Pamierła Kazimira Prunskienie — pieršaja premjer-ministarka Litvy paśla adnaŭleńnia niezaležnaści

Kazimira Prunskienie naradziłasia 26 lutaha 1943 hoda ŭ vioscy Vasiuliški Śviancianskaha rajona. Paśla zakančeńnia Vilenskaha ŭniviersiteta ŭ 1965 hodzie zajmałasia vykładčyckaj i navukovaj dziejnaściu. Pracavała taksama ŭ Vienhryi i tahačasnaj HDR, a ŭ druhoj pałovie 1980‑ch hadoŭ zajmała kiraŭničyja pasady ŭ navukovych i adukacyjnych ustanovach Litvy.

U 1988 hodzie jana stała adnoj z aŭtarak kancepcyi ekanamičnaj samastojnaści Litoŭskaj SSR i była siarod zasnavalnikaŭ hramadskaha ruchu «Sajudzis». Paźniej zaniała pasadu namieśnicy staršyni Savieta Ministraŭ Litoŭskaj SSR, była abranaja narodnym deputatam SSSR i ŭdzielničała ŭ pracy Viarchoŭnaha Savieta SSSR i Źjezda narodnych deputataŭ.

U lutym 1990 hoda Prunskienie stała deputatkaj Viarchoŭnaha Savieta Litvy, a 11 sakavika padpisała Akt ab adnaŭleńni niezaležnaści krainy. Praź niekalki dzion, 17 sakavika, jana ŭznačaliła pieršy ŭrad niezaležnaj Litvy i kiravała im da 10 studzienia 1991 hoda.

U 1990 hodzie Prunskienie praviała sustrečy ź lidarami šerahu zachodnich dziaržaŭ, u tym liku z prezidentam ZŠA Džordžam Bušam-starejšym, premjer-ministarkaj Vialikabrytanii Marharet Tetčer, prezidentam Francyi Fransua Miteranam i kancleram Hiermanii Hielmutam Kolem. Za aktyŭnuju mižnarodnuju dziejnaść jaje nazyvali «Burštynavaj łedzi».

Paśla pracy na pasadzie premjer-ministra jana praciahnuła palityčnuju karjeru. Była adnoj z zasnavalnic Žanočaj partyi Litvy, uznačalvała jaje i stvoranyja na jaje asnovie palityčnyja struktury, nieadnarazova abirałasia ŭ Siejm. U 2004—2008 hadach zajmała pasadu ministarki sielskaj haspadarki. Taksama jana była adnoj ź inicyjatarak stvareńnia Bałtyjskaj žanočaj baskietbolnaj lihi i bolš za piatnaccać hadoŭ kiravała hetaj arhanizacyjaj.

U 2004 i 2009 hadach Kazimira Prunskienie ŭdzielničała ŭ prezidenckich vybarach u Litvie. U 2004 hodzie jana navat vyjšła ŭ druhi tur i nabrała ŭ im 47,8 % hałasoŭ, tolki kryšku sastupiŭšy Vałdasu Adamkusu (52,6 %). U 2009-m, praŭda, jaje dasiahnieńni byli bolš ścipłyja — tolki piataje miesca z 3,91 %.

U lutym 2012 hoda palityk pieraniesła ciažki insult i niekalki apieracyj. Paśla praciahłaha lačeńnia i reabilitacyi jana ŭžo amal nie ŭdzielničała ŭ hramadskim žyćci. Apošnija hady Prunskienie žyła ŭ siadzibie svajho syna ŭ Śviancianskim rajonie.

• 1
• 0
• 0
• 1
• 0
• 9
• 0
• 0