Tramp daviedaŭsia «cikavyja rečy» pra Rasiju i Ukrainu, ale pakul pra ich nie havoryć

Siarod inšaha ŭ prezidenta ZŠA spytalisia pra vajnu va Ukrainie. Pamiž žurnalistami i im adbyŭsia nastupny dyjałoh:

— Vy razmaŭlali z Pucinym na minułym tydni?

— Tak, ja nie chaču… Ja daviedaŭsia niekatoryja rečy, jakija buduć vielmi cikavyja, ja dumaju, u nastupnyja niekalki dzion vy daviedajeciesia.

— Ci buduć niejkija nastupstvy, kali nie budzie jakoha-niebudź anonsu sustrečy prezidentaŭ Pucina i Zialenskaha?

— Tak. Buduć.

— Jakija?

— Pahladzim, što adbudziecca. Pahladzim, što jany zrobiać, i što adbudziecca. Ja vielmi ŭvažliva za hetym saču.

Na pytańnie, ci turbuje Trampa mahčymaje farmavańnie vosi suprać Złučanych Štataŭ z udziełam Kitaja i Rasii, jon adkazaŭ:

«Nie, ja zusim nie zaniepakojeny. Absalutna nie. U nas samaja mocnaja armija ŭ śviecie, i, paviercie, jany nikoli b nie advažylisia prymianić svaje vojski suprać nas. Paviercie, heta było b najhoršym rašeńniem, jakoje jany mahli b pryniać».

Choć u toj ža čas jon pryznaŭ, što kaśmičnuju honku ZŠA nibyta prajhrajuć Rasii i Kitaju.

Zhadaŭ jon i pra inicyjavanuju saboj šmatsłojnuju sistemu supraćrakietnaj abarony «Załaty kupał» — z balistyčnymi rakietami, spadarožnikami i sensarami. Da hetaj jašče nie stvoranaj sistemy ŭžo nibyta mocna choča dałučycca Kanada, i jon budzie dumać, što z hetym rabić.

Akramia taho, Tramp abviaściŭ pra pieranos štaba Kamandavańnia kaśmičnych vojskaŭ z horada Kałarada-Sprynhs u štacie Kałarada ŭ horad Hantśvił u štacie Ałabama. Pry hetym jon zajaviŭ, što Hantśvił atrymaje novuju nazvu — «Rokiet-sici».

Hetaje rašeńnie, pavodle jaho słoŭ, stvoryć tysiačy novych pracoŭnych miescaŭ i pryciahnie miljardy dalaraŭ inviestycyj. Taksama heta dapamoža Złučanym Štatam zabiaśpiečyć abaronu i ŭmacavać daminavańnie ŭ kaśmičnaj śfiery, jakuju Tramp nazvaŭ «novym vysokim frontam».

Takim čynam, Tramp admianiŭ rašeńnie svajho papiarednika Džo Bajdena, pryniataje ŭ 2023 hodzie, zhodna ź jakim štab pavinien byŭ zastacca ŭ Kałarada-Sprynhs. Adnačasova jon realizavaŭ prajekt, jaki bolš za siem hadoŭ aktyŭna prasoŭvali pradstaŭniki Respublikanskaj partyi z Ałabamy.

Pra Bajdena Tramp zhadaŭ taksama, kali ŭ jaho spytalisia, ci dachodzili da jaho čutki pra ŭłasnuju śmierć z-za niekalkidzionnaj adsutnaści na publicy. Zajaviŭšy, što «heta fake news», prezident ZŠA skazaŭ:

«Ja nie rabiŭ ničoha dva dni, a ŭsie ŭžo pačali kazać, što sa mnoj niešta nie tak. Bajden ničoha nie rabiŭ miesiacami i nichto ničoha nie kazaŭ».

• 4
• 0
• 3
• 5
• 0
• 1
• 1
• 0