Łukašenka abiacaje kitajcam pabudavać druhuju AES dla ich ciaplic, a zarablać na kvietkach i harodninie buduć Baskaŭ ź Ciacierynym
Alaksandr Łukašenka prapanuje Kitaju budavać u Biełarusi ciapličnyja kompleksy dla vyroščvańnia harodniny i kvietak. Jon abiacaje tannyja haz i elektryčnaść, rynki zbytu i kvalifikavanuju pracoŭnuju siłu. A zarablać na kvietkach i harodninie z tych ciaplic buduć nabližanyja da jaho biznesmieny.
Alaksandr Łukašenka prapanuje Kitaju budavać u Biełarusi ciapličnyja kompleksy dla vyroščvańnia harodniny i kvietak, a vyraščanuju pradukcyju pastaŭlać nie tolki na ŭnutrany rynak, ale i za miažu, uklučajučy sam Kitaj. Ab hetym išła razmova na jaho sustrečy ŭ Piekinie z pradstaŭnikami šeraha kitajskich kampanij, piša BiełTA.
«My vas čakajem u Biełarusi. Ziamiel i hleby, prydatnaj dla ciaplic, u nas chapaje. Kali vy vykarystoŭvajecie štučnaje arašeńnie i padkormku raślin, my krychu ŭmiejem heta rabić. Ludzi, jakija mohuć pracavać na hetych kompleksach, u Biełarusi jość», — skazaŭ Łukašenka na sustrečy z kiraŭnictvam kampanii «Šańdun Lisente Ahratechnoładžy» na čale sa staršynioj praŭleńnia Vanam Šaŭbo.
Łukašenka raśpisvaŭ kankurentnyja pieravahi Biełarusi, navat paabiacaŭ pabudavać druhuju AES, kab dać tannuju elektryčnaść:
«U nas prymalny košt pryrodnaha hazu, liški elektraenierhii (my płanujem pabudavać druhuju atamnuju stancyju, my jaje abaviazkova pabudujem). Tamu vy možacie surjozna razharnucca ŭ Biełarusi, na našym rynku.
Što vielmi važna, my vielmi šmat takoj pradukcyi siońnia pradajom u Rasii. Rasijski rynak nieabsiažny. U Jeŭropie vielmi patrebna heta pradukcyja. Tamu kali chutka razhorniemsia, my možam atrymać lubuju aharodninu i pradać na nieabmiežavanych rynkach», — skazaŭ jon.
Na sustreču ŭ Kitai byli zaprošanyja i nabližanyja da siamji Łukašenki sienatar, były trenier Koli Łukašenki Dźmitryj Baskaŭ, a taksama biźniesmien, siabra Łukašenki Siarhiej Ciacieryn.
Akazałasia, što pieršy prajekt pabudujuć u Viciebskaj vobłaści, jak raspavioŭ sam Ciacieryn.
«Na sustrečy ź biznes-partniorami my pryjšli da taho, što hety prajekt budzie žyć, budzie ruchacca. U ich vielmi cikavyja siońnia pytańni, źviazanyja ź sielekcyjaj. Harodninnaj, fruktovaj. Toje, što moža być karysnym našaj krainie. Jość pamidory, ahurki takoj formy, jakich ja sam raniej nie bačyŭ. Jość kudy imknucca. I heta ŭ nas sumiesny inviestycyjny prajekt, jaki budzie žyć u Biełarusi. My damovilisia sustrecca ŭžo ŭ vieraśni, i hety prajekt pačnie ruchacca spačatku ŭ Viciebskaj vobłaści, a potym dalej pa krainie», — raspavioŭ biznesmien.
U Baskava, vyhladaje, budzie inšy kirunak — jon chvaliŭ kvietkavy biznes.
«Na sustrečach ź biznes-kampanijami była kitajskaja inicyjatyva pa budaŭnictvie i ekspłuatacyi ciaplic u Respublicy Biełaruś. Ciaplic, u jakich buduć vyroščvacca pryhožyja kvietki», — skazaŭ žurnalistam Baskaŭ i taksama dadaŭ, što kitajcaŭ ź ich technałohijami čakajuć u Biełarusi, u nas jość usie nieabchodnyja ŭmovy dla paśpiachovych budaŭnictva i ekspłuatacyi ciaplic — pryrodny haz, dastatkovaja kolkaść elektraenierhii, ajčynnyja ŭhnajeńni i, viadoma ž, kvalifikavanyja kadry.
«Tamu ja dumaju, što ŭ nas pavinien atrymacca dobry sumiesny kitajska-biełaruski prajekt», — skazaŭ Baskaŭ.
Ciapier čytajuć
U Lepieli zatrymali palaka, jaki nibyta zdabyŭ dakumienty vučeńniaŭ «Zachad-2025»8
Kamientary
-NN
dziela tych chto nie zrazumieŭ ,
1) 2 AES, heta 60 % eklektyčnaści + miascovaja mahčymaści kala 20%. I Maskovija nie zmoža šantažavać RB
2) Usio ŭ Biełarusi budujecca dziela EZ.
3) Maskoŭskaja impieryja pamiraje i Saša heta cudoŭna viedaje