Сёньня пад Менскам супрацоўнікі палку міліцыі спэцыяльнага прызначэньня зрабілі налёт на дом, дзе праходзіла паседжаньне Цэнтральнай Рады Маладога Фронту. Усіх адвезьлі ў РУУС Менскага раёну: большасьць адпусьцілі, Дашкевіча, Хведарука, Фінькевіча, Мацкевіча, Яскевіча, Касю Галіцкую трымалі даўжэй. Урэшце адпусьцілі ўсіх.
Сёньня маладафронтаўцы, 31 чалавек, сабраліся на Цэнтральную Раду. Паседжаньне праходзіла ў в. Заямачнае, што за Соснамі пад Менскам, у прыватным доме. А 14-й дом быў абкружаны АМАПам, вакол дому прыпаркаваліся тры аўтазакі.
А 14.15 АМАПаўцы ўсё ж такі ўламіліся ў дом.
* * *
Як паведаміла Наста Палажанка, Цэнтральная Рада доўжылася хвілін 20.
Пасьпелі выступіць толькі Дашкевіч, Шыла, Фінькевіч, Наста Палажанка. Пасьля гэтага дом быў абкружаны супрацоўнікамі палка міліцыі спэцыянльнага прызначэньня. Хвілін 10-15 міліцыя грукала ў дзьверы, патрабуючы каб іх адчынілі. Потым падцягнуліся яшчэ сілы правапарадку, якія ўрэшце і ўламіліся ў дом.
Кіраваў апэрацыяй намесьнік кіраўніка РУУС Менскага раёну маёр Міхаіл Крыж.
Міліцыянты пачалі патрабаваць дакумэнты, а потым, па словах А. Фінькевіча, паспрабавалі гвалтам выводзіць дзяўчат. Хлопцы заступіліся за іх, завязалася кароткачасовая бойка.
Урэшце ўсе 31 чалавек былі затрыманыя, пагружаны ў аўтобус. У аўтобусе сьпявалі песьні,расказвалі анекдоты, жартавалі.
Усіх адвезьлі ў РУУС Менскага раёну, што на вуліцы Скарыны, 20, непадалёк ад МКАД. зараз, 15:00, усіх ужо адвялі ў будынак РУУС.
* * *
Першай на размову выклікалі Насту Палажанку. Яе дапытвала Чамаданава Вольга Мікалаеўна.
* * *
19.00 Адпусьцілі 25 чалавек: трымаюць Дашкевіча, Хведарука, Фінькевіча, Мацкевіча, Яскевіча, Касю Галіцкую.
21.05 Урэшце адпусьцілі ўсіх, бяз позваў у суд.
Цяпер чытаюць
«Лукашэнка мне сказаў: «Хочаш — можаш адказаць нам, ударыць па Мазыры, па заводзе» — Зяленскі29
Каментары