Za apošnija try hady ŭ Jeŭropie značna źniziłasia kolkaść tych, chto padtrymlivaje papulisckija tezy. U Amierycy taksama nie dadałosia prychilnikaŭ hetaj palityčnaj płyni. U pryncypie, papulizm vyčerpvaje siabie va ŭsim śviecie, piša Guardian.
Centr daśledavańnia hramadskaha mierkavańnia YouGov razam z Guardian apytaŭ 1000 čałaviek u 10 jeŭrapiejskich krainach i 17 krainach pa-za Jeŭropaj (u tym liku ŭ Rasii, ZŠA i Kitai) i vyśvietliŭ, nakolki źmianiłasia staŭleńnie ludziej da asnoŭnych idej papulizmu.
Pa ŭsich punktach papulisty zhubili značnuju kolkaść prychilnikaŭ u Jeŭropie za apošnija try hady.
Adna z asnoŭnych tez papulistaŭ: maja kraina padzielenaja na zvyčajnych ludziej i karumpavanuju elitu, jakaja ekspłuatuje zvyčajnych ludziej.
Za try hady ludziej, jakija tak ličyli, stała ŭ siarednim na 10% mienš u krainach Jeŭropy. U Francyi hety pakazčyk źniziŭsia z 61% da 49%, u Danii — z 29% da 15%, u Polščy — z 65% da 54%, naprykład.
Druhaja klučavaja teza kłasičnaha papulista: ułada naŭmysna chavaje ad nas šmat važnaj infarmacyi dziela svaich intaresaŭ.
Na 6-17% mienš ludziej ciapier vierać u heta. Padčas pandemii źjaviłasia adčuvańnie, što mnohija pavieryli ŭ kanśpirałahičnyja teoryi. Tym nie mienš, daśledavańnie pakazvaje, što dola amataraŭ takich teoryj naadvarot skaraciłasia ŭ Jeŭropie za apošni čas.
Jašče adna pazicyja papulizmu: vola ludziej — hałoŭny pryncyp u vyznačeńni palityki dziaržavy.
Kali try hady tamu 66% francuzaŭ padtrymlivali taki pryncyp, dyk sioleta — tolki 55%. Hetak ža rezka pamienšała prychilnikaŭ hetaha pryncypu ŭ Niamieččynie, Danii, Hišpani, Italii i Polščy. Usio bolš ludziej zhodnyja z tym, što časam palitykam treba rabić i niepapularnyja rečy.
U toj ža čas sacyjołah z Amsterdamskaha ŭniviersiteta Motajs Roŭdaŭn, jaki daśleduje papulizm, adznačaje, što papularnaść hetaj palityčnaj płyni fienamienalna vyrasła za pieryjad z 1998 da 2018 hoda, z 7% da 25% (bolš čym u try razy). Paśla čaho pačaŭsia jaje zaniapad.
Tym nie mienš, chacia prychilnikaŭ papulizmu na siońnia stała mienš — jany surjozna radykalizavalisia (uziać chacia b nastroi praciŭnikaŭ pryščepak). Hetuju tendencyju možna patłumačać pandemijaj, ličyć Roŭdaŭn.
Cikava taksama, što kali ŭ bolšaści krain zaŭvažna źniziłasia dola tych, chto simpatyzuje papulistam, u Amierycy hetaja dola nie źniziłasia, ale i nie vyrasła. Daśledčyki adznačajuć, što heta možna patłumačyć hłyboka ŭkaranionaj tradycyjaj amierykancaŭ — być niezadavolenymi palityčnym isteblišmientam u pryncypie.
Lidaram ža pa niepryniaćci papulizmu daśledčyki nazyvajuć Daniju — adsotak ludziej, jakija ŭchvalajuć papulisckija teoryi, tam stabilna nizki.
-
ZŠA rychtujuć novyja sankcyi suprać rasijskaj nafty, kali Rasija adchilić mirnaje pahadnieńnie
-
Daradčyca Trampa acharaktaryzavała jaho jak pomślivuju asobu z charaktaram ałkaholika, a Maska — jak kietaminščyka
-
Śpikier Siejma Litvy dapuściŭ źmianieńnie adnosin ź Biełaruśsiu: adny tolki sankcyi dajuć vynik, ale nie kančatkovy
Ciapier čytajuć
Babaryka try chviliny adkazvaŭ na pytańnie, čyj Krym. Tak i nie adkazaŭ150
Kamientary