Магістрат «Кнігаўка»: Рада культуры запускае першы праект «беларускага Патрэона»
Беларуская рада культуры абвяшчае збор грошай у падтрымку выдавецтва Андрэя Янушкевіча. Робіцца гэта паводле канцэпцыі магістрата — супольнасці беларусаў, што дамаўляюцца цягам пэўнага перыяду падтрымліваць перспектыўныя і прабеларускія праекты вылучэннем вызначанай сумы грошай.
Магістрат «Кнігаўка», як яго назвалі стваральнікі, скіраваны на аднаўленне выдавецкай дзейнасці Андрэя Янушкевіча. Яго выдавецтва «Янушкевіч» было адным з самых паспяховых у краіне, пакуль яго не знішчылі беларускія ўлады, піша mahistrat.byculture.org.
Цяпер Андрэй Янушкевіч хоча наладзіць працэс выпуску беларускіх кніг за мяжой. Для гэтага трэба шмат чаго: вырашыць юрыдычныя пытанні, наладзіць лагістыку распаўсюду кніг, сфарміраваць новую каманду ды сабраць чытачоў, якія цяпер знаходзяцца ў розных краінах. Для гэтага Рада культуры і прапануе падтрымаць Янушкевіча.
Перыяд дзейнасці «Кнігаўкі» — 6 месяцаў: з 22 снежня па 23 чэрвеня. Каб стаць удзельнікам магістрата, трэба падпісацца на ахвяраванні паводле аднаго з двух тарыфаў і штомесяц выдаткоўваць або 10, або 20 даляраў на карысць выдавецкай справы.
Сябра магістрата атрымае і невялікія бонусы, якія будуць залежаць ад выбранага тарыфу. Сярод магчымых бонусаў: прыярытэтны доступ да новых выданняў, 10% зніжка на ўсе кнігі выдавецтва, што выйдуць цягам магістрата, удзел у штомесячных стрымах з Андрэем Янушкевічам, дзе той будзе расказваць пра вынікі магістрата, эксклюзіўны падарунак ад Янушкевіча і, пры ўмове ўдзелу ў магістраце цягам 6 месяцаў, электронны сертыфікат удзельніка.
Што выдавец плануе зрабіць на гэтыя грошы? Перадусім, у планах Андрэя Янушкевіча — выдаць наступныя кнігі: «Кароль» Шчэпана Твардаха, «І ўзыходзіць сонца…» Эрнэста Хэмінгуэя, новыя кнігі беларускіх аўтараў Евы Вайтоўскай, Альгерда Бахарэвіча, Валера Гапеева, Аляксандра Кудрыцкага. Выдавецтва таксама вяртаецца да рыхтавання перакладаў серый пра Гары Потэра Джоан Роўлінг, «Ведзьмара» Анджэя Сапкоўскага, «Гаспадара Ледзянога Саду» Яраслава Гжэндовіча. Але ж магістрат патрэбны і для таго, каб наладзіць распаўсюд кніг і іх продаж.
Падтрымаць праект можна тут.
Каментары