Novy trend: cybulny sok, kab vałasy stali zdaraviejšyja. Heta praŭda pracuje?
Cybula i jaje sok stali novym chitom u sacyjalnych sietkach. Influensery abiacajuć, što hety prosty chatni srodak paskaraje rost vałasoŭ, robić ich macniejšymi i bliskučymi. Jak heta pracuje?
Parady pa dohladzie za vałasami zapatrabavanyja. Apošni trend — cybulny sok. Jak i mnohija inšyja naturalnyja srodki, jakija nabyli papularnaść u sacyjalnych sietkach, jon sapraŭdy moža palepšyć stan vałasoŭ i skury hałavy, kali vykarystoŭvać jaho rehularna. Ale kab atrymać realny efiekt, treba razumieć, jak jon dziejničaje i čaho varta čakać.
Što kaža navuka? U čym sakret cybuli?
«Cybulny sok vykarystoŭvajecca jak chatni srodak na praciahu mnohich hadoŭ, i jość peŭnyja dokazy jaho karyści», — raskazvaje dermatołah Mona Foad u intervju časopisu Glamour.
Hałoŭny sakret cybuli — vysokaje ŭtrymańnie siery. Hety elemient źjaŭlajecca najvažniejšym kampanientam kieracinu, białku, ź jakoha składajucca našy vałasy. «Kali dadatkovaja siera traplaje na skuru hałavy, jana moža spryjać umacavańniu łomkich vałasoŭ, źmianšać ich dalikatnaść i stvarać bolš zdarovaje asiarodździe dla rostu vałasoŭ», — tłumačyć doktar.
Ź joj zhodnaja i trychołah Kery Jejts. Jana dadaje, što cybula bahataja na antyaksidanty i fłavanoidy, a taksama vałodaje antymikrobnymi i supraćzapalenčymi ŭłaścivaściami. Heta robić cybulu vydatnym pamočnikam u baraćbie z takimi prablemami, jak, naprykład, pierchać.
Adnak Jejts adznačaje, što cybulny sok nie stolki paskaraje rost, kolki pry rehularnym vykarystańni palapšaje ahulny vyhlad vałasoŭ i nadaje im zdarovy blask.
Niekatoryja daśledavańni pakazvajuć, što cybulny sok moža palapšać krovazvarot u vałasianych falikułach, asabliva kali spałučać jaho naniasieńnie z masažam skury hałavy.
Tym nie mienš, ekśpierty padkreślivajuć: heta nie leki ad miedycynskich pryčyn vypadzieńnia vałasoŭ, takich jak ałapiecyja, a chutčej dapamožny naturalny mietad dla ŭmacavańnia vałasoŭ.
Kamu padydzie, a kamu — nie?
Efiektyŭnaść cybulnaha soku zaležyć ad typu vałasoŭ i stanu skury hałavy.
Kamu padydzie? Najbolšuju karyść adčujuć ludzi z tonkimi abo radziejšymi vałasami. Siera dapamoža ŭmacavać ich i dadać abjomu. Taksama srodak moža być karysnym dla ludziej z tłustaj skuraj hałavy, bo cybulny sok dapamahaje zbałansavać vypracoŭku skurnaha sała.
Kamu varta być aściarožnym? Kali ŭ vas adčuvalnaja skura, schilnaść da ekzemy ci razdražnieńnia, ad hetaha mietadu lepš admovicca. Kancentravany sok moža vyklikać śvierb i pačyrvanieńnie.
Zrabić samastojna ci kupić u kramie?
Pryhatavać cybulny sok u chatnich umovach davoli prosta: dastatkova nacierci cybulinu i adcisnuć vadkaść. Adnak hety praces moža być davoli kłopatnym, a nieraźviedzieny sok — zanadta ahresiŭnym dla skury hałavy.
Kali vy robicie masku doma, ekśpierty rajać razvodzić jaho vadoj abo źmiešvać ź inšymi źmiakčalnymi kampanientami, naprykład, arhanavym alejem, alejem sandałavaha dreva abo rysavaj vadoj.
Samaje važnaje praviła: pierad pieršym vykarystańniem abaviazkova praviercie reakcyju skury na nievialikim učastku.
Kali ž chatnija kłopaty vas nie pryvablivajuć, možna źviarnucca da hatovych kaśmietyčnych srodkaŭ z ekstraktam cybuli. Jany, jak praviła, bolš zručnyja va ŭžyvańni i časta ŭtrymlivajuć dadatkovyja kampanienty, jakija zaspakojvajuć i ŭvilhatniajuć skuru, što robić ich bolš biaśpiečnymi.
Jak časta vykarystoŭvać i kali čakać vynikaŭ?
Pa słovach dermatołaha Mony Faad, paśladoŭnaść važniejšaja za častatu. U siarednim, dastatkova vykarystoŭvać raźviedzieny chatni sok abo hatovy srodak dva-try razy na tydzień. Štodzionnaje vykarystańnie nie patrebnaje i moža pryvieści da razdražnieńnia.
Vyniki nie źjaviacca imhnienna. Niekatoryja mohuć zaŭvažyć pamianšeńnie vypadzieńnia vałasoŭ praz 4‑6 tydniaŭ. Inšym moža spatrebicca dva-try miesiacy pastajannaha vykarystańnia, kab ubačyć bačnyja palapšeńni. Ale pamiatajcie: kali vy adčuvajecie mocnaje razdražnieńnie, pracedury varta spynić.
A što nakont pachu?
Heta, badaj, hałoŭnaje pytańnie, jakoje chvaluje ŭsich. Tak, pach cybuli vielmi ŭstojlivy, i pazbavicca ad jaho byvaje niaprosta. Prychilniki mietadu prapanujuć niekalki sposabaŭ minimizavać niepryjemny vodar:
dadać u masku hiel ałoe viera, cytrynavy sok abo niekalki kropiel efirnaha aleju z pryjemnym vodaram (łavanda, miata);
paśla pracedury staranna pramyć vałasy miakkim šampuniem i vykarystać kandycyjanier z mocnym, śviežym vodaram.
Takim čynam, cybulny sok — sapraŭdy źmiaščaje karysnyja rečyvy i moža palepšyć stan vałasoŭ, asabliva kali jany asłablenyja ci łomkija. Adnak navuka pakul nie paćviardžaje, što jon realna paskaraje rost abo lečyć abłysieńnie. Tamu vykarystoŭvać jaho možna jak naturalny dadatak da asnoŭnaha dohladu — ale z rozumam i aściarožnaściu.
Kamientary