U Piekinie prajšoŭ maštabny vajskovy parad. Lidar KNR zajaviŭ, što Kitaj nie spynić
Na płoščy Ciańańmeń u Piekinie prajšoŭ parad, prymierkavany da 80-j hadaviny kapitulacyi Japonii i zakančeńnia Druhoj suśvietnaj vajny. Hałoŭnymi haściami na im byli prezident Rasii Uładzimir Pucin i lidar KNDR Kim Čen Yn, piša Bi-bi-si.
Na pramoj tranślacyi ź Piekina było bačna, što pierad pačatkam parada Pucin, Kim i staršynia KNR Si Czińpin razam vyjšli na trybunu, za imi tudy nakiravalisia inšyja lidary. Usiaho na paradzie prysutničała bolš za 26 kiraŭnikoŭ dziaržaŭ.
«Čałaviectva znoŭ staić pierad vybaram pamiž miram i vajnoj, dyjałoham i kanfrantacyjaj, uzajemavyhadnymi vynikami i hulnioj z nulavoj sumaj», — zajaviŭ kitajski lidar u svaim vystupleńni.
Pavodle jaho słoŭ, «adradžeńnie kitajskaj nacyi nie spynić», a krainy ŭsiaho śvietu pavinny «likvidavać karennyja pryčyny vajny i nie dapuścić paŭtareńnia histaryčnych trahiedyj».
«Ahulnaja biaśpieka moža być zabiaśpiečanaja tolki tady, kali krainy ŭsiaho śvietu buduć stavicca adna da adnoj jak da roŭnych, žyć u harmonii i padtrymlivać adna adnu», — skazaŭ jon pierad tym, jak pačać ahlad vojskaŭ.
Siarod novych vidaŭ uzbrajeńniaŭ, jakija Kitaj prademanstravaŭ na paradzie vajennaj techniki, byli mižkantynientalnaja balistyčnaja rakieta DF-5C, padvodny dron AJX002, a taksama łaziernaja zbroja.
Adrazu paśla pačatku parada prezident ZŠA Donald Tramp apublikavaŭ post u svajoj sacsietcy Truth Social, u jakim faktyčna abvinavaciŭ Rasiju, Kitaj i KNDR u płanavańni zmovy.
«Hałoŭnaje pytańnie, na jakoje treba adkazać, zaklučajecca ŭ tym, ci zhadaje staršynia KNR Si pra tuju vielizarnuju padtrymku i «kroŭ», jakuju ZŠA akazali Kitaju, kab dapamahčy jamu zdabyć SVABODU ad nadzvyčaj varožaha zamiežnaha zachopnika. Mnohija amierykancy zahinuli ŭ baraćbie Kitaja za pieramohu i słavu», — zajaviŭ jon.
Jon taksama pažadaŭ lidaru KNR i kitajskamu narodu pravieści «cudoŭnaje śviata».
«Kali łaska, pieradajcie maje samyja ciopłyja pažadańni Uładzimiru Pucinu i Kimu Čen Ynu, pakul vy płanujecie zmovu suprać Złučanych Štataŭ Amieryki», — dadaŭ Tramp.
Uražvaje toje, što Kim Čen Yn atrymaŭ takoje pačesnaje miesca na hetym paradzie.
Paŭnočnakarejski lidar uvajšoŭ na płošču Ciańańmeń razam ź Si i Pucinym, a zatym zaniaŭ miesca pobač ź imi. Usie troje niazmušana razmaŭlali adzin z adnym.
Kim doŭhi čas znachodziŭsia ŭ izalacyi, da jaho stavilisia jak da izhoja i navat naśmichalisia, ale siońnia jon byŭ uzvyšany amal da ŭzroŭniu dvuch vielmi ŭpłyvovych suśvietnych lidaraŭ, paviedamiŭ karespandent Bi-bi-si, jaki bačyŭ parad.
Kim upieršyniu naviedvaje mižnarodnuju sustreču suśvietnych lidaraŭ. Lidar KNDR redka pakidaje Paŭnočnuju Kareju, a kali heta adbyvajecca, to, jak praviła, sustrakajecca ź lidarami adzin na adzin.
Častkova pryčyna, jakaja prymusiła Kima parušyć tradycyju i naviedać parad, biezumoŭna, zaklučajecca ŭ mahčymaści źjavicca pobač ź Si Czińpinam i Uładzimiram Pucinym u takoj zaŭvažnaj jakaści, być na roŭnych ź imi.
Hetyja lidary pasyłajuć Zachadu, asabliva Złučanym Štatam, vyrazny sihnał pra toje, što ciapier jany ŭtraich ciesna supracoŭničajuć adzin z adnym.
Parad, pryśviečany 80-hodździu zakančeńnia Druhoj suśvietnaj vajny, — najbujniejšy ŭ historyi Kitaja.
Partret Maa Czeduna, zasnavalnika Kamunistyčnaj partyi Kitaja, na bramie Ciańańmeń byŭ akružany vaśmiu hihanckimi ściahami KNR.
Praz darohu ad suśvietnych lidaraŭ, pobač z Domam narodnych schodaŭ, stajali dźvie vielizarnyja kvietkavyja kampazicyi ŭ pamiać pra zakančeńnie Druhoj suśvietnaj vajny. Tam ža — miescy dla 50 tysiač čałaviek, zaprošanych na parad.
Napiaredadni parada ŭ Piekinie ŭzmacnili miery biaśpieki — i nie tolki pa maršrucie šeścia. La ŭvachodaŭ u niekatoryja ofisy pastavili skaniery, jak u aeraportach. Paloty lubych dronaŭ nad horadam zabaranili. Na padjezdach da estakad i mastoŭ kruhłasutačna dziažurać achoŭniki, niekatoryja ź ich — u vajskovaj formie.
Padrychtoŭka da parada — pieršaha za šeść hadoŭ — zaniała niekalki miesiacaŭ. U Piekinie vyviesili bolš za 200 tysiač ściahoŭ, na abočynach značnych daroh i skryžavańniach ustanavili kvietkavyja kampazicyi, a dziełavy kvartał atrymaŭ novuju iluminacyju.
Parad prajšoŭ da płoščy Ciańańmeń pa hałoŭnym praśpiekcie horada — Čan'ańczie. Padčas repietycyj žycharoŭ hetaj vulicy paprasili nie vychodzić na bałkony, kab zachavać u sakrecie detali šeścia. Škoły, hateli, kramy i ofisy ŭzdoŭž maršrutu zakryli na dva dni. Navat uziać naprakat haradski rovar stała amal niemahčyma.
Maštabnaje mierapryjemstva słužyć adnačasova niekalkim metam: z adnaho boku — pakazać usiamu śvietu vajennuju i dypłamatyčnuju moc Kitaja, z druhoha — abudzić pačućcio honaru i patryjatyzmu ŭnutry krainy.
Dla Piekina Druhaja suśvietnaja vajna — heta «narodnaja vajna supracivu suprać japonskaj ahresii», i napiaredadni hadaviny ŭ Kitai vyjšła niekalki histaryčnych błokbastaraŭ pra hety pieryjad.
Tak, film «Nankinski fatohraf» pra Nankinskuju raźniu 1937 hoda staŭ hałoŭnym chitom hetaha leta ŭ kitajskich kinateatrach.
Ciapier čytajuć
Andrej Pavuk uładkavaŭsia kiroŭcam tralejbusa ŭ Vilni i raskazaŭ, jak jano18
Kamientary
likvidavać korannyja pryčyny vajny ......
Poka, Kitaj, ihrajetsia v Parady i da, na Paradie jeho pierieŝieholať słožno.
Sobrany do kuči prožiektiory i bachvali, kotoryje, połučajut po zubam ot Ukrainy s zabłokirovannoj, vojennoj pomoŝju.