джо Байдэна ў Варшаве была надзвычай эмацыйная, у ёй прэзідэнт ЗША, да словаў і дзеянняў якога традыцыйна прыкаваныя позіркі ўсяго вольнага свету, пастараўся даць адказ на шматлікія важныя пытанні, якія хвалююць цяпер усіх. І яна не расчаравала, бо амерыканскі лідар выказваўся абсалютна адназначна і недвухсэнсоўна — за Украіну і супраць пуцінскага рэжыму, за салідарнасць дэмакратаў і рашучае супрацьдзеянне аўтакратам.
На самым пачатку выступлення Байдэн адзначыў, што год таму пачалася найбуйнейшая вайна ў Еўропе з часоў Другой сусветнай. І ў гэтай вайне Украіна працягвае абараняцца і захоўваць незалежнасць.
«Год таму пачалася вайна і чакалася падзенне Кіева. Я толькі што вярнуўся з Кіева — і Кіеў моцна стаіць. Стаіць і ганарыцца гэтым. І галоўнае, што ён вольны», — адзначыў амерыканскі прэзідэнт.
Амерыканскі лідар сказаў, што цяпер адбываецца пераломны момант у гісторыі, які вызначыць будучыню на дзесяцігоддзі, таму трэба абараняць прынцыпы свабоды.
«Дыктатар ніколі не можа перамагчы любоў народа да свабоды,
Брутальнасць ніколі не зломіць імкненне людзей да свабоды, а Украіна ніколі не дасць перамагчы Расіі, таму што свабодныя людзі ніколі не пагодзяцца жыць у цемры і несвабоде», — падкрэсліў ён.
Па словах Байдэна, пасля года поўнамаштабнай вайны ўжо няма ніякіх сумневаў адносна заходняй кааліцыі. Пуцін, праўда, усё яшчэ спрабуе паставіць пад сумнеў упэўненасць у тым, што НАТА будзе аб'яднаным, але гэта дарма:
«Ніякіх сумневаў няма: НАТА не будзе падзеленым і мы не стомімся ад Украіны, мы будзем заўсёды падтрымліваць Украіну».
Уладзімір Пуцін, па словах Байдэна, думаў, што дэмакратычныя рэжымы слабыя, а аўтакраты моцныя. Але атрымалася наадварот:
дэмакратыі па ўсім свеце сталі мацнейшымі, аўтарытарныя рэжымы сталі слабейшымі. Аўтакратам можна казаць толькі не: не, ты не атрымаеш свабоду, не, ты не забярэш маю краіну.
Планы Пуціна пацярпелі крах і замест рэалізацыі сваіх намераў ён атрымаў цалкам адваротнае. Замест фінляндызацыі Украіны Расія атрымала натаізацыю Фінляндыі і Швецыі.
Таксама Байдэн падкрэсліў, што ЗША адданыя пятаму артыкулу НАТА:
«Гэта свяшчэнная клятва — абараняць кожны дзюйм тэрыторыі НАТА».
Мы працягнем санкцыйны ціск на Расію, якога не мела ніводная краіна ў свеце, запэўніў Байдэн. Заходні свет будзе ўводзіць новыя санкцыі. Хутка ЗША разам з еўрапейскімі партнёрамі аб'явіць пра новы пакет санкцый.
Але заходнікі — ніякія не агрэсары.
«ЗША і еўрапейскія краіны не хочуць знішчыць Расію. Мы не плануем нападаць на Расію, захопліваць Расію, як Пуцін сказаў сёння. Мы хочам жыць у міры. Мы не вашы ворагі», —
звярнуўся Джо Байдэн да расіян, адзначыўшы, што расійскі прэзідэнт пры жаданні можа скончыць вайну адным словам.
Чытайце таксама:
Байдэн: Беларусы працягваюць змагацца за сваю дэмакратыю
Байдэн здзейсніў таемны візіт у Кіеў пасля шматгадзіннай паездкі на цягніку ад мяжы з Польшчай
Цяпер чытаюць
Бяспалаў канчаткова рассварыўся з Ціханоўскім: Для яго добры толькі адзін чалавек — Пракоп'еў63
Каментары