Pucinu dałažyli pra adnaŭleńnie kantrolu nad «suchaputnym kalidoram» u Krym
Kiraŭnik pryznačanaj Rasijaj akupacyjnaj administracyi Zaparožskaj vobłaści Jaŭhien Balicki padčas sustrečy z prezidentam Rasii Uładzimiram Pucinym zajaviŭ, što rasijskija vojski nibyta całkam kantralujuć tak zvany «suchaputny kalidor» u Krym — trasu, jakaja złučaje Rastoŭ-na-Donie z anieksavanym paŭvostravam praz akupavanyja terytoryi Ukrainy, piša The Moscow Times.
Pa słovach Jaŭhiena Balickaha, efiektyŭnaść ukrainskich udaraŭ bieśpiłotnikami pa hetym maršrucie «istotna źniziłasia» dziakujučy ŭzmacnieńniu supraćpavietranaj abarony i prymianieńniu novych srodkaŭ abarony. Jon taksama adznačyŭ, što trasa była ŭziataja pad asablivy kantrol pa daručeńni Pucina.
Hetyja zajavy vyklikali sumnievy navat siarod niekatorych rasijskich vajennych błohieraŭ. U Z-kanale «Dva majora», naprykład, iranična prapanavali Balickamu asabista prajechać pa ŭsim maršrucie na čale kałony bienzavozaŭ, kab paćvierdzić biaśpieku darohi.
Ukrainski bok raniej paviedamlaŭ, što ŭ kancy maja — pačatku červienia ŭziaŭ hety łahistyčny maršrut pad ahniavy kantrol z dapamohaj udarnych bieśpiłotnikaŭ siaredniaj dalokaści. Pavodle ŭkrainskich paviedamleńniaŭ, udary nanosilisia pa hruzavikach, składach, palivazapraŭščykach i inšych abjektach zabieśpiačeńnia ŭzdoŭž trasy.
U pačatku lipienia śćviardžałasia, što za pieršy tydzień miesiaca byli atakavanyja kala 240 rasijskich hruzavikoŭ, jakija ruchalisia pa hetym maršrucie, u tym liku palivazapraŭščyki.
Kamientary