U Rasii zajavili pra niemahčymaść skłaści dziaržaŭny biudžet biez novaha pavyšeńnia padatkaŭ

Uładzimir Kołyčaŭ adznačyŭ, što za apošnija šeść hadoŭ vydatki rasijskaha biudžetu vyraśli z 16,6% da 19,7% VUP, u tym liku z-za rekordnaha z savieckich časoŭ finansavańnia vydatkaŭ «na abaronu» — kala 30% biudžetu. U toj ža čas dachody adnosna pamieru ekanomiki skaracilisia z 18,4% da 17,1% VUP. Asnoŭnaje padzieńnie pryjšłosia na naftahazavyja pastupleńni.

Pa słovach čynoŭnika, dziaržava ŭžo vykarystała ŭsie mahčymyja krynicy: naftahazavyja dachody, srodki Fondu nacyjanalnaha dabrabytu, svabodnyja reštki, rost dziaržaŭnych zapazyčańniaŭ i miery pa pavieličeńni dachodaŭ bieź źmianieńnia asnoŭnaj padatkovaj palityki. Ale ŭ 2025 hodzie hetyja resursy praktyčna skončylisia.

Tamu ŭrad pryniaŭ doŭhaterminovyja rašeńni ab źmianieńni padatkovych umoŭ. Z novaha hoda staŭka PDV u Rasii pavyšajecca da 22%, što pavinna dać biudžetu jašče 1,2 tryljona rubloŭ (kala 15,22 miljarda dalaraŭ). Taksama istotna ŭskładniajecca praca małoha biznesu — paroh sproščanaj sistemy źnižajecca da 20 miljonaŭ rubloŭ, a potym i da 10 miljonaŭ. Akramia taho, istotna pavialičvajucca štrafy i pošliny, a taksama ŭvodzicca «technałahičny zbor» — padatak na smartfony, noŭtbuki i inšuju techniku, jaki pavinien prynieści kala 200 miljardaŭ rubloŭ (kala 2,6 miljarda dalaraŭ) za try hady.

U 2025 hodzie rasijski ŭrad užo pavyšaŭ padatak na prybytak, utylzbor i padatak na dachody fizičnych asob, płanujučy sabrać 3,6 tryljona rubloŭ (kala 35,65 miljarda dalaraŭ) i źnizić deficyt da 1,2 tryljona. Ale faktyčna, pavodle raźlikaŭ Minfina, «dzirka» ŭ biudžecie da kanca hoda dasiahnie 5,7 trłn rubloŭ (71,82 miljarda dalaraŭ). Naftahazavyja dachody skaracilisia na 20%, a zbor asnoŭnych padatkaŭ akazaŭsia nižejšy za płan: PDV — na 1,3 tryljona rubloŭ (kala 16,56 miljarda dalaraŭ), pošliny i akcyzy — na 328 miljardaŭ (kala 4,18 miljarda dalaraŭ), padatak na prybytak — na 160 miljardaŭ (kala 1,98 miljarda), padatak na dachody fizičnych asobaŭ — na 36 miljardaŭ (kala 445 miljonaŭ), utylzbor — na 888 miljardaŭ (kala 10,98 miljardaŭ).

Ekanamisty papiaredžvajuć pra ryzyku «padatkovaj śpirali», kali pavyšeńnie padatkaŭ pryvodzić nie da rostu zboraŭ, a da padzieńnia ekanomiki i zvužeńnia padatkovaj bazy, što prymušaje ŭłady znoŭ pavyšać padatki. Hetaja situacyja moža paŭtarycca i ŭ nastupnym hodzie, kaža ekanamistka Sofja Daniec: ekanomika ŭžo słabaja, a novyja padatki mohuć jašče bolš pahoršyć jaje stan.

• 19
• 0
• 7
• 1
• 0
• 0
• 0
• 0