Sacyjalist Zochran Mamdani kiruje Ńju-Jorkam z pačatku hoda. Jak pakazvaje novaje daśledavańnie, usio bolš miljanieraŭ pakidaje horad.
Pavodle danych niekamiercyjnaj arhanizacyi Citizen Budget Commission («Hramadzianskaja biudžetnaja kamisija»), z-za hetaha horad užo straciŭ 11 miljardaŭ dalaraŭ padatkovych pastupleńniaŭ, piša Bild.
Jašče da ŭstupleńnia Mamdani na pasadu Ńju-Jork straciŭ amierykanskich miljanieraŭ. U 2010 hodzie tam pražyvali 12,7% uładalnikaŭ kapitału na adzin miljon dalaraŭ i bolš, a ŭ 2022 hodzie — užo tolki 8,7%. Najbolšuju vyhadu ad hetaha atrymali štaty Techas i Fłaryda, jakija ličacca bolš spryjalnymi dla biznesu. Tym nie mienš Mamdani maje namier jašče bolš pavysić padatki dla «bahatych».
«Źnižeńnie doli padatkapłacielščykaŭ z vysokimi dachodami maje surjoznyja nastupstvy», — adznačajecca ŭ daśledavańni. U Ńju-Jorku adzin pracent nasielnictva z samymi vysokimi dachodami vypłačvaje 45% usich pastupleńniaŭ ad padachodnaha padatku. «Tamu dachody haradskoha biudžetu ŭ značnaj stupieni zaležać ad taho, ci zastanucca ŭ Ńju-Jorku ludzi z vysokimi zarobkami», — adznačyŭ ekanamist Džared Valčak u kamientaryi dla haziety New York Post.
Niahledziačy na hetyja ŭražalnyja ličby, Mamdani zastajecca prychilnikam svajoj palityki. «Ja liču, što samyja bahatyja mohuć zrabić jašče krychu bolš, kab kožny mieŭ mahčymaść dazvolić sabie žyć tut», — skazaŭ jon, adkazvajučy na pytańnie pra vyniki daśledavańnia.
Adnak ekanamisty sumniavajucca ŭ takoj łohicy. «Źjazdžajuć ludzi, jakija finansujuć najbolšuju častku biudžetu, ź jakoha apłačvajucca sacyjalnyja prahramy, pryznačanyja dla padtrymki samych nieabaronienych», — adznačyŭ Styŭ Fułap, kiraŭnik ekanamičnaha abjadnańnia Partnership for New York City.
Ciapier čytajuć
Kolkaść achviar vybuchu ŭ maskoŭskim elitnym restaranie na jubilei hienierała, jaki kamandavaŭ nastupam na Kijeŭ ź Biełarusi ŭ 2022-m, vyrasła da piaci čałaviek44
Kamientary