Kanstytucyjny sud Kazachstana aficyjna abnuliŭ prezidenckija terminy Takajeva
Takajeŭ moža bałatavacca na prezidenckich vybarach znoŭ.
U suviazi sa ŭstupleńniem u siłu novaj Kanstytucyi krainy, terminy paŭnamoctvaŭ prezidenta Kazachstana Kasym-Žamarta Takajeva byli aficyjna abnuleny. Adpaviednaje rašeńnie ŭ aŭtorak apublikavaŭ Kanstytucyjny sud respubliki. Heta rašeńnie adkryvaje dla Takajeva mahčymaść znoŭ bałatavacca na pasadu kiraŭnika dziaržavy.
Novy Asnoŭny zakon krainy nabyŭ moc 1 lipienia 2026 hoda.
Kanstytucyjny sud paśla aficyjnaha zapytu samoha Takajeva patłumačyŭ, što lubyja abrańni abo pryznačeńni na vyšejšyja pasady, jakija adbylisia ŭ pieryjad dziejańnia raniejšaj Kanstytucyi 1995 hoda, pry prymianieńni novych abmiežavańniaŭ prosta nie ŭličvajucca.
Praca na vyšejšych pasadach pry minułaj redakcyi zakona nie pieraškadžaje zaniać ich znoŭ. Jak adznačyŭ sud u svaim tłumačeńni, abrańnie abo pryznačeńnie takich asob paśla 1 lipienia razhladajecca jak ažyćcioŭlenaje ŭpieršyniu.
Kasym-Žamart Takajeŭ uznačalvaje Kazachstan z 2019 hoda, kali zaniaŭ pasadu paśla adstaŭki pieršaha prezidenta Nursułtana Nazarbajeva, a zatym pieramoh na vybarach.
U 2022 hodzie ŭ krainie ŭviali adziny siamihadovy termin biez prava pieravybrańnia, i pavodle starych normaŭ paŭnamoctvy Takajeva byli stroha abmiežavanyja i musili skončycca ŭ 2029 hodzie.
Ciapierašniaje rašeńnie całkam nivieluje hetaje abmiežavańnie, choć u 2022 hodzie Takajeŭ publična zajaŭlaŭ, što nie płanuje abnulać svaje terminy. Novaja redakcyja Kanstytucyi była pryniata na refierendumie 15 sakavika pry abvieščanaj padtrymcy ŭ 87,15% vybarščykaŭ.
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam3030
Kamientary