Padličyli, kolki možna było b zarabić, kali pakłali b biełaruskija rubli na depazit hod tamu
Pracenty na valutnych układach ciapier mizernyja, a ci šmat prynosiać rublovyja?
Kolki rubloŭ nabiažyć za hod?
Najbolš vyhadnyja biezadzyŭnyja depazity terminam ad adnaho hoda — kali havorka idzie pra biełaruskija rubli, — i terminam ad dvuch hadoŭ, kali ŭkład valutny. Dachod ad hetych depazitaŭ nie abkładajecca padachodnym padatkam (u vypadku ź biezadzyŭnymi ŭkładami da hoda bank aŭtamatyčna vyličvaje padatak).
Razhledzim minimalny z vyhadnych terminaŭ — 13 miesiacaŭ. To-bok ciapier zabirać hrošy mohuć tyja, chto pakłaŭ ich na depazit u krasaviku 2024 hoda.
Letaś banki prymali biełaruskija rubli pad 14,1—15,9% na termin 13 miesiacaŭ. Ciapier pracentnyja staŭki prykładna takija ž, tamu dla raźliku vykarystajem aktualnyja danyja kalkulataraŭ.
Naprykład, kali vy pakłali 10 000 rubloŭ u krasaviku 2024 hoda pad 14,4%, to praz 13 miesiacaŭ vy atrymajecie 11 562 rubli.
Kali ŭkład z kapitalizacyjaj pracentaŭ, suma budzie vyšejšaja. Pakažam heta na prykładzie kalkulacyi ad Parytetbanka.
Pakłaŭšy 10 000 rubloŭ na 13 miesiacaŭ pad 15,6% hadavych z kapitalizacyjaj, praz hod i adzin miesiac vy atrymajecie 11 813 rubloŭ. Suma vyraście na 18% —vyhada vidavočnaja navat z ulikam inflacyi.
Pieravodzim u valutu
Jak hetaja vyhada vyhladaje z ulikam kursavych vahańniaŭ?
Naprykład, na 24 krasavika 2024 hoda kurs Nacbanka składaŭ 3,25 rubla za dalar. Atrymlivajecca, što 13 miesiacaŭ tamu 10 000 rubloŭ raŭnialisia $3077.
Ciapier ža, pavodle kursu Nacbanka, dalar kaštuje 3,01 rubla. Atrymlivajecca, što 10 000 rubloŭ ciapier ekvivalentnyja $3322.
Takim čynam, 10 tysiač biełaruskich rubloŭ, jakija 13 miesiacaŭ tamu raŭnialisia 3077 dalaram, na biezadzyŭnym depazicie pieratvarylisia ŭ sumu, ekvivalentnuju 3841—3944 dalaram.
A što, kali b vy pakłali hrošy na depazit u valucie?
Apošnija hady biełaruskija banki źnižajuć pracentnyja staŭki pa valutnych układach, tamu prybytkovaść pa ich znachodzicca ŭ miežach statystyčnaj chibnaści.
Biełarusbank, naprykład, prapanuje 0,01% pa ŭkładach u dalarach. Pakłaŭšy na trochhadovy biezadzyŭny depazit 10 tysiač dalaraŭ, vy atrymajecie źvierchu ŭsiaho try dalary. Praz heta kłaści hrošy ŭ dalarach abo jeŭra na depazit stała biessensoŭna.
Samaje składanaje — uhadać, što budzie ź biełaruskim rubloŭ u nastupny hod. Tym, chto pavieryŭ u nacyjanalnuju valutu ŭ 2024-m, pašancavała. Što budzie dalej, harantyi nie daść nivodzin prahnazist.
Kamientary
Pakłaŭšy 10 000 rubloŭ (9090kh bulby pa 1.1rub.)
na 13 miesiacaŭ pad 15,6% hadavych z kapitalizacyjaj
praz hod i adzin miesiac vy atrymajecie 11 813 rubloŭ (3 375 kh bulby pa 3.5rub.)
318%. Z kapitalizacyjaj u vyhladzie prarostkaŭ.