Viadomaja pravaabaronca znachodziłasia za kratami z kastryčnika 2022 hoda. Joj prysudzili siem hadoŭ kałonii.
Pradstaŭnicu mižnarodnaj pravaabarončaj arhanizacyi Human Constanta zatrymali 28 kastryčnika 2022 hoda. Spačatku joj prysudzili 15 sutak aryštu za nibyta «drobnaje chulihanstva» (art. 19.1 KaAP), paśla čaho aktyvistku jašče try razy pierazatrymlivali na toj ža termin pa anałahičnych pratakołach.
Naprykancy śniežnia pravaabaroncu pieraviali ŭ SIZA i vystavili abvinavačańnie pavodle 342 i 130 artykułaŭ Kryminalnaha kodeksa («Arhanizacyja albo ŭdzieł u dziejańniach, jakija hruba parušajuć hramadski paradak» i «Raspalvańnie rasavaj, nacyjanalnaj, relihijnaj ci inšaj sacyjalnaj varožaści»).
Pavodle viersii abvinavačvańnia, u adnym z pravaabarončych dakładaŭ Łojki za 2018 hod, jaki tyčyŭsia pieraśledu anarchisckaj supolnaści ŭ Biełarusi, utrymlivałasia niehatyŭnaja acenka niezakonnych dziejańniaŭ supracoŭnikaŭ milicyi. Heta i stała padstavaj dla zaviadzieńnia kryminalnaj spravy.
Sud, jaki prachodziŭ u červieni 2023 hoda ŭ zakrytym režymie, pryznačyŭ pravaabaroncy pakarańnie ŭ vyhladzie 7 hadoŭ źniavoleńnia ŭ kałonii va ŭmovach ahulnaha režymu. Svajoj viny Nasta nie pryznała. Termin jana adbyvała ŭ žanočaj kałonii №4 u Homieli. U lipieni 2025 hoda stała viadoma, što źniavolenuju na 6 miesiacaŭ źmiaścili ŭ PKT (pamiaškańnie kamiernaha typu).
Kali Nastu aryštavali, doma zastavaŭsia jaje sabaka Eryk. Siabry Nasty zabrali Eryka za miažu. Ciapier hety pryhožy dvarniak, padobny da aŭčarki, žyvie ŭ Čechii.
Budučaja pravaabaronca naradziłasia 6 studzienia 1989 hoda ŭ Minsku. Vypusknica Jurydyčnaha kaledža BDU, paśla vučyłasia na jurydyčnym fakultecie BDU i atrymała stupień mahistra mižnarodnaha i jeŭrapiejskaha prava.
Łojka na praciahu vaśmi hadoŭ pracavała ŭ hramadskaj pryjomnaj Pravaabarončaha centra «Viasna» i była adnoj z suzasnavalnic arhanizacyi Human Constanta (likvidavanaj uładami letam 2021 hoda).
Jana stała adnoj ź pieršych pravaabaroncaŭ Biełarusi, chto pačaŭ sistemna zajmacca pravami mihrantaŭ i asobaŭ, jakija šukali prytułku, a taksama pracavała ź ludźmi biez pastajannaha miesca žycharstva. Akramia asnoŭnaj dziejnaści, žančyna praciahły čas była vałanciorkaj u prytułku dla sabak.
U 2020 hodzie Nasta vyrašyła ŭstrymacca ad niepasrednaha ŭdziełu ŭ akcyjach pratestu i pracy ŭ inicyjatyŭnych hrupach, kab całkam skancentravacca na pravaabaronie.
Pieršy raz dziaŭčynu zatrymali ŭ žniŭni 2021 hoda. Paśla 72 hadzin na Akreścina jaje vyzvalili ŭ statusie padazravanaj pa kryminalnaj spravie, źviazanaj ź dziejnaściu «Viasny». Tady jana dała padpisku ab niavyjeździe.
6 vieraśnia 2022 hoda, paśla naviedvańnia sudovaha pasiedžańnia pa spravie «Revalucyjnaha dziejańnia», aktyvistku dvojčy asudzili za «drobnaje chulihanstva», i jana praviała 30 sutak u izalatary. Pa vychadzie na volu Nasta daviedałasia, što Śledčy kamitet spyniŭ kryminalnuju spravu suprać jaje.
Praz try tydni paśla vychadu na volu, 28 kastryčnika 2022 hoda, pravaabaronca była zatrymanaja znoŭ, paśla čaho ŭžo nie vyjšła na svabodu až da momantu vyzvaleńnia.
Palaki kuplajuć damy ŭ Biełarusi — cikaviacca, ci chopić na žyćcio jeŭrapiejskaj piensii, i radujucca śmiešnym vydatkam9
Kamientary