Vučeńni stratehičnych jadziernych sił, što pačała Rasija, — najbujniejšyja ŭ historyi
Minabarony RF u aŭtorak paviedamiła pra pačatak vučeńniaŭ «pa padrychtoŭcy i prymianieńni jadziernych sił va ŭmovach pahrozy ahresii». Sudziačy pa zajaŭlenych Rasijaj ličbach, hetyja vučeńni maštabniejšyja za vučeńni 2019 hoda, jakija nazyvalisia najbujniejšymi ŭ postsavieckaj historyi, piša «Ahientstvo».
Pavodle zajavy Minabarony RF, vučeńni buduć iści try dni — z 19 pa 21 maja. Zapłanavany puski balistyčnych i kryłatych rakiet pa palihonach na terytoryi Rasii.
U vučeńniach buduć udzielničać Rakietnyja vojski stratehičnaha pryznačeńnia, Paŭnočny i Cichaakijanski fłaty, kamandavańnie dalokaj avijacyi, siły Leninhradskaj i Centralnaj vajennych akruh.
Usiaho, pavodle zajavy Minabarony, da vučeńniaŭ pryciahnuć bolš za 64 tysiačy vajskoŭcaŭ, zvyš 7,8 tysiačy adzinak uzbrajeńnia, vajennaj i admysłovaj techniki, uklučajučy bolš za 200 rakietnych puskavych ustanovak, bolš za 140 latalnych aparataŭ, 73 karabli i 13 padvodnych łodak.
U paniadziełak treniroŭka voinskich čaściej bajavoha prymianieńnia jadziernaj zbroi i jadziernaha zabieśpiačeńnia pačałasia ŭ Biełarusi.
Pavodle zajavy rasijskaha Minabarony, padčas vučeńniaŭ budzie adpracoŭvacca sumiesnaja padrychtoŭka i prymianieńnie jadziernaj zbroi, raźmieščanaj u Biełarusi.
Jak prachodzili vučeńni jadziernych sił u minułyja hady
2025 hod. Apošni raz prymianieńnie jadziernaj zbroi rasijskija vajskoŭcy adpracoŭvali ŭ kancy kastryčnika minułaha hoda ŭ miežach adnadzionnaj treniroŭki stratehičnych jadziernych sił (prachodziać štohod u kastryčniku). Padčas treniroŭki byli zapuščany mižkantynientalnaja balistyčnaja rakieta «Jars» z kasmadroma «Plesieck», balistyčnaja rakieta «Siniava» z padvodnaj łodki «Bransk» u Barancavym mory, a taksama rakieta «Buravieśnik» z bambavika Tu-95.
Za miesiac da hetaha prajšli sumiesnyja rasijska-biełaruskija stratehičnyja vučeńni «Zachad-2025». Jany praciahvalisia čatyry dni — z 12 pa 16 vieraśnia. U vučeńniach, pavodle zajavy Pucina, udzielničali 100 tysiač vajskoŭcaŭ i kala 10 tysiač sistem uzbrajeńnia, 333 latalnyja aparaty, 247 karabloŭ. Na treniroŭkach było adpracavana prymianieńnie niestratehičnaj jadziernaj zbroi i razhortvańnie rakietnych kompleksaŭ «Arešnik». Pra adpracoŭku prymianieńnia stratehičnaj jadziernaj zbroi padčas vučeńniaŭ nie paviedamlałasia.
2024 hod. U adnadzionnaj treniroŭcy stratehičnych jadziernych sił u kancy kastryčnika ŭdzielničali dźvie padvodnyja łodki, samaloty Tu-95, i byŭ ździejśnieny zapusk «Jarsa» z kasmadroma «Plesieck».
U mai, červieni, lipieni i žniŭni ŭ try etapy prajšli vučeńni niestratehičnych jadziernych sił. Jany praciahvalisia sama mieniej na praciahu siami dzion (21 maja, z 11 pa 13 červienia i z 31 lipienia pa 2 žniŭnia). U vučeńniach razam z rasijskimi vajskoŭcami ŭdzielničała armija Biełarusi. Dakładnaja kolkaść pryciahnutych da trenirovak vajskoŭcaŭ i techniki nie paviedamlałasia. Minabarony Rasii paviedamlała pra ŭdzieł avijacyi, jakaja zapuskała «Kinžał», rakietnych kompleksaŭ «Iskander-M» i karabloŭ VMF, što adpracavali zapuski kryłatych rakiet.
2023, 2022, 2020 hady. Rasija praviała čatyry adnadzionnyja treniroŭki stratehičnych jadziernych sił u śniežni 2020 hoda, u lutym i kastryčniku 2022 hoda, a taksama ŭ kastryčniku 2023-ha.
U śniežni 2020 hoda ŭdzielničali adna padvodnaja łodka, samaloty Tu-160 i Tu-95MS, a taksama adpracoŭvaŭsia zapusk «Jarsa». U kastryčniku 2022 hoda i kastryčniku 2023‑ha ŭdzielničała adna padvodnaja łodka, samaloty Tu-95, a taksama ździajśnialisia zapuski «Jarsa» z kasmadroma «Plesieck». Da treniroŭki ŭ lutym 2022 hoda, za niekalki dzion da ŭvarvańnia va Ukrainu, pryciahvalisia siły i srodki PKS, Paŭnočnaha i Čarnamorskaha fłatoŭ.
2021 hod. Rasija nie pravodziła takich vučeńniaŭ.
2019. U kastryčniku 2019 hoda prajšli trochdzionnyja vučeńni stratehičnych jadziernych sił «Hrom-2019». U ich udzielničali kala 12 tysiač vajskoŭcaŭ, 213 puskavych ustanovak RVSP (Rakietnyja vojski stratehičnaha pryznačeńnia), 105 latalnych aparataŭ, u tym liku piać stratehičnych rakietanoscaŭ, 15 nadvodnych karabloŭ i piać atamnych padvodnych łodak, a taksama 310 adzinak bajavoj i śpiectechniki.
Vučeńni «Hrom-2019» stali najbujniejšymi ŭ postsavieckaj historyi Rasii, pisaŭ časopis «Profil».
«Iźviestija» pisali, što «vučeńni «Hrom-2019» adznačylisia samymi maštabnymi puskami balistyčnych i kryłatych rakiet za ŭsiu postsavieckuju historyju».
Ciapier čytajuć
«Ja tak daloka zabrałasia. Škada tolki, što nie mahu pakazać heta tatu». Jak žyvie dačka Paŭła Šaramieta praz 10 hadoŭ paśla jaho hibieli2
«Ja tak daloka zabrałasia. Škada tolki, što nie mahu pakazać heta tatu». Jak žyvie dačka Paŭła Šaramieta praz 10 hadoŭ paśla jaho hibieli
Statkievič ab pratestach va Ukrainie: Kali vy abrali z takoj pieravahaj prezidenta i adnačasova Viarchoŭnaha hałoŭnakamandujučaha, to dajcie jamu kiravać2222
Kamientary