Prakuror zapatrabavaŭ terminy abvinavačanym pa spravie ab kaktejlach Mołatava ŭ Homieli: dla 16-hadovaha padletka — 6 hadoŭ
U Homieli praciahvajecca sud nad Leanidam Kavalovym, Dźmitryjem Karniejevym i Mikitam Załatarovym, jakich abvinavačvajuć va ŭdziele ŭ masavych biesparadkach i ŭ tym, što jany 10 žniŭnia ŭ centry horada kidali «kaktejli Mołatava». Siońnia dziaržabvinavaŭca ahučyŭ terminy, jakija, na dumku prakuratury, nieabchodna pryznačyć abvinavačanym u jakaści pakarańnia, paviedamlaje Tut.by.
Prakuror u sprečkach pierakvalifikavaŭ abvinavačvańnie Kavalovu z č. 1 art. 293 KK «arhanizacyja masavych biesparadkaŭ» na č. 1 art. 13 i č. 2 art. 293 KK «Padrychtoŭka da ŭdziełu da masavych biesparadkaŭ» — i paprasiŭ pryznačyć Kavalovu 7 hadoŭ pazbaŭleńnia voli ŭ kałonii strohaha režymu.
U dačynieńni da inšych abvinavačanych pierakvalifikavana abvinavačvańnie taksama — z udziełu ŭ masavych biesparadkach na padrychtoŭka da ŭdziełu ŭ masavych biesparadkach.
Dla Karniejeva dziaržabvinavaŭca patrabuje 8 hadoŭ pazbaŭleńnia voli kałonii strohaha režymu.
Niepaŭnaletniamu Załatarovu — 6 hadoŭ vychavaŭčaj kałonii.
29-hadovaha žychara Homielskaha rajona Leanida Kavalova, 17-hadovaha Mikitu Załatarova i 26-hadovaha žychara Dobruša Dźmitryja Karniejeva abvinavačvajuć u niezakonnym vyrabie vybuchovych rečyvaŭ, hvałcie albo pahrozie prymianieńnia hvałtu ŭ dačynieńni da supracoŭnika milicyi, udziele ŭ masavych biesparadkach, a Kavalova — jašče i ŭ ich arhanizacyi i ŭciahvańni niepaŭnaletniaha ŭ ździajśnieńnie złačynstva.
Pavodle papiaredniaj viersii śledstva, Kavaloŭ vyrabiŭ dva kaktejli Mołatava, pieravioz ich u centr horada i schavaŭ u adnym z dvaroŭ. Uviečary 10 žniŭnia jon pryjechaŭ u rajon praviadzieńnia pratestnych mitynhaŭ, dzie znajšoŭ vykanaŭcaŭ svajho płana — 26-hadovaha žychara Dobruša Karniejeva i 16-hadovaha Załatarova. Mužčyna pieradaŭ novym znajomym kaktejli Mołatava dla taho, kab jany padpalili ścianu jakoha-niebudź doma, a zatym staŭ pierakonvać ich ździejśnić bolš radykalnyja dziejańni — padpalić haradski aŭtobus ci aŭtazak. Pa darozie maładyja ludzi sustreli vajskoŭcaŭ vajskovaj častki 5525 i kinuli kaktejli ŭ ich bok. Plaška ŭpała kala vajskoŭcaŭ i raźbiłasia ab asfalt. Karniejeŭ i Załataroŭ ŭciakli — ich zatrymali paźniej. A Kavalova ŭ hety ž viečar.
U svaich pakazańniach Kavaloŭ śćviardžaŭ, što plaški byli nie ŭ jaho, a ŭ Karniejeva i Załatarova. Dźmitryj Karniejeŭ ža pierakonvaŭ sud, što jaho i Załatarova prymušaŭ padpalvać i kidać plaški Kavaloŭ. Załataroŭ spačatku admaŭlaŭsia ad dačy pakazańniaŭ, a zatym raspavioŭ, što mienavita Karniejeŭ prymušaŭ jaho kinuć butelku.
Kavaloŭ i Załataroŭ svaju vinu nie pryznajuć. Karniejeŭ pryznaje častkova.
Ciapier čytajuć
Kolkaść sudoŭ pa palityčnych kryminałkach źmienšyłasia ŭ razy9
Kamientary