Emihranty z Haici padali na Trampa ŭ sud za skandalny miem pra pajadańnie kotak i sabak. Patrabujuć aryštu
«U Sprynhfiłdzie jany jaduć sabak. Ludzi, jakija pryjechali, jaduć katoŭ. Jany jaduć chatnich žyvioł ludziej, jakija tam žyvuć, i heta hańba», — zajaviŭ Tramp na debatach.
Jak piša vydańnie The Guardian, hrupa haicianskich emihrantaŭ z amierykanskaha horada Sprynhfiłd u štacie Ahajo padała isk u sud na kandydata ŭ prezidenty ZŠA ad respublikancaŭ Donalda Trampa i kandydata na pasadu vice-prezidenta ZŠA Džej Dzi Vensa.
Asnoŭnaj nahodaj stali słovy Trampa pra toje, što mihranty z Haici ŭ Sprynhfiłdzie jaduć katoŭ i sabak miascovych žycharoŭ. Rytoryka Trampa pryviała da pahroz hvałtu ŭ dačynieńni da haician u horadzie, uklučajučy bolš za 30 pahroz vybuchu, jakija pryvodzili da evakuacyj škoł i ŭradavych budynkaŭ, adznačaje vydańnie.
«Tramp i Vens śviadoma raspaŭsiudzili chłuślivuju i niebiaśpiečnuju infarmacyju, śćviardžajučy, byccam haicianskaja supołka Sprynhfiłda zabivaje i jeść chatnich žyviołaŭ svaich susiedziaŭ. Jany paŭtarali takuju chłuśniu padčas prezidenckich debataŭ, na pieradvybarčych mitynhach, padčas intervju na nacyjanalnym telebačańni i ŭ sacyjalnych sietkach», — zajavili advakaty paciarpiełych haician i zaklikali prakuroraŭ aryštavać Trampa i Vensa.
Nahadajem, što padčas niadaŭnich pieradvybarčych debataŭ pamiž Kamałaj Charys i Donaldam Trampam apošni raptam pačaŭ raskazvać pra toje, što ŭ horadzie Sprynhfiłd mihranty jaduć katoŭ i sabak miascovych žycharoŭ.
«U Sprynhfiłdzie jany jaduć sabak — ludzi, jakija pryjechali, jany jaduć katoŭ. Jany jaduć chatnich žyvioł ludziej, jakija tam žyvuć, i heta toje, što adbyvajecca ŭ našaj krainie, i heta hańba», — zajaviŭ Tramp. Jahonaja apanientka na hetych słovach zaśmiajałasia.
Telekanał ABC apieratyŭna pravieryŭ hetaje vykazvańnie, i Devid Miuir u žyvym efiry adkazaŭ Trampu. Pavodle jaho słoŭ, meryja Sprynhfiłda abvierhła hetuju infarmacyju: paviedamleńniaŭ pra toje, što mihranty jaduć sabak i katoŭ ci ŭvohule škodziać chatnim žyviołam, u palicyju nie pastupała.
Tym nie mienš, śćviardžeńnie Trampa imhnienna zavirusiłasia ŭ sacsietkach. U tvitary źjavilisia dziasiatki tysiač dopisaŭ z cheštehami «Sprynhfiłd» i «Jany jaduć sabak». Prychilniki Trampa stali publikavać miemy z sabakami i katami, jakija trymajuć płakaty z nadpisami «Hałasuj za Trampa, vyratuj nas!», «Žyćci katoŭ važnyja», «Nas źjeli haicianie». Na inšych malunkach, zhienieravanych niejrasietkami, Tramp ratuje kačak (časam bolš padobnych da husiej) i katoŭ ad natoŭpu mihrantaŭ.
Ale adkul naohuł uziaŭsia hety miem? Nasamreč abmiarkoŭvać hetuju temu ŭ internecie pačali jašče da debataŭ. U kancy žniŭnia ŭ siecivie zavirusiłasia videa vystupleńnia žychara Sprynhfiłda na pasiadžeńni haradskoj rady. Jon paskardziŭsia na mihrantaŭ z Haici, jakija, pavodle jahonych słoŭ, palujuć na kačak u haradskim parku i jaduć ich.
U zakrytaj haradskoj supołcy ŭ fejsbuku źjaviłasia jašče adna historyja. Aŭtar dopisu raskazaŭ, što siabroŭka dački jahonaha susieda nibyta zhubiła kata, a praź niekatory čas znajšła jaho, kali jon visieŭ na drevie kala doma imihrantaŭ z Haici.
Skrynšoty pasta byli padchoplenyja trampistami i raźlacielisia pa siecivie. Temu raźviŭ i kandydat Trampa ŭ vice-prezidenty Džej Dzi Vens.
«Niekalki miesiacaŭ tamu ja padniaŭ pytańnie adnosna taho, što nielehalnyja imihranty z Haici vyklikajuć chaos pa ŭsim Sprynhfiłdzie. Ciapier prychodziać paviedamleńni, što ludzi, jakich nie pavinna być u našaj krainie, jaduć katoŭ i sabak miascovych žycharoŭ. Dzie našaja ŭpaŭnavažanaja pa miažy», — napisaŭ u tvitary naparnik Trampa. Jahony dopis sabraŭ bolš za 11 miljonaŭ prahladaŭ.
Paśla Vens dadaŭ, što jamu pastupaje ŭsio bolš padobnych paviedamleńniaŭ, choć jany i mohuć być chłuślivymi.
Mienavita tady zdaryłasia i pieršaja chvala miemaŭ pra toje, jak Tramp ratuje katoŭ i sabak. Nie zastaŭsia ŭ baku Iłan Mask: jon zapościŭ karcinku z kačkaj i kacianiom i napisaŭ «Ratujcie ich». Viadomy sienatar-respublikaniec Ted Kruz apublikavaŭ miem z katami, jakija abdymajucca, i podpisam «Kali łaska, hałasujcie za Trampa, i tady haicianskija imihranty nas nie źjaduć», supravadziŭšy karcinku śmiašlivymi smajlikami.
Tramp uchapiŭsia za hetuju teoryju zmovy i vyrašyŭ vykarystać jaje na debatach. Adnak paćvierdžanych vypadkaŭ źniknieńnia chatnich žyvioł u Sprynhfiłdzie niama.
Jašče ŭ aŭtorak mer horada Robiert Ru raskazaŭ, što nivodnaha paviedamleńnia pra toje, što mihranty jaduć chatnich žyvioł, nie pastupała. A adzinaje videa z padobnym epizodam, jakoje taksama raspaŭsiudžvali pravyja błohiery, było źniataje ŭ inšym horadzie ŭ Ahajo — tam za žorstkaje abychodžańnie z žyviołami zatrymali žančynu, u jakoj niama nijakich suviaziaŭ z Haici.
Abvierhli infarmacyju Trampa i ŭ palicyi Sprynhfiłda: tam zajavili, što «nie było nijakich dakładnych paviedamleńniaŭ abo kankretnych zajaŭ pra toje, što chatnija žyvioły padviarhalisia hvałtu, traŭmam abo žorstkamu abychodžańniu z boku mihrantaŭ».
U Sprynhfiłdzie z nasielnictvam amal 58 tysiač čałaviek apošnim časam sapraŭdy nazirajecca prytok mihrantaŭ z Haici. Usiaho ŭ akruzie Kłark znachodziacca kala 12-15 tysiač mihrantaŭ, 10 tysiač ź ich z Haici. Pry hetym pradstaŭnik haradskoj administracyi zapeŭnivaje, što mihranty nie parušajuć zakony.
Ciapier čytajuć
Biznesmien, biełaruska sa Šviecyi, chłopiec, asudžany za čat na piaciarych. Kaho jašče vyzvalili i vyvieźli ŭ Vilniu razam ź Siarhiejem Cichanoŭskim1212
Kamientary