«Časam zdajecca, tut nie zastaniecca ludziej»: mierkavańnie ajcišnika z samaha biednaha rajona

Pavodle Biełstata, u 2025 hodzie samy nizki siaredni ŭzrovień zarabotnaj płaty ŭ Biełarusi adznačany ŭ Šarkaŭščynskim, Rasonskim, Miorskim, Brahinskim i Drybinskim rajonach. Pavodle aficyjnych danych, va ŭsich hetych rehijonach siaredniaja zarpłata nie pieravyšaje 2 tysiač rubloŭ (kala $671).

I padobna, što hetym rajonam nie pryvykać da roli ekanamičnych aŭtsajderaŭ. Tak, u listapadzie 2024 hoda samymi maleńkimi zarpłatami ŭ Biełarusi taksama moh pachvalicca Šarkaŭščynski rajon. Dy i ŭ astatnich rehijonach ź ciapierašniaj piaciorki adstajučych siarednija zarpłaty byli zusim nievialikimi.

Zirnuć vačyma ajcišnika na žyćcio i pracu ŭ adnym z samych biednych rajonaŭ Biełarusi dapamoh Michaił (imia źmieniena). Jon žyvie ŭ Šarkaŭščynskim rajonie, vučycca ŭ adnym z bujnych haradoŭ, a zaraz addalena prachodzić stažyroŭku na IT-vakansii.

— Adčuvajecca jak-niebudź na praktycy, što vy žyviacie i pracujecie ŭ samym biednym rehijonie krainy?

— Ščyra kažučy, prablemy adčuvajucca. U mnohich śfierach staić pytańnie kadraŭ (što nie navina dla sielskaj miascovaści), a pryjazdžajučy dadomu z VNU ja rehularna čuju pra niejkija skaračeńni ci spraščeńni ŭ niekatorych strukturach. Što, viadoma, nie ciešyć.

Maje adnahodki, jak i mnohija ŭ naš čas, nie žadajuć pracavać tut i šukajuć bolš mahčymaściaŭ dla samarealizacyi ŭ abłasnych centrach, inšych haradach.

— Status «samaha biednaha rajona Biełarusi» upłyvaje na infrastrukturu, miedycynu, adukacyju? Hetaja situacyja niejak źmianiajecca z chodam času?

— Niahledziačy na składanuju situacyju, zaŭvažna, što administracyja rajona pastajanna sprabuje ŭnieści stanoŭčuju dynamiku ŭ raźvićcio rajona i znajści niejkija kampramisy ŭ miedycynskaj śfiery, u adukacyi. Abnaŭlajecca infrastruktura, i mnie znachodzicca na radzimie pa-raniejšamu pryjemna.

— Pa adčuvańniach, nakolki składaniej uradžencu Šarkaŭščynskaha rajona pastupić na IT-śpiecyjalnaść u VNU, čym žycharam bolš zamožnych rehijonaŭ?

— Ja dumaju, što ŭradženiec hłybinki ŭ Biełarusi maje stolki ž šancaŭ pastupić na IT-śpiecyjalnaść, kolki i haradski chłopiec.

Nie sakret, što šlach u IT patrabuje mocnaha duchu, matyvacyi, vyraznych met i vializnaha žadańnia. Što, u svaju čarhu, moža mieć absalutna kožny, niezaležna ad miesca naradžeńnia.

— Ci jość u vas znajomyja z vašaha rajona, jakija taksama vučacca abo pracujuć u IT?

— U maim atačeńni šmat ludziej, jakija źviazvajuć žyćcio ź IT. Jany pastupajuć u techničnyja VNU, šukajuć stažyroŭki/vakansii. Da taho ž u miascovych škołach jość dobryja prahramy dla ŭdziełu ŭ roznych techničnych kanfierencyjach abłasnoha/respublikanskaha maštabu. Tak što ja nie budu ździŭleny, kali vyjavicca, što šmat školnikaŭ Šarkaŭščynskaha rajona chočuć raźvivacca ŭ hetym kirunku.

Tym nie mienš, ja nie mahu ŭjavić dobruju karcinu ŭ budučyni, asabliva paśla razmoŭ z ravieśnikami. Časam zdajecca, što paśla sychodu starejšaha pakaleńnia ŭ rajonie zusim nie zastaniecca ludziej.

• 0
• 0
• 1
• 5
• 0
• 2
• 0
• 0