Piekła ŭ Rasii: udary pa naftapierapracoŭcy pahłyblajuć paliŭny kryzis i mianiajuć ujaŭleńni Trampa pra pierśpiektyvy Ukrainy

Ukraina aktyŭna nanosić udary pa paliŭnaj infrastruktury Rasii, i maštaby atak praciahvajuć raści. Z žniŭnia kolkaść udaraŭ dronami pa rasijskich naftapierapracoŭčych zavodach i źviazanych ź imi transpartnych abjektach pavialičyłasia z dvuch-troch da čatyroch-piaci na tydzień. Apošnim časam atakam padvierhlisia ekspartny terminał u Navarasijsku, NPZ u Baškartastanie (za 1300 km ad miažy), pompavaja stancyja ŭ Čuvašyi, a taksama bujny zavod u Jarasłaŭli (choć aficyjna zajaŭlena, što tam byŭ techničny zboj).

Pavodle hałoŭnakamandujučaha USU Alaksandra Syrskaha, Ukraina ŭžo paškodziła 85 «kaštoŭnych» celaŭ u ramkach apieracyi DeepStrike, siarod jakich — nie tolki vajskovyja abjekty, ale i klučavyja pramysłovyja centry. Asabliva vynikovymi źjaŭlajucca ataki na naftapierapracoŭčyja pradpryjemstvy, jakija prynosiać najbolšy ekanamičny ŭron Rasii.

Pavodle analitykaŭ Energy Aspects i Argus Media, na siońnia prynamsi 16 z 38 rasijskich NPZ paciarpieli, pryčym niekatoryja — niekalki razoŭ.

Pastajannyja paškodžańni robiać ramont nieefiektyŭnym. U vyniku — padzieńnie ekspartu dyziela na 30% u paraŭnańni ź minułym hodam i vostry deficyt paliva ŭnutry krainy: u roznych rehijonach fiksujucca kiłamietrovyja čerhi na zapraŭkach, a miascovyja ŭłady ŭvodziać normy prodažu paliva. U Krymie aŭtamabilistam dazvolena kuplać nie bolš za 30 litraŭ.

25 vieraśnia vice-premjer Rasii Alaksandr Novak abviaściŭ ab častkovaj zabaronie ekspartu dyziela, a taksama padoŭžyŭ raniejšuju zabaronu na ekspart bienzinu da kanca hoda. 

Pry hetym udary pa naftapravodach i terminałach, jak u Prymorsku, pakul mienš efiektyŭnyja — jany lahčej paddajucca ramontu. Ale mienavita ekspart naftapraduktaŭ, a nie syroj nafty, zabiaśpiečvaje Rasii asnoŭnyja dachody.

Na dumku aŭtaraŭ, nieasłabnaja kancentracyja ŭvahi na naftapierapracoŭčych zavodach «bolš za ŭsio mianiaje rytoryku vajny i, pa ŭsioj bačnaści, navat dapamahaje źmianić mierkavańnie Donalda Trampa ab pierśpiektyvach Ukrainy».

Na fonie taho, jak rasijskaja avijacyja bje pa haradach, ukrainskaja stratehija — metanakiravana bić pa infrastruktury, ad jakoj zaležyć praciah vajny. Pavodle analitykaŭ, choć hetyja ŭdary i nie «paralizujuć» ekanomiku RF imhnienna, ale pastupova pazbaŭlajuć Kreml mahčymaści finansavać dalejšuju eskałacyju, a nasielnictva ŭsio macniej adčuvaje na sabie nastupstvy vajny.

• 42
• 0
• 2
• 0
• 0
• 0
• 0
• 0