Łatvija prypyniaje nierehularnyja aŭtobusnyja pajezdki ź Biełarusi i Rasii
Z 1 listapada 2025 hoda ŭ Łatvii ŭvodzicca zabarona na mižnarodnyja nierehularnyja aŭtobusnyja pieravozki praź miažu ź Biełaruśsiu i Rasijaj. Abmiežavańnie budzie dziejničać da 31 kastryčnika 2026 hoda. Takoje rašeńnie ŭrad krainy pryniaŭ 7 kastryčnika.
Zabarona zakranie ŭsie kampanii pieravozčykaŭ, niezaležna ad formy ŭłasnaści i krainy rehistracyi transpartnaha srodku.
Pad abmiežavańnie traplaje punkt propusku «Patarnijeki» (ź biełaruskaha boku — «Hryhoraŭščyna»), a taksama na miažy z Rasijaj — «Hrebnieva» i «Cierachava».
Jak adznačyli ŭ ministerstvie transpartu, miera pryniata «ŭ suviazi ź ciapierašniaj hieapalityčnaj situacyjaj i rekamiendacyjami ŭrada Łatvii hramadzianam ustrymacca ad pajezdak u Biełaruś i Rasiju». Pavodle jaho, u apošni čas nazirajecca rost nierehularnych arhanizavanych aŭtobusnych pajezdak i zatory na pamiežnych darohach, što stvaraje dadatkovyja ryzyki dla biaśpieki krainy.
Ministr padkreśliŭ, što takaja situacyja moža sadziejničać nielehalnaj mihracyi, raźviedvalnaj dziejnaści zamiežnych śpiecsłužbaŭ i viarboŭcy hramadzian, tamu nieabchodna ŭvieści žorstkija miery kantrolu.
Pry hetym rehularnyja pasažyrskija maršruty, jakija arhanizujucca na padstavie mižuradavych pahadnieńniaŭ i łatvijskaha zakanadaŭstva, pakul zastanucca dziejnymi.
Kamientary