Viadomy brytanski videabłohier skłaŭ rejtynh krain byłoha SSSR. Biełaruś pastaviŭ na pieršaje miesca. Čamu?

Na kanał błohiera padpisany 4,5 miljona čałaviek. U svaim novym videa, pryśviečanym rejtynhu krain byłoha SSSR, Biendžamin Ryč adrazu papiaredziŭ hledačoŭ: jaho acenka subjektyŭnaja i nie maje ničoha ahulnaha z hieapalitykaj ci ekanamičnymi pakazčykami. 

«Hety śpis składzieny vyklučna na asnovie majho asabistaha dośviedu ŭ kožnaj krainie. Ci znajšoŭ ja ahulnuju movu ź miascovymi? Ci była viza hałaŭnym bolem? Ci byli tam fajnyja savieckija rečy? Abo, što samaje važnaje, ci byli miascovyja babulki bojkimi dy vostrymi na jazyk?» — tłumačyć svoj padychod błohier.

Voś jak vyhladaje jaho top-15:

1. Biełaruś

2. Małdova

3. Ukraina

4. Kyrhyzstan

5. Rasija

6. Litva

7. Armienija

8. Uźbiekistan

9. Łatvija

10. Hruzija

11. Tadžykistan

12. Estonija

13. Azierbajdžan

14. Kazachstan

15. Turkmienistan

Apošniaje miesca Turkmienistana błohier patłumačyŭ tatalnym kantrolem, adsutnaściu internetu i «kašmarnaj» vizavaj praceduraj. A voś vysokaje miesca Małdovy (2-je) abumoŭlena «partałam u minułaje» — Prydniastroŭjem i nievierahodnaj pryjaznaściu ludziej.

Čamu Biełaruś — numar adzin?

Błohier adznačaje, što byvaŭ u Biełarusi jašče da taho, jak staŭ zorkaj YouTube. Pad psieŭdanimam Artur Čyčester jon napisaŭ knihu «The Burning Edge: Travels Through Irradiated Belarus» («Na pałymniejučym krai: Padarožžy pa apramieniennaj Biełarusi»).

«Biełaruś dla mianie — heta nie prosta kraina, heta cełaja atmaśfiera, i jana — maja lubimaja z usich byłych savieckich respublik. (…) Ja viarnuŭsia tudy z kamieraj, kab pakazać vam tyja ž miescy i ludziej z apramienienaha ŭschodu, jakija hadami nie vychodzili ŭ mianie z hałavy», — tłumačyć błohier.

Biendžamin Ryč pryznajecca, što ŭ bolšaści krain sa śpisa jon šukaŭ mazaiki, statui Lenina i tannyja stałoŭki. Ale ź Biełaruśsiu ŭsio było pa-inšamu.

«Dla mianie Biełaruś zaŭsiody była pieradusim pra ludziej — i pra historyi, jakimi jany dzialilisia. Zvyčajna hetyja historyi hučali za čarkami majoj lubimaj miascovaj harełki — «Dzikaja kačka», —

kaža błohier i zhadvaje svaich hierojaŭ, jakija stali lehiendami jaho kanała: pustelnika Kolu, jaki žyvie adzin hłyboka ŭ lesie; viasiołych siabroŭ z Čačerska; «šašłyčnuju bandu» z zony adčužeńnia; 100‑hadovuju babulku, «jakaja žyvie sa svaim synam hłyboka ŭ radyjacyjnym lesie i jakaja bačyła, jak usio XX stahodździe pranosicca mima jaje maleńkaj viosački»; a taksama dziaŭčynu ź Minska, jakaja navučyła, jak pranieści kata ŭ nižniaj bialiźnie.

Błohier padkreślivaje, što mienavita Biełaruś adkryła jaho «saviecki» cykł videa, jaki ŭ vyniku pryvioŭ jaho da suśvietnaj papularnaści.

«Davajcie vierniemsia ŭ samy pačatak, kali značna maładziejšaja viersija mianie išła pa vulicach Babrujska, pakazvajučy na architekturu i znaki aŭtavakzała. Tady ja ŭpieršyniu pramoviŭ słova «saviecki» na hetym kanale, nie viedajučy, ci paličyć chtości jašče ŭsio heta takim ža cikavym, jak ja. Hetaje pytańnie atrymała hučny i jasny adkaz ad usich vas, chto praciahvaŭ hladzieć», — zhadvaje jon.

«Biełaruś, ty — toje miesca, ź jakoha ŭsio pačałosia. I tamu dla mianie ty — hałoŭnaja savieckaja respublika», — padsumavaŭ Biendžamin Ryč.

• 34
• 0
• 7
• 24
• 3
• 3
• 0
• 8