Fiederalny kancler Hiermanii Frydrych Mierc prapanavaŭ dla paskareńnia intehracyi Ukrainy ŭ Jeŭrapiejski Sajuz uvieści dla jaje novy pramiežkavy status — status asacyjavanaha člena, paviedamlaje Deutsche Welle.
Hałoŭnaja ideja hetaj prapanovy — u tym, kab Ukraina mahła chutčej i bolš ščylna intehravacca ŭ struktury ES, ale biez poŭnych pravoŭ člena. Heta značyć, što kraina mahła b udzielničać u pasiadžeńniach roznych instytutaŭ Jeŭrasajuza, adnak biez prava hołasu i biez mahčymaści ŭpłyvać na kančatkovyja rašeńni.
Pry hetym Mierc ličyć, što poŭnaje členstva Ukrainy najbližejšym časam nierealistyčnaje. Jon tłumačyć heta vialikaj kolkaściu pieraškod i składanymi pracedurami ratyfikacyi ŭ krainach ES, jakija mohuć zaciahnuć praces na doŭhija hady. Tamu jon prapanuje nie čakać zaviaršeńnia ŭstupleńnia, a pačać pahłyblenuju intehracyju ŭžo zaraz.
Zhodna ź jaho prapanovaj, Ukraina mahła b udzielničać u pasiadžeńniach Rady ES i Jeŭrapiejskaj rady, ale biez prava hałasavać. Taksama praduhledžvajecca ŭdzieł pradstaŭnikoŭ Ukrainy ŭ Jeŭrakamisii i Jeŭraparłamiencie ŭ jakaści naziralnikaŭ biez hałasoŭ, a taksama śpiecyjalny ŭdzieł u Jeŭrapiejskim sudzie.
Asobna padkreślivajecca, što taki status nie patrabuje poŭnaj jurydyčnaj pracedury ŭstupleńnia abo źmianieńnia damoŭ ES — dastatkova palityčnaha pahadnieńnia pamiž krainami.
Finansava Ukraina spačatku nie budzie płacić unioski ŭ biudžet ES i nie budzie atrymlivać adtul pramych vypłat, ale dostup da niekatorych prahram moža adkryvacca pastupova. Taksama prapanujecca paetapnaje ŭviadzieńnie jeŭrapiejskaha zakanadaŭstva.
Važnym elemientam źjaŭlajecca biaśpieka: Mierc prapanuje, kab krainy ES uziali na siabie abaviazak uzajemnaj dapamohi Ukrainie ŭ vypadku pahroz, što pavinna stać dadatkovaj harantyjaj abarony padčas vajny. Jon taksama prapanuje maksimalna zblizić źniešniuju i abaronnuju palityku Ukrainy z palitykaj ES.
Akramia hetaha, u prapanovie jość punkt pra mahčymaść pazbaŭleńnia hetaha statusu, kali Ukraina parušyć asnoŭnyja kaštoŭnaści ES abo značna adstupić ad reformaŭ.
Dla inšych kandydataŭ u ES, naprykład Ałbanii, Čarnahoryi i Małdovy, Mierc prapanuje inšyja formy paskoranaj intehracyi, ale nie identyčny status.
Ciapier čytajuć
«Ja tak daloka zabrałasia. Škada tolki, što nie mahu pakazać heta tatu». Jak žyvie dačka Paŭła Šaramieta praz 10 hadoŭ paśla jaho hibieli6
«Ja tak daloka zabrałasia. Škada tolki, što nie mahu pakazać heta tatu». Jak žyvie dačka Paŭła Šaramieta praz 10 hadoŭ paśla jaho hibieli
Statkievič ab pratestach va Ukrainie: Kali vy abrali z takoj pieravahaj prezidenta i adnačasova Viarchoŭnaha hałoŭnakamandujučaha, to dajcie jamu kiravać2323
Kamientary
Słava Ukrajini!!!